Archive for category: Kif tgħinna

Id-Dar tal-Providenza għandha karusijiet speċjali għat-tfal li jitqassmu fi skejjel u parroċċi għal żmien ir-Randan li fihom huma jistgħu jfaddlu xi flus biex jgħinu lid-Dar.

Ma’ kull karus jingħata fuljett li jispjega li l-flus miġbura jintużaw għall-inklużjoni ta’ persuni b’diżabilità biex huma jkollhom opportunitajiet indaqs u jgħixu f’ambjent fejn jistgħu jħobbu u jinħabbu, jitgħallmu u jaqsmu l-esperjenzi tagħhom mal-oħrajn, jikbru fil-fidi, jaħdmu u jgawdu l-ħajja bħal kull persuna umana oħra.

Il-fuljett juri li din l-inizjattiva hi biss qatra f’oċean ta’ x’nistgħu nagħmlu favur il-persuni b’diżabilità.

Skejjel u parroċċi li jridu jipparteċipaw f’din il-katina ta’ imħabba jistgħu jċemplu fuq 21462844 jew 21464915 jew jikkuntattjawna b’imejl fuq info@dartalprovidenza.org

Fl-1 ta’ Jannar ta’ kull sena d-Dar tal-Providenza torganizza Festa ta’ Ġenerożità fid-Dar tas-Siġġiewi biex tiġbor fondi tant meħtieġa għad-Dar. Kull sena aktar minn ħames miljun euro huma meħtieġa għat-tmexxija tad-djar tagħha inklużi dawk fil-komunitajiet tas-Siġġiewi, l-Qawra, Birkirkara, ż-Żurrieq w aktar tard il-Balluta. Din l-attività ta’ ġbir ta’ flus hija waħda mill-ewlenin li jsiru matul is-sena.

Il-Festa ta’ Ġenerożità tibda b’Quddiesa fil-kappella tad-Dar w aktar tard uħud mill-aqwa talent Malti jieħdu sehem f’maratona ta’ 15-il siegħa li ssir taħt it-tinda li tiġi armata apposta fil-parkeġġ tad-Dar tal-Providenza. Dan l-avveniment jixxandar dirett fuq l-istazzjonijiet ewlenin tat-televiżjoni. Bosta huma dawk il-Maltin li matul il-jum tal-ewwel tas-sena ‘l ġdida jerħulha lejn is-Siġġiewi biex jagħmlu d-donazzjoni tagħhom u jgawdu l-atmosfera.

Marbut mal-Festa ta’ Ġenerożità, fil-ġimgħat bikrin ta’ Diċembru jsir irkant ta’ xogħlijiet tal-arti ġentilment mogħtija minn artisti Malti u barranin. Dawn l-aħħar snin, bil-permess ġentili u bil-patrunaġġ tal-Ispeaker tal-Kamra tar-Rappreżentanti, Dr Anġlu Farrugia, ssir wirja tax-xogħlijiet tal-arti fl-intrata tal-bini tal-Parlament fil-Belt Valletta. Dan l-aħħar ukoll, l-irkant kien qed isir fl-istess post tal-wirja. Ix-xogħlijiet kollha tal-arti jkunu wkoll esibiti on line fuq www.dtpauction.com

Id-Dar tal-Providenza għandha numru ta’ bottijiet li jistgħu jitpoġġew fi ħwienet biex wieħed jista’ jagħmel donazzjoni żgħira.

Għall-aktar informazzjoni jew biex tal-ħwienet jistgħu jieħdu sehem f’din l-attività wieħed jista’ jċempel fuq 21462844 jew 21464915 jew jikkuntattjana b’imejl fuq info@dartalprovidenza.org.

Għal ħamsa u ħamsin sena, Id-Dar tal-Providenza tipprovdi residenza permanenti u servizzi ta’ respite lill-persuni b’diżabilità.Illum id-Dar tiġbor fiha tliet residenzi fis-Siġġiewi: Villa Monsinjur Gonzi, Villa Papa Giovanni u Villa Papa Luciani kif ukoll ħamest idjar fil-komunità: ‘Żerniq’ fis-Siġġiewi, ‘Akkwarell’ fil-Qawra, ‘Dar Pirotta’ f’Birkirkara, ‘Shalom’ fiż-Żurrieq u dar oħra fil-Balluta . Biex tagħti dan is-servizz l-ispiża hi waħda konsiderevoli – fil-preżent tlaħħaq madwar €10,000 kuljum.

Matul is-snin, id-Dar tal-Providenza rnexxielha tlaħħaq ma’ dawn l-ispejjeż grazzi għall-Providenza Divina u l-ħafna ħbieb u benefatturi f’Malta u barra minn Malta.

Wieħed mill-modi kif nistgħu niġbru l-fondi hu billi ninkoraġġixxu l-impjegati jwiegħdu li jagħtu 25 ċenteżmu ta’ Ewro (€0.25) fil-ġimgħa mill-paga tagħhom lid-Dar. Dan l-ammont żgħir jitnaqqas mill-paga tagħhom imbagħad il-kumpanija tgħaddieh fil-kont bankarju tad-Dar. Mill-esperjenza li kellna, din l-inizjattiva titlob ftit li xejn xogħol amministrattiv u ċerti li l-maġġoranza tal-impjegati ma jsibu l-ebda oġġezzjoni li jidħlu fiha.

Għalhekk qed nitolbu s-sapport tagħkom biex tidħlu f’din l-iskema u tħeġġu l-ħaddiema tagħkom jipparteċipaw fiha.

Kumpaniji interessati jistgħu jiksbu, jekk iridu, aktar informazzjoni dwar din l-iskema permezz ta imejl fuq info@dartalprovidenza.org.

Impjegati li jixtiequ jidħlu f’din l-iskema għandhom jikkunttajaw l-HR Manager tal kumpanija tagħhom. Jekk il-kumpanija tagħhom mhix diġà parti minn din l-iskema huma għandhom jinkoraġġixxu lil min iħaddimhom biex jagħmel dan.