Il-Kap tal-Oppożizzjoni u tal-Partit Nazzjonalista Dr Alex Borg iżur id-Dar tal-Providenza

Il-Kap tal-Oppożizzjoni u tal-Partit Nazzjonalista Dr Alex Borg, akkumpanjat mis-sieħba tiegħu Sarah Bajada, żar id-Dar tal-Providenza fis-Siġġiewi. Huwa kien milqugħ mid-Direttur tad-Dar, Mons. Martin Micallef flimkien ma’ membri tal-amministrazzjoni u residenti. Huwa attenda għal quddiesa li saret fil-kappella tad-Dar li għaliha kienu preżenti wkoll familjari tal-ex Prim Ministru u ex-President ta’ Malta Eddie Fenech Adami li sakemm saħħtu kienet tippermetti kien iħobb jiċċelebra għeluq sninu fid-Dar tas-Siġġiewi.

Wara, Dr Borg kellu l-opportunità jiltaqa’ mar-residenti b’mod individwali.

Huwa żar il-Mużew Dun Mikiel fejn id-Direttur tad-Dar spjegalu l-istorja ta’ ħajjet Dun Mikiel u t-twaqqif tad-Dar tal-Providenza u ħa ħin biex jiffirma l-ktieb tal-viżitaturi. Wara huwa sellem lil Dun Mikiel fuq il-qabar tiegħu li jinsab fil-bitħa ta’ Villa Papa Giovanni.

Dr Borg żar ukoll il-gym fejn iltaqa’ mal-president tas-Siġġiewi Rowing Club il-Professur Joseph Grima u ma’ membri tal-club u ma’ ħaddiema tad-Dar.