Archive for category: Aħbarijiet

Residenti mid-Dar tal-Providenza kienu parti minn grupp ta’ persuni b’diżabilità li ħadu sehem fil-pellegrinaġġ annwali ta’ erbat ijiem f’Lourdes għall-pazjenti u pellegrini Maltin organizzat mill-Għaqda Maltija Trasport tal-Morda f’Lourdes (UMTAL). Pellegrinaġġ li l-Arċidjoċesi ta’ Malta ddeskriviet bħala “esperjenza straordinarja ta’ fidi”.

Dan il-pellegrinaġġ tmexxa minn Dun Joe Mizzi, id-direttur spiritwali tal-UMTAL, flimkien ma’ erba’ saċerdoti oħra li ħadu ħsieb l-aspett spiritwali tal-pellegrinaġġ.

Matul il-pellegrinaġġ, il-pazjenti, il-voluntiera u l-pellegrini għexu flimkien l-esperjenza straordinarja tal-fidi u l-imħabba f’Lourdes. Ħadu sehem f’diversi funzjonijiet reliġjużi, fosthom fil-quddiesa internazzjonali u f’quddiesa oħra bil-Malti li minnha jmorru għal Via Crucis, l-Adorazzjoni tal-Ewkaristija Mqaddsa u l-purċissjoni ta’ filgħaxija magħrufa bħala l-Aux Flambeaux. Il-pellegrini ħadu sehem f’ċelebrazzjonijiet li jinkludu s-sagrament tal-qrar u d-dlik tal-morda.

L-UMTAL ilha sa mill-1931 tagħmel dan il-pellegrinaġġ possibbli għal nies li, minħabba problemi ta’ saħħa, isibuha diffiċli jżuru dan is-santwarju qaddis.

Il‑Ħamis 16 ta’ Lulju 2026, l‑E.T.  Dott. Myriam Spiteri Debono, il‑President ta’ Malta, inawgurat uffiċjalment is-16‑il edizzjoni tal‑BOV Volleyball Marathon b’risq Id‑Dar tal‑Providenza li dis-sena qed ssir fil-Malta Fairs and Conventions Centre (MFCC) Ta’ Qali (North Gate).  Hija tasal fi tmiemha nhar is-Sibt 18 ta’ Lulju 2026, fil-11.00pm.

Erbgħin player, magħżula minn aktar minn sittin applikant, bdew l‑isfida ta’ 53 siegħa ta’ logħob tal‑volleyball bla waqfien għal għan nobbli.

L-E.T. Dott. Myriam Spiteri Debono, il-President ta’ Malta fid-diskors tagħha qalet li dan l-appuntament annwali jiġbor ir-reżiljenza, l-istamina u fuq kollox il-qalb kbira tal-poplu. Hija kompliet tgħid li wara l-providenza hemm il-qalb kbira tal-poplu li taf twennes u tħobb. Il-President żiedet tgħid li, “din hija manifestazzjoni li tagħmel lill-poplu uniku fis-solidarjetà li joffri lill-ħaddieħor. Id-Dar tal-Providenza tiddependi ħafna fuq is-solidarjetà u l-ġenoriżità.” Hija ddeskriviet id-Dar tal-Providenza bħala pilastru tal-ġid soċjali ta’ pajjiżna għax kienet minn ta’ quddiem biex min għandu bżonn l-għajnuna jingħata dinjità.

 

Il-Prim Ministru Robert Abela qal li din l-Maratona hija xhieda tas-sens qawwi ta’ volontarjat u solidarjetà li jiddistingwi lill-poplu Malti u Għawdxi. Huwa rringrazzja lill-atleti, lill-voluntiera, lill-ħaddiema u lit-tmexxija tad-Dar tal-Providenza għas-servizz imprezzabbli tagħhom, u ħabbar donazzjoni ta’ €20,000 mill-Fond għall-Kawżi Soċjali biex tkompli tissaħħaħ din il-ħidma importanti. Dr Abela semma kif il-Gvern qed ikompli jsaħħaħ id-drittijiet u l-protezzjoni tal-persuni b’diżabilità u tal-adulti vulnerabbli. Huwa qal dan b’referenza għall-Att dwar l-Awtonomija Personali li jsaħħaħ id-dritt ta’ kull persuna li tieħu d-deċiżjonijiet tagħha bl-appoġġ meħtieġ, u l-Att dwar il-Protezzjoni ta’ Adulti Vulnerabbli se jsaħħaħ l-intervent f’każijiet ta’ abbuż jew trattament ħażin, li se jibdew japplikaw mill-Ġimgħa 17 ta’ Lulju 2026. Tenna li d-dħul fis-seħħ ta’ dawn il-liġijiet jimmarka pass importanti lejn soċjetà aktar ġusta u inklużiva.

Id-Direttur tad-Dar tal-Providenza, Mons. Martin Micallef enfasizza li din il-maratona ta’ 53 siegħa ta’ logħob kontinwu hija xhieda ta’ kif is-solidarjetà u l-isport jistgħu jingħaqdu biex jagħmlu differenza konkreta fil-ħajja ta’ ħaddieħor. Huwa saħaq li s-solidarjetà tibda billi naraw lill-persuna qabel kollox, u noffrulha l-appoġġ meħtieġ biex tgħix b’dinjità.  Hu żied jgħid li d-Dar tal-Providenza hija impenjata li tkompli tiżviluppa servizzi dejjem aktar personalizzati u bbażati fil-komunità. Huwa rringrazzja lill-40 plejer, lill-voluntiera, lill-BOV, l-isponsor ewlieni, lill-isponsors kollha, lill-media, lill-MFCC u lil dawk kollha li għenu b’xi mod jew ieħor biex jagħmlu din il-maratona possibbli.  Huwa appella lill-poplu Malti u Għawdxi biex permezz  ta’ din il-maratona jkompli jappoġġja lid-Dar tal-Providenza, li teħtieġ madwar €8 miljun fis-sena biex tkompli twettaq il-missjoni tagħha.

Il-Kap Eżekuttiv tal-Bank of Valletta, Kenneth Farrugia, qal, “L-appoġġ tagħna għad-Dar tal-Providenza huwa kawża tassew għal qalbna. Il-BOV Volleyball Marathon turi b’mod ċar x’jista’ jinkiseb meta l-komunità tingħaqad flimkien b’solidarjetà għal kawża ġusta. Aħna kburin li nappoġġjaw din l-inizjattiva permezz tal-Fondazzjoni BOV u li nagħtu sehemna fix-xogħol imprezzabbli li jsir mid-Dar tal-Providenza. Il-kontribut tagħna jmur lil hinn mill-appoġġ finanzjarju. Permezz tal-programm ta’ volontarjat għall-impjegati tal-Bank, għadd ta’ impjegati qed jagħtu mill-ħin u l-enerġija tagħhom għal kawżi bħal din, u dan jirrifletti t-twemmin tagħna li biex tagħmel impatt veru, trid mhux biss tagħti, imma wkoll tkun involut fil-komunità li naqdu.”

Preżenti għall-ftuħ uffiċjali  kien hemm; l-Onor. Michael Falzon, Ministru għall-Politika Soċjali u l-Familja, l-Onor. Miriam Dalli, Ministru għall-Enerġija, l-Ambjent u r-Riġenerazzjoni tal-Port il-Kbir, l-Onor. Dott. Byron Camileri, Ministru għall-Edukazzjoni u l-Isport, l-Onor. Dott. Malcholm Paul Agius Galea, Ministru għall-Arti, il-Kultura u l-Wirt Nazzjonali, l‑Onor. Graziella Galea, il-kelliema tal-Oppożizzjoni għall‑Inklużjoni, is-Sur Graham Bencini, il-kelliem tal-Oppożizzjoni għall-Isport, u s-Sur Kenneth Farrugia, CEO tal-Bank of Valletta, l-isponsor ewlieni tal-Maratona.

Il‑maratona se tkun imxandra fuq l‑istazzjonijiet ewlenin.

Dawk li jżuru l-maratona fl-MFCC għandhom jistennew atmosfera sabiħa adattata

għall-familja kollha, bil-post il-ġdid joffri opportunità eċċellenti biex il-BOV Volleyball Marathon tilħaq livelli ġodda ta’ suċċess.

Il-Kunsill Malti għall-Arti, qed jappoġġja din l-attività u qed jaħdem mal-organizzaturi tal-maratona sabiex jiġi ppreżentat programm ta’ divertiment ta’ livell għoli b’artisti ewlenin matul it-tlett iljieli. Lara & The Jukeboys se jtellgħu spettaklu l-Ħamis filgħaxija, Versatile Brass & Ensemble, il-Ġimgħa, filwaqt lis-Sibt l-Spiteri Lucas Band se tkun il-qofol ta’ Classic Rock Night.

Is-Sibt fis-6:30 ta’ filgħodu ser issir ġirja 5K li tibda minn ħdejn it-tinda tal-MFCC Ta’ Qali (North Entrance). Kull parteċipant se jingħata midalja komemorattiva maħduma apposta għat-tellieqa. Kull min irid jipparteċipa jista’ jirreġistra fuq sabihlitaghti/5k

Is-Sibt bejn nofsinhar u l-ħamsa ta’ filgħaxija se jkun hemm DJ takeover fejn numru ta’ DJs żgħażagħ, fosthojm Miggy, Dodz, Izak, Riolo, Dom u Presko.

Waqt il-maratona se jkun hemm Kids Area kbira b’attrazjonijiet u attivitajiet għat-tfal, food court li jinkludi lil Forn tal-Għawdxi, eeetwell u Frullado.

L-NGO S.T.A.N.D. li taħdem ma’ żgħażagħ b’diżabilità se jkunu qed itellgħu esibizzjoni ta’ xogħlijiet ta’ arti magħmula minnhom fl-entratura tal-MFCC.

Għal aktar aġġornamenti u informazzjoni dwar il-maratona wieħed jista’ jżur is-sit: sabihlitaghti.org.

Il‑pubbliku jista’ jgħin billi jċempel fuq dawn in‑numri t’hawn taħt, juża l‑BOV Mobile jew il‑PayPal jew jagħti donazzjoni online fuq wieħed minn dawn il‑kontijiet bankarji tad‑Dar.

• €10 – 51602011
• €15 – 5170 2012
• €25 – 5180 2013
• €50 – 5190 2070
• €100 – 5130 2044
• Pledge Line: 2146 3686
• BOV Mobile: 7932 4834

Id-Dar tal-Providenza ħabbret pjani ambizzjużi għall-edizzjoni li jmiss  għall-maratona annwali tagħha tal-volleyball bil-għan li tiġbor il-fondi biex tkun tista’ ssostni l-ħidma tagħha.

Issa li waslet fis-16-il edizzjoni tagħha, il-BOV Volleyball Marathon, din is-sena ser issir bejn il-Ħamis 16 u s-Sibt 18 ta’ Lulju 2026, u għall-ewwel darba se tittella’ fl-MFCC f’Ta’ Qali. L-avveniment se jixxandar ukoll fuq l-istazzjonijiet kollha tat-televiżjoni lokali.

L-organizzaturi spjegaw li l-post il-ġdid se jiftaħ opportunitajiet ġodda u eċitanti għall-avveniment, filwaqt li jagħmilha wkoll aktar aċċessibbli u ċentrali għall-viżitaturi.

“Il-bżonnijiet u l-fondi meħtieġa biex Id-Dar tal-Providenza tkompli topera qegħdin dejjem jiżdiedu, u li nsibu modi kif intejbu l-isforzi tagħna ta’ ġbir ta’ fondi huwa essenzjali. Id-Dar tal-Providenza teħtieġ madwar €7.5 miljun fis-sena biex tiżgura l-aħjar kwalità ta’ ħajja possibbli għar-residenti tagħha.”

Sa mit-twaqqif tagħha fl-1965, Id-Dar tal-Providenza offriet servizzi residenzjali personalizzati għal persuni b’diżabilità, f’ambjent ta’ sapport. Illum id-Dar tilqa’ fiha 115-il resident. Id-Dar toffri wkoll servizzi ta’ respite lill-familji ta’ persuni b’diżabilità.

Is-sena li għaddiet, waqt il-BOV Volleyball Marathon inġabret is-somma rekord ta’ €632,153. Dan ir-riżultat ħeġġeġ lill-organizzaturi biex joħolmu akbar u jaħdmu għal suċċess akbar ta’ din l-edizzjoni.

“Id-Dar temmen li tista’ tistrieħ fuq l-appoġġ kontinwu tal-Maltin u l-Għawdxin, li l-imħabba tagħhom lejn Id-Dar tal-Providenza se tkompli tgħin biex dan l-avveniment ikun suċċess sena wara sena.”

L-applikazzjonijet għall-plejers issa huma miftuħin. Min jixtieq japplika bħala plejer biex jilgħab fil-BOV Volleyball Marathon jista’ japplika fuq https://tinyurl.com/volley4dtp-players2026

 

Is-somma sabiħa ta’ €4,300 inġabret waqt il-wirja annwali ta’ karozzi klassiċi u vintage organizzata mill-Old Motors Club b’risq id-Dar Tal-Providenza. L-avveniment, li sar fil-festa pubblika ta’ San Ġużepp, sar fil-parkeġġ tad-Dar fis-Siġġiewi u għalih attendew għadd kbir ta’ viżitaturi u dilettanti tal-karozzi.

Madwar 140 vettura klassika u vintage, li jkopru aktar minn seklu ta’ storja tal-karozzi, ġew esebiti mill-membri tal-klabb f’atmosfera sabiħa.

Id-Direttur tad-Dar tal-Providenza, Mons. Martin Micallef, esprima l-apprezzament sinċier tiegħu, u rringrazzja lill-organizzaturi, il-parteċipanti u lill-pubbliku ġenerali għall-ġenerożità u l-appoġġ kontinwu tagħhom.

Il-Membru Parlamentari tal-Parlament Ewropew, Dott. Peter Agius żar l-attività, ltaqa’ mad-dilettanti u għamel id-donazzjoni tiegħu għall-istess kawża.

Il-klabb reġa’ kkonferma l-impenn tiegħu li jkompli jappoġġja lid-Dar Tal-Providenza u inizjattivi oħra ta’ karità, filwaqt li jkompli jippromwovi l-wirt rikk tal-motoring f’Malta.

Is-somma ta’ €2,125 inġabret waqt il-Kunċert Vokali u Strumentali mill-banda tal-Forzi Armati ta’ Malta f’għeluq is-60 anniversarju tad-Dar tal-Providenza li sar fil-Katidral Metropolitan ta’ San Pawl fl-Imdina nhar il-Ġimgħa, 28 ta’ Novembru 2025.

Il-preżentazzjoni saret mill-Kmandant tal-Forzi Armati ta’ Malta, l-Brigadier Clinton J. O’Neill lid-Direttur tad-Dar tal-Providenza, Mons. Martin Micallef li rringrazzja lill-Brigadier għax sena wara l-oħra l-banda tal-Forzi Armati baqgħet tagħmel dan il-kunċert b’risq id-Dar marbut mal-Jum Internazzjonali tal-Persuni b’Diżabilità.

Għall-okkażjoni tas-60 anniversarju inkitbu żewġ siltiet mużikali li ndaqqu għall-ewwel darba: 60 Sena ta’ Storja: Id-Dar tal-Providenza tas-Surmast Nicholas Vella u Tama tas-Surmast Antoine Mercieca. Il-programm kien jinkludi wkoll xogħlijiet ta’ Johann Sebastian Bach, Richard Wagner, Frank Erickson, Lowell Mason, Morten Lauridsen, Peter A. Yon, Stephen Adams, Carl Coberg u tal-kompożitur Malti Tano Monseigneur.