Bażar kbir tal-Milied b’risq id‑Dar tal-Providenza fis-Siġġiewi bejn il-Ġimgħa tmienja u l‑Ħadd għaxra ta’ Novembru, mid-disgħa ta’ filgħodu sal-erbgħa ta’ waranofsinhar. Ikun hemm bosta oġġetti kemm ġodda, kif ukoll użati, bħal kotba, ħwejjeġ, pjanti, affarijiet tal‑kċina, dekorazzjonijiet u oġġetti antiki.
Narawkom. V.O/1066
Nhar il-Ħadd, 27 ta’ Ottubru, 2024, inġabru €6,478 f’Bike Ride organizzata mid-Dipartiment tax-Xogħlijiet Pubbliċi b’risq id-Dar tal-Providenza. Aktar minn 150 ċiklist ħadu sehem f’din l-attività li bdiet f’Ta’ Qali f’rotta li għaddiet minn taħt l-arkati storiċi tal-Imdina li jagħtu għall-pont ta’ Gomorino u lura lejn Ta’ Qali.
Il-Bike Ride kellha l-appoġġ ta’ Polti-Kometa li, f’kollaborazzjoni ma’ Visit Malta, kienu strumentali għall-promozzjoni tal-attività u l-għoti ta’ fliexken tal-ilma liċ-ċiklisti kollha. Sponsors oħra kienu Farsonsdirect, Maypole and Gaetano Mifsud Limited.
Transport Malta, il-Pulizija ta’ Malta u l-Malta Red Cross żguraw is-sigurtà taċ-ċiklisti matul it-triq.
L-Altezza Rjali Tiegħu l-Prinċep Edward, Duka ta’ Edinburgh, l-Erbgħa waranofsinhar żar id-Dar tal-Providenza fis-Siġġiewi, fejn iltaqa’ ma’ paraatleti Maltin. Waqt din iż-żjara sinifikanti, id-Duka ltaqa’ wkoll mar-residenti tad-Dar, impjegati, voluntiera, tfal tal-iskola u diversi komunitajiet sportivi.
Mal-wasla tiegħu, l-Altezza Rjali Tiegħu ġie milqugħ minn Dun Martin Micallef, Vigarju Episkopali għad-Djakonija u Direttur tad-Dar tal-Providenza, flimkien mal-Prof. Joseph N. Grima, President tal-Kumitat Paralimpiku Malti u tas-Siġġiewi Rowing Club. Fost id-dinjitarji preżenti kien hemm Mons. Joseph Galea-Curmi, Isqof Awżiljarju ta’ Malta, l-Onor. Julia Farrugia, Ministru tal-Inklużjoni u s-Settur tal-Volontarjat, l-Onor. Graziella Galea, Shadow Minister għall-Inklużjoni u s-Settur tal-Volontarjat u l-Perit Julian Borg, Sindku tas-Siġġiewi.
Matul iż-żjara tiegħu, id-Duka ltaqa’ ma’ plejers mill-Malta Wheelchair Basketball u Frame Football, kif ukoll segwa wirja ta’ żfin fuq siġġu tar-roti mmexxija mis-Sinjura Pippa Roberts fis-sala prinċipali tad-Dar tal-Providenza. Huwa ltaqa’ wkoll ma’ qaddiefa, para qaddiefa u uffiċjali tas-Siġġiewi Rowing Club li jużaw il-gym tad-Dar tal-Providenza għat-taħriġ regolari tagħhom. Id-Duka ngħata tagħrif ġenerali dwar l-inklussività tal-klabb, li jġib flimkien atleti b’diżabilità fiżika, intellettwali u b’nuqqas ta’ dawl li jitħarrġu flimkien ma’ wħud mill-aqwa qaddiefa ta’ Malta.
Fi tmiem iż-żjara tiegħu, id-Duka ppresieda ċerimonja ta’ għoti ta’ ċertifikati għar-rebbieħa tal-“Kompetizzjoni tal-Iskejjel tal-Logħob Paralimpiku ta’ Pariġi 2024”, li għaliha ħadu sehem tfal tal-iskola u l-familji tagħhom. Il-kompetizzjoni laqqgħet tmien skejjel u involviet aktar minn 50 parteċipant f’ċelebrazzjoni ta’ inklussività u sport. Din kienet waħda minn diversi inizjattivi mill-Kumitat Paralimpiku Malti bil-għan li tqajjem kuxjenza u toħloq wirt għal-logħob paralimpiku ta’ Pariġi 2024. Biex tippromwovi l-impenn u l-għarfien tal-isports adattiv, il-kompetizzjoni kellha l-għan li tispira lill-edukaturi biex jippromwovu sports aktar inklużiv u tinkoraġġixxi lill-ġenerazzjoni futura biex jagħmlu impatt dejjiemi fl-iskejjel.
Il-Kumitat Paralimpiku Malti, membru sħiħ tal-Kumitat Paralimpiku Internazzjonali, huwa l-uniku korp governattiv nazzjonali rikonoxxut responsabbli mill-iżvilupp u l-promozzjoni tal-isport paralimpiku u l-parasport f’Malta u Għawdex.
Id-Dar tal-Providenza hija għaqda mhux governattiva mmexxija mill-Knisja li toffri servizzi residenzjali għal individwi b’diżabilità f’Malta. Hija tagħti s-saħħa lill-persuni b’diżabilità li jemmnu fihom infushom f’ambjent li jixbah il-familja u li jkabbar u jimmassimizza l-abbilitajiet tagħhom.
Sal-1962, il-bini li żar illum id-Duka ta’ Edinburgh serva bħala Royal Navy Rest Camp.
Ritratti: Arċidjoċesi ta’ Malta – Claire Camilleri
Il‑Ħamis 12 ta’ Settembru 2024, id‑Dar tal‑Providenza tfakkar id‑59 anniversarju tagħha. 59 sena ilu, Dun Mikiel Azzopardi, b’Lm100 f’idejh mogħtija minn mara li kienet faddlithom biex tmur fuq btala, ta bidu għad‑Dar tal‑Providenza, l‑ewwel Dar f’Malta li bdiet toffri servizzi residenzjali lil persuni b’diżabilità. Sal-lum id‑Dar tal‑Providenza għada miraklu ħaj tal‑Providenza Divina.
Illum, 59 sena wara, id‑Dar tal‑Providenza, bl‑appoġġ sħiħ tal‑poplu Malti u Għawdxi, b’għajnuna tal‑ħafna volontiera u b’appoġġ finanzjarju, minbarra fis‑Siġġiewi, għandha erbat idjar oħra fil‑komunitajiet tas‑Siġġiewi stess, Birkirkara, il‑Qawra u ż‑Żurrieq. Dawn id‑djar jospitaw madwar 115‑il persuna b’diżabilità mogħnija bir‑rispett, drittijiet u dinjità tagħhom.
Meta nħarsu lura lejn is-snin bikrin tas-sittinijiet ma nistgħux ninsew it‑tħassib inkwetanti ta’ Dun Mikiel għall‑qagħda tal‑persuni b’diżabilità li fi kliemu stess kienu moħbija u mwarrba. Kien skopra li diversi persuni b’diżabilità kienu qed jgħixu fi stat deplorevoli, tant li kienu jinħbew fil‑kantini, f’ambjenti inumani għall‑aħħar, fejn kultant l‑anqas l‑aħwa tagħhom stess ma kienu jkunu jafu bihom.
Kien hawn li nibtet fih l‑idea li jsib post li fih dawn il‑persuni jsibu ambjent fejn jgħixu ‑ ambjent li jixirqilhom u jirrispetta d‑dinjità tagħhom. Ħafna kienu dak li spjegawlu li biex jagħmel dan il‑proġett ried ħafna fondi. Imma Dun Mikiel kien jemmen bis‑sħiħ li l‑Providenza ta’ Alla hi bla limitu, bħalma bla limitu huma l‑valuri tal‑ġustizzja u s‑solidarjetà.
It-12 ta’ Settembru huwa jum li fih nirringrazzjaw lil Alla li lil Malta ta lil Dun Mikiel li welled u xettel id-Dar tal-Providenza, id-Dar, li kif kien iħobb jgħid il-mibki Mons. Arċisqof Ġużeppi Mercieca, hija d-dar ta’ kulħadd.
CF Homes, waħda mill-kumpaniji ewlenin fil-qasam tar-real estate f’pajjiżna, dan l-aħħar għamlet xogħol ta’ rinnovazzjoni u manutenzjoni f’taqsima tad-Dar tal-Providenza fis-Siġġiewi b’turija tal-impenn tagħha għal ħidma fil-komunità. Xogħol fuq numru ta’ kmamar fid-Dar beda fil-bidu tas-sajf biex dawn il-kmamar saru kemm reżistenti għal kollox kontra l-maltemp kif ukoll rinnovati għal livell għoli,
Is-Sur Clifton Cassar, Direttur ta’ CF Homes, esprima li l-kumpanija hija kburija li appoġġjat proġett sinifikanti bħal dan u qal li “huwa unur għalina li nikkontribwixxu għal din l-inizjattiva notevoli. Malta għandha tkun grata lejn Fr Martin u t-tim tiegħu fid-Dar tal-Providenza għax-xogħol imprezzabbli li jagħmlu kuljum mingħajr daqq ta’ trombi.” Huwa ħeġġeġ ukoll biex kumpaniji oħra jappoġġjaw ħidmiet simili.
Fr. Martin Micallef, id-Direttur tad-Dar tal-Providenza, estenda l-gratitudni tiegħu lil CF Homes għall-għotja ġeneruża li għamlu.
L-Arċisqof Emeritus Mons. Pawlu Cremona O.P. ħa sehem fil-pellegrinaġġ annwali għall-morda organizzat mill-Assoċjazzjoni Voluntarji Lourdes. Din is-sena għal dan il-pellegrinġġ, li sar bejn il-Ħamis 29 ta’ Awwissu u l-Ħadd l-1 ta’ Settembru 2024, attendew 175 pellegrin minn Malta u Għawdex.
Huwa kkonċelebra f’quddiesa li saret fil-Grotta ta’ Massabielle mmexxija minn Fr Martin Micallef, Vigarju Episkopali għad-Djakonija u Direttur tad-Dar tal-Providenza, assistit minn Patri Dijonisju Mintoff OFM, Direttur tal-Laboratorju tal-Paċi, Patri Jose Debono OCD, Provinċjal tat-Tereżjani u Patri Mario Sant OFM Conv. wieħed mill-patrijiet li jagħtu servizz lill-morda f’Londra.
Il-Ħadd l-1 ta’ Settembru l-Arċisqof Cremona kkonċelebra wkoll waqt il-quddiesa internazzjonali li saret fis-Santwarju ta’ Notre Dame de Lourdes li tmexxiet mill-Kardinal Enrico Feroci. Huwa ħa sehem ukoll fil-purċissjoni bis-sagrament li saret il-Ġimgħa 31 ta’ Awwissu kif ukoll f’waħda mill-purċissjonijiet tal-Aux Flambeaux li ssir kull filgħaxija fil-pjazza prinċipali ta’ quddiem is-Santwarju ta’ Lourdes.
Id-Dar tal-Providenza ssellem il-memorja għażiża ta’ Dun Anġ Seychell, fundatur tal-Fondazzjoni Nazareth. Fl-1995, Dun Anġ, ispirat minn Jean Vanier, il-fundatur ta’ l-Arche International, għażel li joffri daru stess fi-Żejtun biex fiha, flimkien miegħu jgħixu persuni b’diżabilità intellettwali.
Fit-8 ta’ Settembru 1995 waqqaf il-Fondazzjoni Nazareth biex tkun tista’ tmexxi din id-dar. Illum il-Fondazzjoni għandha erbat idjar residenzjali fiż-Żejtun.
Malta kollha llum issellem lil dan is-saċerdot li bħal Mons. Mikiel Azzopardi, iddedika ħajtu għall-oħrajn b’mod speċjali għall-persuni b’diżabilità li tant kien jirrispetta u jistma ndaqs.
Agħtih o Mulej il-mistrieħ ta’ dejjem.
Is‑somma rekord ta’ €6,700 inġabret matul BBQ tas-sajf li jsir kull sena b’risq id‑Dar tal‑Providenza organizzat minn Pierre Vella Petroni u Anne Marie Xuereb għal aktar minn dawn l‑aħħar għaxar snin.
Waqt l‑attività, Fr Martin Micallef, id‑Direttur tad‑Dar, irringrazzja l‑organizzaturi, volontiera, sponsors u lil aktar minn 100 persuni u qraba li attendew għal dan il‑BBQ għal ġbir ta’ fondi u għenu finanzjarjament għal din il‑kawża nobbli. Is‑somma miġbura se tgħin lid‑Dar tal‑Providenza li toffri residenza għal persuni b’diżabilità fl‑ispiża li għandha li tlaħħaq għal €13,000 kull jum.
L‑isponsors ewlenin kienu Prime Ltd., C. Camilleri & Sons, Ron Axisa, Welbees Naxxar, The General Soft Drinks Co. Ltd., Farsons Direct, Heir & Loom, Bristow Potteries, VCT Lighting, Provita, Rausi & Co. u Gordon Portelli ta’ Pitkali Malta.
Dan il‑BBQ ma kienx possibli li jsir mingħajr l‑għajnuna imprezzabbli tal‑familja u l‑ħbieb li għenu fil‑loġistika u fit‑tisjir.
€54,000 inġabru waqt serata speċjali ta’ arti, ikel, inbid u mużika fix‑Xara Lodge organizzata mill‑familja Zammit Tabona flimkien mal‑management tax‑Xara Collection nhar l‑Erbgha, l-10 ta’ Lulju 2024. Din l-ikla ta’ gastronomija saret b’risq Id‑Dar tal‑Providenza u kienet taħt il‑patroċinju distint tal‑Isqof Awżiljarju, Mons. Joseph Galea‑Curmi.
Mill‑2017 ‘l hawn, fis-sena 2021 ma sar xejn minħabba l-COVID-19, inġabret is‑somma totali ta’ €251,380.
F’kumment li għamlet, id‑Direttur tax‑Xara Collection, Nicola Paris irringrazzjat lil Fr Martin, Nadine Camilleri Cassano flimkien mat‑tim kollu tad‑Dar tal‑Providenza għad‑dedikazzjoni sħiħa tagħhom. Hija rringrazzjat ukoll lil dawk il‑kumpaniji li taw rigali għall‑premjijiet u lil dawk li għenu fejn tidħol loġistika u, naturalment, l‑isponsors u t‑tim tax‑Xara Collection, li ivvolontarjaw ħinhom u l-enerġija tagħhom, flimkien ma’ dawk kollha li attendew biex l‑attività segħet tkun suċċess.
Matul is‑serata, l‑mistednin kellhom għażla ta’ ikel delizzjuż u nbejjed mill‑itjeb waqt li għenu fil‑ġbir ta’ fondi għal kawża ġusta bħal din. Għat-tielet sena, kien hemm ukoll wirja tal‑arti sponsorjata minn Wibke Seifert u Seifert Systems b’xogħlijiet tal-arti minn 17-il artist Malti. Dawk preżenti setgħu japprezzaw dawn ix‑xogħlijiet tal‑arti li mill‑bejgħ tagħhom bejn 25% u 100% marru għad‑Dar tal‑Providenza. Xogħlijiet li baqgħu ma nbiegħux jinsabu esebiti fix-Xara Palace Relais & Châteaux fl-Imdina u jibqgħu għall-bejgħ għall-ġimgħat li ġejjin.
L‑isponsors ewlenin kienu l‑Mimici Foundation, l‑APS Bank, Seifert Systems, l‑Ajruport Internazzjonali ta’ Malta, The Point Shopping Mall, EY, Halmann Vella, KPMG, VJ Salomone, Camilleri Paris Mode, The Concept Stadium, General Soft Drinks, Raico, MUMN, Mavenry u Wearworks. Sponsors oħra kienu jinkludu lil Albert Camilleri (The Creatives) għall-fotografija, il-kwintett ta’ Louise Ellul Bonici, Zaffarese, JoinwellFXB, Charles Grech, Alistair Floral Design, Somm Escape, JUGS, Jimmy Vella, Master Cellar, Kontrada Wines, Stephen Cordina, MacBake, Alf Mizzi & Sons, Farsons, Mvintage Jewellery, il-Lokal, Phoenicia Malta u Iniala Hotel Valletta.
It‑tlieta u ħamsin siegħa tal‑BOV Volleyball Marathon intlaħqu f’nofsillejl tal‑Ħadd imma mhux qabel ma nġabret is‑somma ta’ €466,688.
Erbgħin plejer, li ffurmaw ħames timijiet, baqgħu jilagħbu mingħajr waqfien fi sħana qawwija. Uffiċjalment il-Maratona bdiet fis-sitta ta’ filgħaxiija tal-Ġimgha fil-preżenza tal-President ta’ Malta, Dr Myriam Spiteri Debono u baqgħet sejra minn dak il-ħin.
Fr Martin Micallef, Direttur tad‑Dar tal‑Providenza, irringrazzja lill‑poplu Malti u Għawdxi, li għal darba oħra wieġeb b’tant ġenerożità għas‑sejħa li saret biex jinġabru l‑fondi għad‑Dar, permezz tal‑Maratona tal‑Volleyball. Grazzi wkoll lill‑plejers, lill‑volontiera, lill‑membri tal‑kumitat organizzattiv, l‑isponsors kollha, l‑istazzjonijet ewlenin tat‑televixin li xandru din il‑maratona, kantanti u bands, lill‑pulizija u lil dawk kollha li b’xi mod jew ieħor għenu biex din il‑Maratona tkun suċċess.
Il-Ħadd filgħodu, l-Arċisqof Charles J. Scicluna iċċelebra quddiesa fil-kappella tad-Dar assistit minn Fr Martin u emfażizza fuq is-solidarjetà mad-Dar tal-Providenza matul il-BOV Volleyball Marathon għall-ġbir ta’ fondi tant meħtieġa. L-Arċisqof Scicluna rringrazzja lil Alla li d-Dar tal-Providenza dejjem kellha mexxejja tajba li kellhom sens kbir ta’ dak li sejjaħ caring leadership. Huwa ħeġġeġ lill-mexxejja ta’ kull strata tas-soċjetà Maltija kif ukoll il-Knisja biex ikunu mexxejja tajba għall-ġid tal-komunità tagħna.
L-Arċisqof kellu wkoll l-opportunità li jiltaqa’ mal-plejers li kienu qed jieħdu sehem u mal-voluntiera li taw sehemhom f’dawn l-aħħar tlett ijiem, uħud minnhom aktar, biex din il-maratona tkun suċċess.
Minbarra l‑erbgħin plejer li kienu l‑protagonisti ewlenin ta’ din il‑Maratona, kien hemm ukoll madwar mitejn voluntier. Kull filgħaxija kien hemm spettaklu mużikali fuq il‑palk prinċipali, ikel u xorb u logħob għat‑tfal.
Il‑Maratona xxandret b’mod dirett fuq l‑istazzjonijiet tat‑televixin ewlenin f’pajjiżna waqt li Vibe FM kien l-istazzjon tar-radju uffiċjali.
Ritratt: Bernard Cachia