“Id-Dar tal-Providenza hija s-sinjal tal-imħabba ta’ Alla” – L-Isqof Anton Teuma

L-Isqof ta’ Għawdex, l-E.T. Mons. Anton Teuma iddeskriva d-Dar tal-Providenza bħala s-sinjal tal-imħabba ta’ Alla. Huwa kien qed jagħmel l-ewwel żjara tieghu fid-Dar tas-Siġġiewi minn mindu laħaq Isqof tad-Djoċesi ta’ Għawdex f’Awwissu 2020. Huwa ikkonċelebra qudddiesa fil-kappella tad-Dar flimkien mad-Direttur, Fr Martin Micallef.

Fl-omelija tiegħu, l-Isqof Teuma qal li d-Dar tal-Providenza ma kinetx biss turija ta’ dedikazzjoni u mħabba lejn ir-residenti tagħha imma wkoll eżempju għall-Maltin u Għawdxin li ma waqfux isostnuha finanzjarjament u bil-volontarjat li ħafna jagħtu. Huwa faħħar u irringrazzja lil Fr Martin u t-tmexxija tad-Dar, il-carers u l-ħaddiema l-oħra kollha għall-għożża li għandhom għar-residenti li jieħdu ħsieb erba’ u għoxrin siegħa kuljum.

L-Isqof Teuma iltaqa’ ma’ rappreżentanza tar-residenti u l-carers tagħhom, żar il-mużew iddedikat lill-fundatur Mons. Mikiel Azzopardi kif ukoll il-qabar tiegħu. Huwa ra wkoll il-pixxina terapewtika li tintuża kuljum mir-residenti. Waħda mir-residenti ippreżentat hamper ta’ prodotti li jinħadmu mir-residenti stess fiċ-Ċentru Agrikolu San Isidor.

This post is also available in: English