Archive for category: Aħbarijiet

Grupp ta’ residenti tad-Dar tal-Providenza ħadu sehem f’Festa Għeneb organizzata mill-Kunsill Lokali tas-Siġġiewi fil-pjazza ewlenija tar-raħal nhar il-Ħadd, 26 ta’ Awwissu 2018. Huwa tellgħu stand fejn setgħu jesibixxu u jbiegħ prodotti tal-ikel li jħejju huma fiċ-Ċentru Agrikolu San Isidor. Ħbieb tad-Dar tal-Providenza wkoll tellgħu stand biex ibiegħu xorb għan-nies bil-qliegħ imur għad-Dar tal-Providenza.

Festa Għeneb hija attività kulturali biex jitkattar l-għarfien dwar l-għeneb u r-rabta tiegħu mar-raħal tas-Siġġiewi. Is-Siġġiewi huwa l-lokalità bl-akbar ammont ta’ dwieli u b’mijiet ta’ familji Siġġiwin involuti fil-proċess tal-għeneb.

Festa Għeneb, li daħlet fis-seba’ sena tagħha, ssir bil-kollaborazzjoni tad-Dar tal-Providenza u VitiMalta u tinkludi s-sehem ta’ diversi għaqdiet lokali fis-Siġġiewi. Matul l-attività jinġabru fondi b’risq id-Dar tal-Providenza li mbagħad jiġu ppreżentati waqt il-Festa ta’ Ġenerożità li ssir fl-ewwel tas-sena u tixxandar dirett fuq l-istazzjonijiet tat-TV ewlenin f’pajjiżna.

Fil-ħajja tiegħi sa issa, l-Mulej tani l-grazzja li niltaqa’ u anke naħdem ma’ ħafna nies li kienu u għadhom ta’ ispirazzjoni kbira għalija. Wieħed minn dawn il-persuni huwa John L. Peel li l-Mulej sejjaħlu għal għandu dan l-aħħar.

John kien raġel eżemplari li fis-sempliċità tiegħu għex il-mixja tal-fidi tiegħu. Żgur li ma kienx perfett imma l-qaddisin huma wkoll dawk li jgħixu l-Vanġelu fis-sempliċità tal-ħajja ta’ kuljum.

John kien ukoll raġel tal-familja. Hu ddedika ħinu u l-enerġija kollha tieghu għall-familja u għix is-sejħa taż-żwieġ b’imħabba kbira. John ħabb bla kundizzjonijiet. Kien jgħix għall-familja. Ħabb lil martu Antoinette b’imħabba kbira, ħabb lil bintu Christine u ddedika ħajtu għaliha 24 siegħa kuljum u fl-istess ħin ta l-istess imħabba u attenzjoni lil ibnu John, lil martu Angela u n-neputijiet Stephanie Anne u John Mark. Ħajtu nistgħu ngħidu li kienet innu ta’ mħabba. Imma dan l-innu tal-imħabba ma għexux biss mal-familja tiegħu imma wkoll għexu ma’ tant nies oħra li l-Mulej laqqgħu magħhom. John kien bniedem li lest jinsa lilu nnifsu biex jaħseb fl-oħrajn. Il-ġenerożità u d-dedikazzjoni kienet bla limitu u din narawha tispiċċa fil-ħidma mifruxa tiegħu ta’ volontarjat mingħajr ħafna daqq ta’ trombi. Dejjem issibu lest biex jgħin.

John nistgħu ngħidu li kien wieħed mill-veterani li ħadmu qatiegħ fis-settur tal-Persuni b’Diżabiltà f’Malta. Il-ħidma tiegħu f’dan il-qasam rat il-bidu tagħha mat-twelid tal-għażiża bintu Christine. Minn dak inhar ‘il quddiem huwa qatt ma ħares lura u baqa’ attiv u nteressat sa l-aħħar f’dak kollu li kien qiegħed jiġri f’dan is-settur. Għal tmintax-il sena sħaħ kien Chairman tal-Assoċjazzjoni Down Syndrome li matulhom ukoll kien rappreżentant tal-istess Assoċjazzjoni fuq il-Federazzjoni Maltija ta’ Organizzazzjonijiet Persuni b’Diżabiltà (MFOPD). Għal xi żmien kien ukoll President tal-istess Federazzjoni. John irrappreżenta lill-Assoċjazzjoni Down Syndrome għal diversi drabi, barra minn Malta u lill-Federazzjoni fuq il-Kumitati fi ħdan il-Kummissjoni Nazzjonali Persuni b’Diżabilità (Illum tissejjaħ il-Kummissjoni għad-Drittijiet ta’ Persuni b’Diżabiltà). John kien President Onorarju tal-Assoċjazzjoni Down Syndrome. John kien ukoll għal diversi snin membru fil-kumitat tal-Għaqda Nazzjonali Ġenituri b’Diżabilità. Barra minn dan għal bosta snin u sa ftit granet ilu kien jgħin ukoll b’ħidma volontarja fid-Dar tal-Providenza. U jekk dan ma kienx biżżejjed ma nistgħux ma nsemmux l-involviment tiegħu, ukoll fuq bażi volontarja, fir-Royal British Legion u fir-Royal Air Force Association (RAFA) fejn kien jgħin b’mod speċjali lil familji ta’ ex-servicemen biex tingħatalhom il-pensjoni u flus oħra dovuti lilhom.

Il-Papa Franġisku jgħid li l-imħabba mhix kliem, hi għemil u qadi; qadi umli, magħmul fis-skiet u fil-moħbi, kif qal Ġesù nnifsu: “idek ix-xellugija m’għandhiex tkun taf x’inhi tagħmel il-leminija” (Mt 6:3). Hekk kien John u għalhekk jibqa’ ta’ ispirazzjoni għalija.

Fr Martin Micallef
Direttur, Dar tal-Providenza

€27,300 inġabru waqt lejla gastronomika b’risq Id-Dar tal-Providenza organizzata minn Infinitely Xara Co. Ltd, li s-sidien tagħha huma l-familja Zammit Tabona. Din l-ikla, li ġiet organizzata għat-tieni sena konsekuttiva, saret f’Misraħ il-Kunsill fl-Imdina, biswit il-Kunsill Lokali tal-Imdina u bl-isfond tal-faċċata grandjuża tal-lukanda ta’ ħames stilel, The Xara Palace Relais & Chateaux. Infinitely Xara organizzat ikla ta’ ħames korsi akkumpanjata b’inbejjed differenti. Iktar minn €55,000 inġabru f’dawn is-sentejn.

L-ikla saret taħt il-patroċinju tal-E.T. Monsinjur Joe Galea Curmi, l-Isqof Awżiljarju Elett ta’ Malta. Kienu preżenti wkoll l-Arċisqof Emeritus Mons Pawl Cremona O.P. u Fr Martin Micallef, id-Direttur tad-Dar tal-Providenza.

Diversi persuni attendew din is-serata minn kumpaniji stabbiliti li taw id-donazzjonijiet tagħhom lid-Dar tal-Providenza. Il-kumpaniji ewlenin tas-serata kienu Diamonds International, EY, Francis J. Vassallo & Associates Group, GSD Marketing Ltd, Halmann Vella Ltd, KRS Releasing Ltd, Malta International Airport, PWC, Raico, Seifert Systems Ltd, The Point Shopping Mall, VJ Salomone Marketing Ltd u l-Kunsill Lokali tal-Imdina.

Ringrazzjament speċjali jmur għand dawk in-nies kollha li taw sehemhom matul din l-attività ta’ ġbir ta’ fondi, il-ħaddiema, il-voluntiera, l-isponsors u d-donaturi tal-arti li nbigħu waqt is-serata.

Waqt ikla li saret bil-għan li tiġbor fondi u li saret f’Dar il-Kaptan, fl-Imtarfa, Rotarian Bryan Sullivan, President tar-Rotary Club La Valette Malta 2017-2018, ippreżenta lil Fr Martin Micallef, Direttur tad-Dar tal-Providenza bil-‘Paul Harris Recognition Award’. Dan ingħata b’turija ta’ apprezzament għal ħidma li tagħmel id-Dar.

F’kelmtejn tal-okkażjoni, Rotarian Sullivan qal li “huwa l-pjaċir tagħhom li jagħrfu l-irwol li d-Dar tal-Providenza għandha biex tagħmel id-differenza fil-komunità.”

L-10 edizzjoni tal-Maratona ta’ 53 siegħa ta’ Volleyball b’risq id-Dar tal-Providenza li qed issir bl-appoġġ tal-Marigold Foundation – BOV in the Community kienet inawgurata uffiċjalment mill-E.T. Marie-Louise Coleiro Preca, President ta’ Malta. Hija żaret id-Dar tal-Providenza fis-Siġġiewi fejn kienet milqugħa minn Fr Martin Micallef id-Direttur tad-Dar, ir-residenti, kif ukoll mis-Sinjura Elvia George, Chief Finance Officer tal-Bank of Valletta li hija wkoll membru fuq il-Bord tal-Marigold Foundation – BOV in the Community.

Preżenti għall-inawgurazzjoni kien hemm preżenti fost oħrajn l-Onor. Anthony Agius Decelis, Segretarju Parlamentari għad-Drittijiet tal-Persuni b’Diżabilità u Anzjanità Attiva, is-Sur Clifton Grima, Segretarju Parlamentari għaż-żgħażagħ, Sport u Organizazzjonijiet Volontarji kif ukoll Dr Maria Deguara, kelliema tal-Oppozizzjoni għad-Drittijiet tal-Persuni b’Diżabilità u Anzjanità Attiva.

Fr Martin Micallef beda l-indirizz qasir tiegħu billi rringrazzja l-voluntiera għall-appoġġ tagħhom matul is-sena kif ukoll lill-plejers li mhux biss jipparteċipaw fil-maratona imma wkoll jagħmlu xahrejn intesivi ta’ taħriġ sa kemm jintgħażlu t-timijiet li jkunu se jidħlu għal din l-isfida.

“Din il-maratona tistrieħ fuq sisien għeżież wisq għalina jiġifieri s-solidarjetà u l-isport. L-ispirtu altruistiku ta’ kull min hu involut jiddi tul din l-attività u juri li fejn hemm ir-rieda nistgħu naslu. Aħna nħossuna komossi quddiem l-appoġġ tal-poplu Malti u Għawdxi sena wara l-oħra.”

Fr Martin spjega kif evolviet id-Dar u qal li l-proġett il-kbir ta’ din is-sena se jkun il-ftuħ ta’ dar oħra fil-Balluta kif ukoll proġett ta’ rinovazzjoni ġewwa Dar Żerniq li kienet l-ewwel dar fil-komunità.”

Is-Sinjura Elvia George kompliet fuq dak li qal Fr Martin u qalet li “Il-Fondazzjoni Marigold ilha taħdem fil-qrib mad-Dar tal-Providenza se mit-twaqqif tagħha ħames snin ilu. Il-ħidma ta’ kuljum hija biċċa xogħol inkredibbli, aħseb u ara li tinvesti f’faċilitajiet ġodda u ssostniehom. Mandakollu dan hu neċessarju mhux biss għar-residenti tad-Dar imma wkoll għal dawk li jkollhom bżonn residenza għal żmien qasir. Tul is-snin, id-Dar baqgħet tgħożż il-valuri vera tal-Fundatur tagħha u verament toffi ambjent ‘ta’ familja’ li min ikollu bżonn is-servizzi residenzjali tagħha.” Hija temmet tgħid li d-Dar tal-Providenza hija eżempju għal dak li l-Marigold Foundation – BOV in the Community teżisti għalih iġifieri li tagħti lill-għaqdiet mhux governattivi pjattaforma biex itejbu l-ħidma tagħhom.”

L-E.T Marie-Louise Coleiro Preca esprimiet is-sodisfazzjon tagħha għall-mod kif il-pajjiz kollu kapaċi jingħaqad flimkien biex jgħin lid-Dar tal-Providenza is-sena kollha imma b’mod partikulari waqt din l-attività annwali.” Hija kompiet tgħid li,“Ħamsin sena wara, din id-Dar għadha xhieda ħajja tal-viżjoni tal-Fundatur Mons. Mikiel Azzopardi. Illum il-ġurnata id-Dar għad għandha rwol importanti li tipprovdi lir-residenti tagħha d-dinjità u l-inklużjoni li jixirqilhom biex jgħixu ħajjithom fil-milja kollha tagħha.”

Il-Maratona li qed tinżamm fil-parkeġġ tad-Dar stess fis-Siġġiewi tasal fi tmiemha l-Ħadd l-1 ta’ Lulju.

Filwaqt li wieħed ikun qed jissapportja l-plejers li qed jidħlu għal din l-isfida wieħed jista’ wkoll igawdu minn spettaklu tal-aqwa talent mużikali Malti. Il-Ġimgħa se ddoqq il-Banda tal-Forzi Armati ta’ Malta, kantanti lokali kif ukoll il-Band ta’ Kersten Graham. Is-Sibt filgħaxija l-Banda tal-Pulizija se ttellgħa spettaklu mużikali bil-parteċipazzjoni ta’ kantanti lokali filwaqt li l-Ħadd se jkun hemm spettaklu mużikali mill-Band popolari The Crowns sa ma tiġi fi tmiemha l-maratona mat-tokki ta’ nofsillejl.

Din is-sena, se jerġa’ jkollna big screen għal min ikun irid isegwi wkoll il-logħob tat-Tazza tad-Dinja. Ma jonqsux ukoll stalls b’ikel għall-gosti ta’ kulħadd.

Il-Maratona qed tixxandar b’mod dirett fuq l-istazzjonijiet prinċipali tat-televiżjoni: TVM, TVM2, NET u One.

Il-kontribuzzjonijiet jistgħu jsiru permezz tat-telefon fuq in-numru 51702012 għal donazzjoni ta’ €15, fuq in-numru 51802013 għal donazzjoni ta’ €25 u fuq in-numru 51902070 għal donazzjoni ta’ €50. Donazzjoni ta’ €6.99 tista’ ssir billi jintbagħat SMS vojt fuq 50618944. L-abbonati tal-BOV Mobile Pay jistgħu jagħmlu d-donazzjoni tagħhom ukoll permezz tan-numru 79324834. Se jkun hemm ukoll pledge line bin-numru 2146 1537.