Archive for category: Aħbarijiet

“L-inklużjoni ta’ persuni b’diżabilitajiet, fil-livelli kollha tas-soċjetà, hija parti sħiħa mill-impenn biex inħaddnu l-valuri demokratiċi, u nissalvagwardjaw id-drittijiet umani universali.” Dan kien wieħed mill-messaġġi li wasslet il-President ta’ Malta, Marie-Louise Coleiro Preca meta għamlet id-diskors tal-ftuħ fil-konferenza “Every Life Matters” fil-Grand Hotel Excelsior. Il-Konferenza kellha l-għan li tqajjem għarfien dwar l-inklużjoni u t-theddid li jiffaċċjaw persuni b’diżabiltajiet, li ħajjithom hija mhedda sa mill-bidu tagħha fil-ġuf.

Il-President qalet li huwa essenzjali għalina li dejjem nippromwovu, nipprijoritizzaw u nipproteġu id-dinjità intrinsika tal-persuna umana. Dan huwa meħtieġ speċjalment f’dan iż-żmien meta pajjiżna għaddej minn tibdiliet storiċi fl-isfera ta’ leġislazzjoni u politika li jittrattaw oqsma sensittivi ta’ kura riproduttiva. Hija qalet li temmen li hu meħtieġ li l-professjonisti kollha tagħna, l-attivisti tas-soċjetà ċivili, l-awtoritajiet nazzjonali kif ukoll membri tal-komunitajiet milquta, jieħdu sehem fi djalogu rispettabbli fuq kwistjonijiet ta’ etika daqshekk importanti.

Il-President għamlet referenza għall-individwi u familji li kellhom esperjenzi personali ta’ xi jfisser tgħix b’diżabiltajiet u li kellhom l-opportunità jagħtu din ix-xhieda fil-konferenza u qalet: “Intom l-esperti ta’ ħajjitkom u hija ir-responsabbiltà tagħna li nagħtu widen għall-ħtiġijiet u l-aspirazzjonijiet tagħkom.”

F’diskors ta’ merħba, Fr Martin Micallef, Direttur tad-Dar tal-Providenza, qal li f’dawn l-aħħar ħamsin sena, bis-saħħa ta’ pijunieri fil-qasam tal-persuni b’diżabilità, il-persuni b’diżabilità għamlu kisbiet kbar f’dak li huma drittijiet, inklużjoni soċjali u servizzi u ta’ dan għandna għalfejn inħossuna kburin għalkemm għad baqa’ ħafna x’isir. Dan kollu hu frott ta’ żieda fl-għarfien tad-dinjità li għandhom iġawdu l-persuni d’diżabilità bħala ċittadini ndaqs.
Fr Martin qal li din il-konferenza għandha l-iskop li tisfidana biex naħdmu lkoll bħala soċjetà biex nieqfu nħarsu lejn id-differenza bħala xi theddida imma bħala xi ħaġa li tagħnina. “Irridu nieqfu nħarsu lejn il-bniedem minn lenti li tqis kemm kapaċi jipproduċi u kemm kapaċi jitla’ l-iskaluni tas-suċċess. Irridu nħarsu lejn kull bniedem bħala uniku, irripetibbli, u prezzjuż – għani fl-umanità u fl-ispiritwalità; irridu nħarsu lejn kull bniedem fid-dawl mhux tant ta’ kemm għandu valur imma bħala xi ħadd li jgawdi dinjità inkalkulabbli. Soċjetà vera titkejjel biss mir-rispett li bih tħares lejn kull persuna.”
“Aħna, li nemmnu li Every Life Matters, inweġġgħu meta niltaqgħu ma’ ġenituri li qed jistennew tarbija u li forsi jiffaċċjaw riskji minħabba l-età jew raġunijiet oħra, li jaqsmu magħna l-esperjenzi tagħhom dwar il-pariri li jkunu ingħataw minn ginekoloġi, professjonisti jew nies oħra biex jagħmlu t-testijiet meħtieġa ħalli, jekk jirriżulta xi ħaġa, ‘iħaddmu rashom’.”
Fr Martin temm jgħid li “aħna, li nemmnu li Every Life Matters, nixtiequ nibqgħu ngħixu f’soċjetà li tgawdi minn leġiżlazzjoni li tħares dejjem id-dritt tal-ħajja f’kull stadju tagħha bla ma tagħżel min għandu jgħix jew imut.”

Kien hemm żewġ diskorsi ewlenin. L-ewwel wieħed mill-Prof Carmen Martinez Cue tal-One of Us Federation li iffokat fuq l-avvanzi u riċerki ġodda fit-trattament ta’ persuni bid-Down Syndrome. Prof Martinez Cue hija Associate Professor tal-Farmakoloġija fil-Fakultà tal-Mediċina fl-Università ta’ Cantabria fi Spanja. Wara kien hemm intervent minn Dr Domenico Coviello dwar l-aspetti mediċi u etiċi fl-għażla u fl-eżaminar qabel it-twelid tal-embrijun. Dr Coviello huwa bħalissa d-Direttur tal-Laboratorju tal-Ġenetika Umana fl-Isptar Galliera f’Genoa fejn ilu minn Marzu 2010.

Saru testimonjanzi minn Joeanne Xerri u Vanessa Portanier, żewġ ommijiet li qed irabbu tfal b’diżabilità kif ukoll minn Amy Camilleri Zahra li għandha diżabilità.

Id-diskors tal-għeluq sar minn Mons Charles Cordina, Vigarju Episkopali għad-Djakonija fl-Arċidjoċesi ta’ Malta.
Il-konferenza “Every Life Matters” kienet organizzata mill-Life Network Foundation Malta u Id-Dar tal-Providenza bil-kollaborazzjoni tal-One Of Us Federation u LeJeune Foundation.

Il-liturġija tal-Ġimgħa Mqaddsa kienet iċċelebrata fid-Dar tal-Providenza kemm għar-residenti u l-ħaddiema kif ukoll il-pubbliku in ġenerali.

Iċ-ċelebrazzjonijiet bdew bil-festa tal-Madonna tad-Duluri b’żewġ quddisiet fil-Kappella tad-Dar kif ukoll bit-tberik tar-rappreżentazzjoni tal-Ġimgħa l-Kbira fis-Sala San Pawl. Komplew bit-tifkira ta’ Ħadd il-Palm, il-quddiesa ta’ Ħamis Ix-Xirka bil-ħasil tar-riġlejn, iċ-ċelebrazzjoni tat-tifkira solenni tal-Passjoni tal-Mulej fil-Ġimgħa l-Kbira u fl-aħħarnett bit-tifkira solenni tal-qawmien mill-mewt ta’ Sidna Ġesù Kristu.

Għall-ħaddiema saru żewġ korsijiet qosra ta’ Eżerċizzi Spiritwali. Bil-Malti minn Dun Karm Mercieca u bl-Ingliż minn Fr Conrad Grech, Ġiżwita.

Il-paċi ta’ Kristu Rxoxt tkun magħkom ilkoll.

Il-Banda tal-Korp tal-Pulizija, taħt it-tmexxija tas-Supretendent Anzjan Mro. Anthony Cassar, se ttella’ ‘La Passione di Cristo’, kunċert ta’ mużika sagra. Il-kunċert se jsir fil-Katidral Metropolitan ta` San Pawl, fl-Imdina, nhar is-Sibt 24 ta` Marzu 2018 fit-8.00pm. Il-kunċert, li huwa mżewwaq bi ħsibijiet għal żmien il-Ġimgha Mqaddsa, se jkun taħt il-patroċinju distint tal-President ta’ Malta, Marie-Louise Coleiro Preca.

Jieħdu sehem l-Amadeus Chamber Choir, il-Malta Police Pipe Band, mużiċisti mistiedna flimkien mas-sopran Ruth Sammut Casingena, it-tenur Brian Cefai, l-organista Chris Rolè u l-arpista Esmeralda Galea Camilleri.

Il-Kunċert se jsir b`kollaborazzjoni mal-uffiċċju tal-President, il-Kapitlu Metropolitan tal-Katidral tal-Imdina, il-Kunsill Lokali tal-Imdina, Id-Dar tal-Providenza u l-Korp tal-Pulizija.

Il-biljetti li jingħataw għal donazzjoni ta’ €10 b`risq Id-Dar tal-Providenza. jistgħu jinkisbu mill-Media Centre/RTK fi Blata l-Bajda, fl-uffiċċju tad-Dar tal-Providenza fil-Belt eżatt wara s-suq il-ġdid, mir-Reception Desk tal-Kavallier ta’ San Ġakbu jew mir-Reception Desk tad-Dar tal-Providenza fis-Siġġiewi.

Il-kunċert tant mistenni imsejjaħ “Festa ta’ Ġenerożità” bil-għan li jinġabru fondi b’risq id-Dar tal-Providenza sar nhar il-Ħadd, 25 ta’ Frar fil-La Vallette Social Centre u kien suċċess akbar mis-soltu kemm fil-ġbir ta’ flus kif ukoll fil-varjetà provduta.
Din kienet it-tieni darba li sar dan il-kunċert li s-sena l-oħra sar fil-Ħamrun Club. Il-kumitat u l-volontiera ta’ La Valette Social Centre jixirqilhom kull tifħir u ringrazzjament għax-xogħol li għamlu fis-sala u fil-kċina. Is-sala kellha dehra tassew eleganti!
L-istess jista’ jingħad għall-għadd sabiħ ta’ artisti u kantanti, fosthom il-kor popolari MCA, għall-professjonaliżmu tagħhom kif ukoll għall-fatt li taw sehemhom mingħajr ħlas. Il-varjetà baqgħet sejra għal aktar minn erba’ siegħat.
Mistednin speċjali għas-serata kienu id-Deputat Kummissarju Għoli għal Malta, Ms Denise Demicoli, is-Sur Emanuel Camilleri, President tal-Maltese Community Council ta’ NSW, is-Sinjura Antoinette Caruana, President tal-La Vallette Social Centre u l-isponsor ewlieni tal-attività, is-Sur George Vella ta’ Breakaway Travel, Blacktown.
Kienet ħaġa sabiħa tara r-rappreżentanti ta’ Assoċċjazzjonijiet Maltin fi NSW. Il-ġenerożità tal-poplu Malti kienet evidenti u meta saret is-sejħa għad-donazzjonijiet wieħed seta’ jara serbut ta’ nies jitfgħu l-envelope bil-flus.
Iċ-Chocolate Wheel taħt is-superviżjoni ta’ Bill Schembri, kienet attrazzjoni kbira. Ringrazzjament għandu jmur lil Agnese u Greg Cardona għax kienu l-mutur wara l-organizzazzjoni tal-bejgħ tal-biljetti.
F’isem The Friends of Providence House NSW apprezzament u grazzi mill-qalb imorru lil dawk kollha li attendew. Grazzi kbira wkoll lill-isponsors, Breakaway Travel, Minchinberry Fruit Market u Zammit Ham & Bacon Curers. Ta min isemmi l-appoġġ li kien hemm mid-‘The Voice of the Maltese’ u l-istazzjonijiet tar-radju 2GLF, SWR FM u WOW FM kif ukoll lil dawk li b’xi mod jew ieħor taw l-għajnuna tagħhom.
Sa issa is-somma li nġabret laħqet it-$8,000. Madankollu, l-organizzaturi għadhom jilqgħu għotjiet li jistgħu isiru direttament lil: The Friends of Providence House NSW, CBA Bank, BSB: 062416 Account No: 10199448. Jista’ wkoll jiġi ikkuntattjat Jim Borg fuq 9636 7767.

(Rapport minn Jim Borg u Marisa Previtera)

Il-Proġett
Il-Medina Foundation for Music għandha l-pjaċir tippreżenta l-aħħar xogħol ta’ Mro. Mark Agius, il-Messa Da Requiem (2017) li se tiġi ppreżentata għall-ewwel darba fis-16 ta’ Marzu 2018 fil-Kon-Katidral ta’ San Ġwann mis-St Paul Chamber Ensemble, waħda mill-aħjar orkestri f’Malta.
Il-Messa Da Requiem hija xogħol bi tmien movimenti: L-Introjtu, il-Kyrie, is-Sekwenza Dies Irae (li hija maqsuma fi tmien movimenti oħra), is-Sanctus, l-Agnus Dei, Pie Jesu, Libera Me u In Paradisum. Hija miktuba għall-orkestra, erba’ solisti u l-Kor SATB li fih se jieħdu sehem is-solisti Karen Gatt Darmenia (Sopran), May Caruana (Kontralto), Charles Vincenti (Tenur) u Ivan Vella (Baritonu) flimkien mal-kor Rotondo li ġej minn Poznan, fil-Polonja.
L-isfond tal-Produzzjoni
Il-Medina Foundation for Music, li twaqqfet fl-2015, hija organizzazzjoni reġistrata, indipendenti, mingħajr qliegħ f’Malta u l-għanijiet tagħha huma li tinkoraġġixxi u tiffaċilita l-iżvilupp mużikali professjonali u għarfien kulturali u fl-istess waqt tippromwovi il-viżjoni ta’ Malta bħala ċentru ta’ attivitajiet kulturali u edukattivi għar-reġuni kollha tad-dinja partikolarment ir-reġjun Ewro-Mediterran. Fuq kollox, il-Medina Foundation for Music temmen fit-tkabbir ta’ kultura ta’ kreatività, innovazzjoni, intraprenditorija, eċċellenza u flessibilità sostnuti bil-valuri ta’ mpenn, dedikazzjoni u integrità. Il-Programm tal-Fondazzjoni jitwettaq mis-St Paul Chamber Ensemble.
Għal aktar informazzjoni żur il-website: www.medinafoundationformusic.com
X’hemm speċjali f’din il-produzzjoni?
Dan l-avveniment kulturali huwa opportunità unika għall-udjenza biex tkun parti minn esperjenza mużikali f’wieħed mill-aktar siti storiċi prestiġjużi f’Malta, il-Kon-Katidral ta’ San Ġwann u fl-istess waqt tappoġġja kawża filantropika.
Il-produzzjoni hija adatta għall-pubbliku in ġenerali, l-aktar dawk li japprezzaw mużika klassika sagra u msaħħa minn Chamber Ensemble kbir li jkollu jieħdu sehem miegħu erba’ solisti u kor minn Poznan fil-Polonja flimkien ma’ kantanti mistiedna oħra Maltin.
Din se tkun ukoll okkażjoni li fiha dan ix-xogħol, li huwa l-aħħar kompożizzjoni ta’ Mro Mark Agius, jinstema’ għall-ewwel darba.
X’inhu l-għan ta’ dan il-proġett?
Dan il-proġett għandu għan doppju. Primarjament, biex jippromwovi talent Malti waqt li joħloq esperjenza trans-kulturali permezz ta’ kollaborazzjoni ma’ wieħed mill-aqwa korijiet f’Poznan u fl-istess waqt joffri din l-esperjenza kulturali lill-pubbliku in ġenerali. It-tieni għan huwa li dan l-avveniment se jsir b’risq id-Dar tal-Providenza li tiddependi għal kollox fuq il-ġenerożità tal-benefatturi u donazzjonijiet mill-pubbliku biex taqdi il-missjoni tagħha. Il-biljetti tad-dħul, li se jmur kollu għad-Dar tal-Providenza, se jinbiegħu bil-prezz raġjonevoli ta’ 10 euro.
Għaliex il-crowdfunding?
Is-St Paul Chamber Ensemble iħabrek biex iżomm livelli ta’ eċċellenza mużikali. Madankollu, proġetti bħal dawn iridu jaraw kif jitħallsu l-ispejjeż meħtieġa għall-kiri tal-lokal, provi u l-ħlas żgħir li jingħata lil dawk li jieħdu sehem. Nemmnu li crowdfunding huwa metodu effettiv li bih individwi u gruppi li jemmnu fil-prinċipji tal-Media Foundation for Music kif ukoll ħidmiet oħra fi ħdan is-St Paul’s Chamber Ensemble jistgħu ikunu nvoluti direttament u personalment fil-pjattaformi edukattivi, kulturali u filantropiċi tagħha.
Napprezzaw l-appoġġ tiegħek biex niffinanzjaw din l-inizjattiva filantropika permezz ta’ sponsorships u donazzjonijiet. Jekk jogħġbok idħol fil-crowdfunding website tagħna: http://www.zaar.com.mt/projects/messadarequiem biex tara il-vidjow promozzjonali, tixtri l-biljetti jew tagħmel donazzjoni.
Kumpaniji interessati li joffru s-servizzi tagħhom, bħal stampar u reklamar huma mistiedna jikkuntattjaw il-fondazzjoni fuq: orchestra@medinafoundationformusic.com