Archive for category: Aħbarijiet

L-10 edizzjoni tal-BOV Marigold Volleyball Marathon b’risq Id-Dar tal-Providenza ġiet imnedija uffiċjalment aktar kmieni llum. Il-maratona ta’ 53 siegħa se tibda nhar il-Ġimgħa 29 ta’ Ġunju fis-18.30 fil-parkeġġ tal-karozzi tad-dar residenzjali u se tiġi fi tmiemha fil-23.30 ta’ nhar il-Ħadd l-1 ta’ Lulju.

Il-konferenza stampa ġiet indirizzata mis-Sinjura Michelle Muscat, Chairperson tal-Fondazzjoni Marigold – BOV fil-Komunità u minn Fr Martin Micallef, id-Direttur tad-Dar tal-Providenza. Huma kienu akkompanjati mis-Sa Elvia George, Uffiċjal Kap Finanzjarju fil-Bank of Valletta u mis-Sur Emanuel Zammit, Chairperson tal-Kumitat Organizzativ tal-Maratona.

Fr Martin qal li, “Il-Maratona hija avveniment annwali ta’ ġbir ta’ fondi b’risq Id-Dar tal-Providenza li verament ipoġġi fuq quddiem l-altruwiżmu tal-Maltin u l-Għawdxin. F’din il-maratona wieħed jista’ jara l-ispirtu sportiv u l-volontarjat jaħdmu flimkien id f’id bl-għan waħdieni li jinġabru l-fondi biex jiġi żgurat li din id-Dar tkompli toffri ambjent bħal ta’ familja għar-residenti tagħha, li issa jlaħħqu l-115”. Huwa kompla jispjega li, “Il-missjoni tad-Dar dejjem kienet dik li tintegra lir-residenti tagħha kemm jista’ jkun possibbli fil-fibra soċjali tas-soċjetà Maltija, għan li qed jintlaħaq primarjament permezz tat-twaqqif ta’ djar f’lokalitajiet differenti. Hawnhekk ir-residenti jista’ jkollhom ħajja aktar indipendenti bl-appoġġ kollu li jeħtieġu.” Fr Martin esprima l-gratitudni tiegħu lejn il-pubbliku li dejjem qam għall-okkażjoni u ta l-appoġġ tiegħu lil dan ‘ix-xogħol ta’ mħabba’, bħalma rajna reċentement matul il-programm Xarabank ta’ nhar il-Ġimgħa 8 ta’ Ġunju, meta nġabret is-somma ta’ EUR 335,293.

Fr Martin spjega li l-ispejjeż operazzjonali tad-Dar ilaħħqu EUR 12,000 kuljum. Minbarra l-ħaddiema ta’ appoġġ, id-Dar timpjega diversi speċjalisti biex jagħtu l-għajnuna meħtieġa lir-residenti, inkluż terapisti okkupazzjonali u fiżjoterapisti.

Biex tkompli mal-intervent ta’ Fr Martin, is-Sinjura Muscat spjegat lid-Dar hija unika f’termini tal-‘atmosfera ta’ familja’ li tipprovdi lill-persuni b’diżabilità li jgħixu fiha. “Matul is-snin, minn kemm il-Fondazzjoni Marigold ilha tikkollabora mad-Dar tal-Providenza, kull meta nżuru din id-Dar, dejjem inħossu li deħlin f’darna, u r-rabta bejn il-ħaddiema ta’ appoġġ, il-voluntiera u r-residenti nfushom hija tassew ġenwina.” Is-Sinjura Muscat ħeġġet lin-nies biex ikomplu jappoġġjaw lid-Dar tal-Providenza sabiex id-Dar tkun tista’ tkompli tipprovdi ambjent ta’ kura u attenzjoni għar-residenti tagħha, u tgħinhom jilħqu l-potenzjal sħiħ tagħhom.”

Is-Sa Elvia George qalet li huwa ta’ sodisfazzjon kbir għall-Bank of Valletta li qed iżomm l-appoġġ tiegħu għal dan l-avveniment permezz tal-Fondazzjoni Marigold. “Aħna ninsabu kunfidenti li l-edizzjoni ta’ din is-sena se tkun storja oħra ta’ suċċess li se tkompli tagħti xhieda tal-ġenerożità tagħna bħala nazzjon. Fil-Bank of Valletta aħna bi pjaċir nagħtu l-appoġġ tagħna biex ngħinu lil din id-Dar, li l-isem tagħha huwa sinonimu mal-ambjent ta’ mħabba u kura li tipprovdi lir-residenti tagħha, tkompli taqdi r-rwol vitali tagħha fis-soċjetà tagħna.”

Filwaqt li ffoka aktar fuq ir-rwol tal-plejers tal-volleyball, is-Sur Zammit spjega li din is-sena se jieħdu sehem aktar minn 80 plejer fuq bażi volontarja. Dawn diġà kellhom taħriġ iebes, u l-plejers finali li se jieħdu sehem fil-maratona se jitħabbru wara l-prova ta’ 24 siegħa li hija maħsuba għal tmiem il-ġimgħa li ġej. “Bħal dejjem din il-maratona tkun possibbli biss minħabba l-ġenerożità kostanti tal-armata b’saħħitha tagħna ta’ 200 voluntier li jieħdu ħsieb kollox mid-divertiment sal-istands tal-ikel u ż-żona maħsuba għat-tfal. Is-Sur Zammit qal li l-maratona nnifisha se tixxandar b’mod dirett fuq l-istazzjonijiet prinċipali tat-TV imma ħeġġeġ lill-pubbliku biex iżur id-Dar u jagħti l-appoġġ lill-plejers li se jkunu qed jilagħbu l-volleyball bla waqfien għal 53 siegħa sħaħ.

Il-BOV Marigold Volleyball Marathon se tiġi inawgurata mill-E.T. Marie-Louise Coleiro Preca nhar il-Ġimgħa 29 ta’ Ġunju fis-18.00.

Il-kontribuzzjonijiet jistgħu jsiru permezz tat-telefon fuq in-numru 51702012 għal donazzjoni ta’ € 15, fuq in-numru 51802013 għal donazzjoni ta’ € 25 u fuq in-numru 51902070 għal donazzjoni ta’ € 50. Donazzjoni ta’ € 6.99 tista’ ssir billi jintbagħat SMS vojt fuq 50618944. L-abbonati tal-BOV Mobile Pay jistgħu jagħmlu d-donazzjoni tagħhom ukoll permezz tan-numru 79324834.

Il-qligħ kollu minn kunċert li fakkar il-Ħamsin Anniversarju tal-Bank Ċentrali ta’ Malta li sar dan l-aħħar fit-Teatru Manoel ingħata bħala donazzjoni lid-Dar tal-Providenza. Il-mistednin ġew imħeġġa jagħmlu donazzjoni volontarja waqt il-kunċert b’risq id-Dar.

Il-kunċert, li sar taħt il-patroċinju tal-President ta’ Malta, Marie-Louise Coleiro Preca, kellu repertorju ta’ xogħlijiet mużikali minn Hildegard von Bingen għall-kompożitur kontemporanju żagħżugħ Malti Karl Fiorini.

Bħalma jsir kull sena, Id-Dar tal-Providenza organizzat attività biex matulha turi ir-rikonoxximent tagħha lill-għadd kbir ta’ voluntiera għad-dedikazzjoni u l-ħin tagħhom jew mar-residenti direttament jew fid-diversi oqsma tad-Dar fejn teħtieġ l-għajnuna. Din is-sena, l-attività bdiet b’quddiesa ta’ ringrazzjament minn Fr Martin Micallef, Direttur tad-Dar tal-Providenza, fil-kappella tal-iskola tas-Seminarju f’Tal-Virtù, fir-Rabat, għall-intenzjonijiet u l-bżonnijiet tal-volontiera imma ukoll b’suffraġju għal ruħ Donald Pace Bonello, wieħed mill-volontiera li miet dan l-aħħar.

Fr Martin irringrazzja lill-volontiera li b’tant imħabba u dedikazzjoni jagħtu ħinhom fid-diversi oqsma li jkun hemm il-ħtieġa tagħhom mar-residenti stess, fil-kċina, mal-ħajjata, fil-ġnien, fil-laundry, fl-amministrazzjoni u fl-uffiċċju tal-Belt. Fr Martin irringrazzja wkoll lir-Rettur u l-ammistrazzjoni tas-Seminarju li tawna l-permess nużaw il-kappella u l-canteen tagħhom għall-okkażjoni.

“L-impenn sħiħ ta’ Mons Mikiel Azzopardi wera ruħu fl-imħabba tiegħu lejn dawk emarġinati, bla vuċi, moħbija u minsija minn ħafna nies. Hu għaraf li iktar ma bniedem hu dgħajjef, iktar jeħtieġ appoġġ u għajnuna.” Dan qalu Mons Joe Galea Curmi, Vigarju Ġenerali, fl-omelija li għamel waqt Ċelebrazzjoni Ewkaristika li saret biex jitfakkar il-wieħed u tletin anniversarju tal-mewt ta’ Mons Mikiel Azzopardi, li waqqaf id-Dar tal-Providenza fl-1965.

Il-Vigarju Ġenerali kompla jgħid li Dun Mikiel ried li s-soċjetà Maltija tagħraf id-dinjità ta’ kull bniedem u għalhekk tal-persuni b’diżabilità. “Il-messaġġ ta’ Dun Mikiel,” qal il-Monsinjur Vigarju, “hu tassew attwali anke llum meta jfakkarna li l-ħajja umana irridu ngħożżuha. Quddiem il-ħajja umana, ma noqogħdux ngħoddu ċ-ċelloli biex naraw jistħoqqilhiex dinjità, ma noqogħdux niddiskriminaw bejn min jistħoqqlu jgħix u min nistgħu inħalluh għal riħu. Il-ħajja umana hi għażiża mill-ewwel mument tat-tnissil tagħha sat-tmiem naturali tagħha u t-tul kollu tagħha. Minna titlob rispett sħiħ.”

Għal din il-Quddiesa, li saret fil-kappella tad-Dar tal-Providenza, attendew għadd ta’ membri tal-Azzjoni Kattolika Maltija (AKM), residenti u ħbieb tad-Dar. Dun Mikiel twieled fil-Belt Valletta fl-10 ta’ Frar 1910 u miet fit-13 ta’ Mejju 1987. Flimkien ma’ Mons Galea Curmi, ikkonċelebraw Fr Rueben Gauci, Assistent Ekkleżjastiku taż-ŻAK u Fr Martin Micallef, Direttur tad-Dar tal-Providenza.

Fi tmiem iċ-ċelebrazzjoni, saru diskorsi qosra minn Fr Martin li irringrazzja lill-Azzjoni Kattolika Maltija għall-appoġġ sħiħ li dejjem tat u għadha tagħti lid-Dar tal-Providenza. Is-Sur Josef Deguara, President tal-AKM aċċenna għall-omelija ta’ Mons. Vigarju u tenna li l-ħajja umana irridu ngħożżuha.

Wara, dawk preżenti inġabru flimkien għal moment ta’ skiet ma’ Mons. Galea Curmi, Fr Reuben u Fr Martin u talbu madwar il-qabar ta’ Mons Azzopardi.

Omelija – 31 anniversarju mill-mewt ta’ Mons. Mikiel Azzopardi 12 ta’ Mejju 2018

Imħabba kbira lejn dawk emarġinati, bla vuċi, moħbija u minsija

“Il-Mulej kien jaħdem magħhom u jwettaq il-kelma bil-mirakli li kienu jsiru magħha.” Din l-aħħar sentenza tas-silta minn San Mark tal-Evanġelju tal-lum, li tispjega fi ftit kliem il-ħajja u l-missjoni tad-dixxipli ta’ Ġesù wara li hu tela’ s-sema, tfakkarni ħafna f’Mons. Mikiel Azzopardi li llum qegħdin infakkru l-31 anniversarju mill-mewt tiegħu.

Il-Mulej ħadem permezz ta’ Dun Mikiel fil-kelma li hu xandar għal snin b’ħeġġa u b’determinazzjoni, u l-Mulej wettaq din il-kelma b’dan il-miraklu kbir ta’ mħabba, id-Dar tal-Providenza, li dis-sena ċċelebrajna l-50 sena minn meta nfetħet l-ewwel dar tagħha. Għalhekk illum aħna nfakkru b’għożża lil dan il-qaddej tal-Mulej u nirringrazzjaw lil Alla għal dak li għamel permezz tiegħu għall-ġid tas-soċjetà Maltija.

Dun Mikiel emmen bis-sħiħ li s-sema hu pajjiżna – dak li turina l-festa tal-Mulej tiela’ s-sema. Kien jemmen li dik hi d-destinazzjoni tagħna, lil hemm mexjin, biex ’il quddiem naslu fejn wasal qabilna Ġesù fil-glorja tiegħu. Din il-fidi soda fi Kristu ħaj kienet dejjem f’qalb u f’fomm Dun Mikiel, u din il-fidi mexxietu tul ħajtu kollha.

Imma fl-istess waqt, Dun Mikiel għaraf ukoll li l-viżjoni tas-sema mhijiex aljenazzjoni – ma tħalliniex inħarsu ċċassati lejn is-sema b’idejna marbuta u nieqfu hemm – imma, il-kontra, hi xprun biex hawn, fuq din l-art naħdmu b’entużjażmu u kuljum biex ngħixu l-kelma ta’ Alla u nwasslu l-imħabba tiegħu. Għaraf li l-missjoni tagħna hi hawn, f’din id-dinja. Hawn imsejħin biex nimpenjaw ruħna f’azzjoni Kattolika. Hawn imsejħin biex naħdmu għall-ħarsien tad-dinjità tal-bniedem u nibdlu s-soċjetà għall-aħjar.

Kien dan l-impenn sħiħ ta’ Dun Mikiel li wera ruħu fl-imħabba tiegħu lejn dawk emarġinati, bla vuċi, moħbija u għalhekk minsija minn ħafna nies. Hu għaraf li iktar ma bniedem hu dgħajjef, iktar jeħtieġ appoġġ u għajnuna. Ried li s-soċjetà Maltija tagħraf id-dinjità ta’ kull bniedem, u għalhekk tal-persuni b’diżabilità wkoll. Dan kien il-mod sabiħ li bih għex din il-mixja lejn is-sema pajjiżna.

Dan hu messaġġ importanti li Mons. Azzopardi jagħti lilna lkoll miġbura hawn. Ifakkarna li aħna maħluqin biex fl-aħħar tal-mixja tagħna f’din id-dinja ningħaqdu għal dejjem ma’ Alla li hu mħabba. Ifakkarna wkoll li din il-viżjoni lilna timliena b’enerġija biex hawn, f’din il-ħajja, kull wieħed u waħda skont is-sejħa li jagħmlilna l-Mulej, nagħtu kontribut siewi lis-soċjetà.

Il-messaġġ ta’ Dun Mikiel hu tassew attwali meta jfakkarna li l-ħajja umana rridu ngħożżuha. Quddiem il-ħajja umana, ma noqogħdux ngħoddu ċ-ċelloli biex naraw jistħoqqilhiex dinjità jew le, ma noqogħdux niddiskriminaw bejn min jistħoqqlu jgħix u min nistgħu nħalluh għal riħu. Il-ħajja umana hi għażiża mill-ewwel mument tat-tnissil tagħha sat-tmiem naturali tagħha, u t-tul kollu tagħha. Minna titlob rispett sħiħ.

Meta ngħixu b’dan l-ispirtu, ġa nkunu qegħdin minn issa ngħixu l-ħajja ta’ dejjem. Inkunu qed niltaqgħu ma’ Kristu hawn, hu li qal “dak kollu li għamiltu mal-iżgħar fost dawn ħuti, għamiltuh miegħi.”. Inkunu qegħdin inħallu lil Kristu bl-ispirtu tiegħu jgħallimna l-valuri veri tal-ħajja li smajna fl-Ittra ta’ San Pawl lill-Efesin– l-umiltà, il-ħlewwa, is-sabar, l-imħabba, is-sliem.

Grazzi, Mulej, ta’ Mons. Mikiel Azzopardi. Ħa jkun għalina dejjem ispirazzjoni kif għandna ngħixu bil-viżjoni tas-sema u b’impenn sħiħ fis-soċjetà llum.

Fr Joe Galea Curmi