Archive for category: Aħbarijiet

Ftit ġranet biss ’il bogħod mit-tisfira li se tagħti bidu għall-Maratona tal-Volleyball ta’ 53 siegħa għall-avveniment annwali ta’ ġbir ta’ fondi b’risq Id-Dar tal-Providenza, grupp ta’ impjegati tal-BOV ħadu sehem f’logħba ta’ ħbiberija kontra wħud mill-plejers li se jieħdu sehem fil-maratona. Il-logħba saret fil-parkeġġ tad-Dar innifisha.

Kif spjega Emanuel Zammit, iċ-Chairperson tal-Kumitat Organizzattiv tal-Maratona, it-taħriġ għall-maratona issa jinsab għaddej fl-aqwa tiegħu b’40 plejer minn total ta’ madwar 200 voluntier jaslu fil-fażi finali, wara li fi tmiem il-ġimgħa li għadda ġie organizzat il-boot camp finali ta’ 24 siegħa. Dawn il-plejers ilhom jitħarrġu sa mill-aħħar ta’ Mejju, filwaqt li jsibu bilanċ bejn ir-reġim tat-taħriġ iebes, u l-impenji personali u tax-xogħol tagħhom.

Meta tkellmet qabel l-avveniment, Elvia George li hija kemm iċ-Chief Finance Officer tal-Bank kif ukoll membru fuq il-Bord tal-Fondazzjoni Marigold – BOV fil-Komunità qalet li, “Il-Fondazzjoni għal darb’oħra qed tagħti l-appoġġ tagħha lil din il-maratona ta’ solidarjetà. Huwa inkoraġġanti għalina li naraw lin-nies tagħna jieħdu sehem b’ħeġġa f’dan l-avveniment, li jgħin biex tinħoloq aktar kuxjenza dwar l-attivitajiet li hemm imħejjija għal dan it-tmiem il-ġimgħa fid-Dar.”

Filwaqt li rringrazzja lill-impjegati tal-BOV li ħadu sehem, Fr Martin Micallef, Direttur tad-Dar tal-Providenza esprima l-gratitudni tiegħu għal din il-wirja ta’ solidarjetà li sena wara l-oħra żżomm lid-Dar għaddejja, filwaqt li tippermetti lir-residenti jgħixu l-ħajja ta’ dinjità u inklużjoni li jixirqilhom.”

Il-Maratona tal-Volleyball se tiġi inawgurata uffiċjalment nhar il-Ġimgħa 29 ta’ Ġunju fis-18.00 mill-E.T. Marie-Louise Coleiro-Preca, President ta’ Malta.

Il-kontribuzzjonijiet jistgħu jsiru permezz tat-telefon fuq 51702012 għal donazzjoni ta’ € 15, 51802013 għal donazzjoni ta’ € 25 u 51902070 għal donazzjoni ta’ € 50. Tista’ ssir donazzjoni ta’ € 6.99 billi jintbagħat SMS vojt fuq 50618944. L-abbonati tal-BOV Mobile Pay jistgħu wkoll jagħmlu d-donazzjoni tagħhom fuq in-numru 79324834.

Is-somma sabiħa ta’ €4,000 kienet ippreżentata mill-Malta Institute of Accountants lid-Dar Tal-Providenza. Din id-donazzjoni kienet tinkludi wkoll donazzjonijiet li taw il-membri tal-istess Istitut, dan l-aħħar xahar kif ukoll somma li nġabret waqt attivita soċjali annwali mtellgħa għall-membri.

Is-Sur William Spiteri Bailey, President tal-Malta Institute of Accountants qal li jemmen li l-Istitut għandu rwol doppju fis-soċjeta. “Nemmnu li għandna numru ta’ funzjonijiet x’naqdu u minn dawn il-funzjonijiet joħroġ il-bżonn tar-rwol tagħna li nkunu qrib is-soċjeta u nidħlu għal proġetti ispirati mill-kunċett tal-ġid komuni. Din is-sena l-Istitut għażel li jappoġġa kawza nobbli mresqa lilu mill-Advocacy for Legacy dik tad-Dar Tal-Providenza.”

Fr. Martin Micallef, Directtur tad-Dar Tal-Providenza rringrazzja lill-MIA għal din id-donazzjoni ġeneruża. Huwa qal li hu ta’ pjaċir għalih li l-MIA għamlet tagħha l-kunċett li jagħti jagħti saħħa lil individwi u jappoġġjohom biex jgħixu ħajja dinjituża bil-ħolqien ta’ ambjent tajjeb għal kulħadd li jkabbar il-potenzjal u l-abilta tagħhom. Huwa rringrazzja lill-membri tal-Istitut li ħadu din l-Inizzjattiva u appoġġjaw il-kawża tagħna.

Is-Sur Jesmond Saliba, fundatur tal-A4L (Advocacy for Legacy), rringrazja lil Malta Institute of Accountants li ġentilment appoġġjaw din l-inizjattiva. Ispirata mill-prinċipju tal-ġustizzja soċjali, l-inklużjoni soċjali u r-rispett lejn id-dinjita umana, Advocacy for Legacy hi komessa li tmexxi l-quddiem l-opportunitajiet tal-ħajja kif ukoll opportunitajiet għas-soċjeta Maltija b’enfasi speċjali fuq li tagħti s-saħħa lil dawk l-aktar vunerabbli, fosthom it-tfal, mir-riskji marbutin ma’ inklużjoni soċjali biex jiġi rrealiżżat il-potenzjal u jintlaħqu l-aspirazzjonijiet tagħhom.

Caption Il-President tal-Malta Institute of Accountants (MIA) William Spiteri Bailey jippreżenta d-donazzjoni ta’ €4,000 lil Fr Martin Micallef, Direttur tad-Dar tal-Providenza. Preżenti wkoll kien hemm Ms Maria Cauchi Delia CEO ta’ l-MIA, Ms Analise Sammut, Events and Relationship Coordinator ta’ l-MIA, Ms Nadine Camilleri Cassano Amministratur tad-Dar Tal-Providenza u Jesmond Saliba Fundatur ta’ Advocacy for Legacy.

L-10 edizzjoni tal-BOV Marigold Volleyball Marathon b’risq Id-Dar tal-Providenza ġiet imnedija uffiċjalment aktar kmieni llum. Il-maratona ta’ 53 siegħa se tibda nhar il-Ġimgħa 29 ta’ Ġunju fis-18.30 fil-parkeġġ tal-karozzi tad-dar residenzjali u se tiġi fi tmiemha fil-23.30 ta’ nhar il-Ħadd l-1 ta’ Lulju.

Il-konferenza stampa ġiet indirizzata mis-Sinjura Michelle Muscat, Chairperson tal-Fondazzjoni Marigold – BOV fil-Komunità u minn Fr Martin Micallef, id-Direttur tad-Dar tal-Providenza. Huma kienu akkompanjati mis-Sa Elvia George, Uffiċjal Kap Finanzjarju fil-Bank of Valletta u mis-Sur Emanuel Zammit, Chairperson tal-Kumitat Organizzativ tal-Maratona.

Fr Martin qal li, “Il-Maratona hija avveniment annwali ta’ ġbir ta’ fondi b’risq Id-Dar tal-Providenza li verament ipoġġi fuq quddiem l-altruwiżmu tal-Maltin u l-Għawdxin. F’din il-maratona wieħed jista’ jara l-ispirtu sportiv u l-volontarjat jaħdmu flimkien id f’id bl-għan waħdieni li jinġabru l-fondi biex jiġi żgurat li din id-Dar tkompli toffri ambjent bħal ta’ familja għar-residenti tagħha, li issa jlaħħqu l-115”. Huwa kompla jispjega li, “Il-missjoni tad-Dar dejjem kienet dik li tintegra lir-residenti tagħha kemm jista’ jkun possibbli fil-fibra soċjali tas-soċjetà Maltija, għan li qed jintlaħaq primarjament permezz tat-twaqqif ta’ djar f’lokalitajiet differenti. Hawnhekk ir-residenti jista’ jkollhom ħajja aktar indipendenti bl-appoġġ kollu li jeħtieġu.” Fr Martin esprima l-gratitudni tiegħu lejn il-pubbliku li dejjem qam għall-okkażjoni u ta l-appoġġ tiegħu lil dan ‘ix-xogħol ta’ mħabba’, bħalma rajna reċentement matul il-programm Xarabank ta’ nhar il-Ġimgħa 8 ta’ Ġunju, meta nġabret is-somma ta’ EUR 335,293.

Fr Martin spjega li l-ispejjeż operazzjonali tad-Dar ilaħħqu EUR 12,000 kuljum. Minbarra l-ħaddiema ta’ appoġġ, id-Dar timpjega diversi speċjalisti biex jagħtu l-għajnuna meħtieġa lir-residenti, inkluż terapisti okkupazzjonali u fiżjoterapisti.

Biex tkompli mal-intervent ta’ Fr Martin, is-Sinjura Muscat spjegat lid-Dar hija unika f’termini tal-‘atmosfera ta’ familja’ li tipprovdi lill-persuni b’diżabilità li jgħixu fiha. “Matul is-snin, minn kemm il-Fondazzjoni Marigold ilha tikkollabora mad-Dar tal-Providenza, kull meta nżuru din id-Dar, dejjem inħossu li deħlin f’darna, u r-rabta bejn il-ħaddiema ta’ appoġġ, il-voluntiera u r-residenti nfushom hija tassew ġenwina.” Is-Sinjura Muscat ħeġġet lin-nies biex ikomplu jappoġġjaw lid-Dar tal-Providenza sabiex id-Dar tkun tista’ tkompli tipprovdi ambjent ta’ kura u attenzjoni għar-residenti tagħha, u tgħinhom jilħqu l-potenzjal sħiħ tagħhom.”

Is-Sa Elvia George qalet li huwa ta’ sodisfazzjon kbir għall-Bank of Valletta li qed iżomm l-appoġġ tiegħu għal dan l-avveniment permezz tal-Fondazzjoni Marigold. “Aħna ninsabu kunfidenti li l-edizzjoni ta’ din is-sena se tkun storja oħra ta’ suċċess li se tkompli tagħti xhieda tal-ġenerożità tagħna bħala nazzjon. Fil-Bank of Valletta aħna bi pjaċir nagħtu l-appoġġ tagħna biex ngħinu lil din id-Dar, li l-isem tagħha huwa sinonimu mal-ambjent ta’ mħabba u kura li tipprovdi lir-residenti tagħha, tkompli taqdi r-rwol vitali tagħha fis-soċjetà tagħna.”

Filwaqt li ffoka aktar fuq ir-rwol tal-plejers tal-volleyball, is-Sur Zammit spjega li din is-sena se jieħdu sehem aktar minn 80 plejer fuq bażi volontarja. Dawn diġà kellhom taħriġ iebes, u l-plejers finali li se jieħdu sehem fil-maratona se jitħabbru wara l-prova ta’ 24 siegħa li hija maħsuba għal tmiem il-ġimgħa li ġej. “Bħal dejjem din il-maratona tkun possibbli biss minħabba l-ġenerożità kostanti tal-armata b’saħħitha tagħna ta’ 200 voluntier li jieħdu ħsieb kollox mid-divertiment sal-istands tal-ikel u ż-żona maħsuba għat-tfal. Is-Sur Zammit qal li l-maratona nnifisha se tixxandar b’mod dirett fuq l-istazzjonijiet prinċipali tat-TV imma ħeġġeġ lill-pubbliku biex iżur id-Dar u jagħti l-appoġġ lill-plejers li se jkunu qed jilagħbu l-volleyball bla waqfien għal 53 siegħa sħaħ.

Il-BOV Marigold Volleyball Marathon se tiġi inawgurata mill-E.T. Marie-Louise Coleiro Preca nhar il-Ġimgħa 29 ta’ Ġunju fis-18.00.

Il-kontribuzzjonijiet jistgħu jsiru permezz tat-telefon fuq in-numru 51702012 għal donazzjoni ta’ € 15, fuq in-numru 51802013 għal donazzjoni ta’ € 25 u fuq in-numru 51902070 għal donazzjoni ta’ € 50. Donazzjoni ta’ € 6.99 tista’ ssir billi jintbagħat SMS vojt fuq 50618944. L-abbonati tal-BOV Mobile Pay jistgħu jagħmlu d-donazzjoni tagħhom ukoll permezz tan-numru 79324834.

Il-qligħ kollu minn kunċert li fakkar il-Ħamsin Anniversarju tal-Bank Ċentrali ta’ Malta li sar dan l-aħħar fit-Teatru Manoel ingħata bħala donazzjoni lid-Dar tal-Providenza. Il-mistednin ġew imħeġġa jagħmlu donazzjoni volontarja waqt il-kunċert b’risq id-Dar.

Il-kunċert, li sar taħt il-patroċinju tal-President ta’ Malta, Marie-Louise Coleiro Preca, kellu repertorju ta’ xogħlijiet mużikali minn Hildegard von Bingen għall-kompożitur kontemporanju żagħżugħ Malti Karl Fiorini.

Bħalma jsir kull sena, Id-Dar tal-Providenza organizzat attività biex matulha turi ir-rikonoxximent tagħha lill-għadd kbir ta’ voluntiera għad-dedikazzjoni u l-ħin tagħhom jew mar-residenti direttament jew fid-diversi oqsma tad-Dar fejn teħtieġ l-għajnuna. Din is-sena, l-attività bdiet b’quddiesa ta’ ringrazzjament minn Fr Martin Micallef, Direttur tad-Dar tal-Providenza, fil-kappella tal-iskola tas-Seminarju f’Tal-Virtù, fir-Rabat, għall-intenzjonijiet u l-bżonnijiet tal-volontiera imma ukoll b’suffraġju għal ruħ Donald Pace Bonello, wieħed mill-volontiera li miet dan l-aħħar.

Fr Martin irringrazzja lill-volontiera li b’tant imħabba u dedikazzjoni jagħtu ħinhom fid-diversi oqsma li jkun hemm il-ħtieġa tagħhom mar-residenti stess, fil-kċina, mal-ħajjata, fil-ġnien, fil-laundry, fl-amministrazzjoni u fl-uffiċċju tal-Belt. Fr Martin irringrazzja wkoll lir-Rettur u l-ammistrazzjoni tas-Seminarju li tawna l-permess nużaw il-kappella u l-canteen tagħhom għall-okkażjoni.