Ħaddiema tal-Fondazzjoni għal Logħob Responsabbli jagħmlu ħidma volontarja fid-Dar tal-Providenza

/fi /by

Grupp ta’ impjegati minn dipartimenti differenti fi ħdan il-Fondazzjoni għal Logħob Responsabbli qattgħu jum ta’ ħidma volontarja fid-Dar tal-Providenza fis-Siġġiewi.

Il-ħaddiema għamlu diversi xogħolijiet bħal tindif ġenerali, ħasil ta’ twieqi u kif ukoll għajnuna fil-kċina. Il-Fondazzjoni organizzat din l-inizjattiva bl-appoġġ tas-Segretarjat Parlamentari għas-Servizzi Finanzjarji, Ekonomija Diġitali u Innovazzjoni bħala parti mill-programm għar-Responsabbiltà Soċjali Korporattiva tagħha.
Is-Segretarju Parlamentari l-Onorevoli Silvio Schembri kien preżenti għal din il-ħidma volontarja fejn iltaqa’ mad-Direttur tad-Dar tal-Providenza, Fr Martin Micallef u mal-ħaddiema tal-Fondazzjoni. Huwa ta l-proset tiegħu lill-ħaddiema tal-Fondazzjoni u saħaq dwar l-importanza tal-volontarjat fis-soċjetà tagħna. L-Onorevoli Schembri żar u tkellem ma’ diversi ħaddiema li jaħdmu fid-Dar, fejn irringrazzja b’mod speċjali lil Fr Martin Micallef tal-ħidma bżonnjuża immens li d-Dar tal-Providenza twettaq mal-persuni b’diżabbiltà.

Id-Direttur tad-Dar tal-Providenza, Fr Martin Micallef, f’isem ir-residenti rringrazzja lill-impjegati kollha tal-Fondazzjoni għal Logħob Responsabbli għall-ħidma volontarja li għamlu matul dan il-jum u għamel referenza għall-ġbir ta’ fondi li se jkun qed jitwettaq fl-Ewwel tas-Sena biex jinġabru fondi għad-Dar tal-Providenza.

Min-naħa l-oħra, is-Sur Shawn Zammit, Kap tal-Operazzjonijiet fil-Fondazzjoni, irringrazzja lis-Segretarju Parlamentari għall-preżenza tiegħu għal din l-attività b’ruħ speċjali u lil Fr Micallef għax-xogħol eċċezzjonali li jsir matul is-sena kollha.

L-Ispeaker tal-Kamra tar-Rappreżentanti jinawgura wirja ta’ xogħlijiet tal-arti li se jiġu rkantati b’risq Id-Dar tal-Providenza

/fi /by

“L-istorja tad-Dar tal-Providenza imwaqqfa minn Dun Mikiel Azzopardi fit-12 ta’ Settembru 1965, għalkemm hija ġrajja ta’ tlieta w ħamsin sena, hija wkoll storja ta’ poplu u ta’ nazzjon.” Dan qalu l-Ispeaker tal-Kamra tad-Deputati, l-Onor. Dr Anġlu Farrugia meta fetaħ uffiċċjalment wirja ta’ xogħlijiet tal-arti li fl-20 ta’ Diċembru se jiġu rkantati fil-foyer tal-bini tal-Parlament b’risq Id-Dar tal-Providenza.

Il-wirja hija miftuħa kuljum bejn id-9.00am u t-8.00pm sakemm fl-20 tax-xahar fis-7.00pm jibda l-irkant tax-xogħlijiet li ngħataw minn tmienja u disgħin artist, kemm Maltin kif ukoll barranin. Wieħed jista’ jara l-katalgu online fuq www.dtpauction.com.

F’diskors ta’ merħba, Fr Martin Micallef, Direttur tad-Dar, qal li huwa b’sodisfazzjon li jgħid li f’dawn l-aħħar tlett snin kemm ilha ssir il-wirja fil-Parlament, Id-Dar tal-Providenza daħħlet madwar €100,000 mill-bejgħ tax-xogħlijiet tal-arti. Huwa rringrazzja lill-Onorevoli Mr Speaker talli għal sena oħra ġentilment offra dan il-post prestiġjuż biex tittella’ din il-wirja u talli ta wkoll lid-Dar l-opportunità u l-unur tant speċjali li jsir l-irkant fil-foyer tal-Parlament.

FESTA OĦRA TA’ ĠENEROŻITA’ MAD-DAR TAL-PROVIDENZA FL-EWWEL TA’ JANNAR

/fi /by

Ingħataw dettalji tat-tlieta w għoxrin edizzjoni tal-Festa ta’ Ġenerożità li ssir fl-Ewwel ta’ Jannar ta’ kull sena organizzata mid-Dar tal-Providenza biex jinġabru fondi ħalli d-Dar tas-Siġġiewi tkun tista’ tkompli bil-ħidma tagħha u ssaħħaħa. Dan qalu Fr Martin Micallef, Direttur tad-Dar, waqt konferenza tal-aħbarijiet li saret dalgħodu (It-Tlieta, 11 ta’ Diċembru).
Fr Martin semma’ erba’ għanijiet għall-Festa ta’ Ġenerożità mad-Dar tal-Providenza: Li l-pubbliku jkun jista’ jiltaqa’ mar-residenti tad-Dar; li jara b’għajnejh xi proġetti u inizzjattivi importanti li saru jew qed isiru fid-Dar; li jinġabru fondi biex is-servizz siewi li tagħti d-Dar tal-Providenza jkun jista’ jibqa’ għaddej u jitjiebu u fl-aħħarnett, iżda mhux linqas, hu li jitwassal il-messaġġ li d-Dar tal-Providenza dejjem trid twassal: Is-soċjetà dejjem trid tirrispetta lill-persuni b’diżabilità, titrattahom bid-dinjità li jixirqilhom u toffrilhom l-għażliet u l-opportunitajiet li kulħadd għandu dritt li jgawdi.
Il-Festa ta’ Ġenerożità tibda fid-9.00am b’quddiesa minn Mons Arċisqof Charles J. Scicluna fil-kappella tad-Dar. Matul il-jum kollu fuq il-palk ta’ taħt it-tinda, ikun hemm spettaklu ta’ varjetà u intervisti ma’ għadd ta’ personalitajiet li jżuru d-Dar li jibqa’ sejjer sa nofsillejl.
Din is-sena se jerġa jsir irkant ta’ xogħolijiet tal-arti, ġentilment mogħtija minn artist, kemm Maltin kif ukoll barranin imma se jieħu bixra oħra billi l-irkant se jsir fil-foyer tal-Parlament fil-Belt Valletta nhar il-Ħamis, 20 ta’ Diċembru fis-7.00pm. Il-pubbliku jista’ jara minn qabel dawn ix-xogħolijiet tal-arti fil-wirja li se tkun fl-istess foyer tal-Parlament kif ukoll billi jidħol fuq ill-website www.dtpauction.com.
Din il-wirja se tinfetaħ uffiċċjalment mill-Ispeaker tal-Kamra tar-Rappreżentanti, l-Onor. Dr Anġlu Farrugia nhar il-Ġimgħa 14 ta’ Diċembru fil-5.00pm u tagħlaq bl-irkant fl-20 tax-xahar. Il-wirja tkun miftuħa kuljum mid-9.00am sat-8.00pm. Xogħlijiet tal-arti li ma jiġux irkantanti jkunu għall-bejgħ waqt il-Festa ta’ Ġenerożità fl-1 ta’ Jannar, 2019 fis-Siġġiewi.

Is-CD Compilation, “Ħelu Bambin4”, jista’ jinkiseb fuq donazzjoni ta’ €10 b’risq id-Dar tal-Providenza, bi produzzjoni u kliem ta’ Fr George Ocar Buttigieg OFMConv. Għadd ta’ kantanti stabbiliti Maltin taw sehemhom f’din is-CD li tista’ tiġi akkwistata għal donazzjoni ta’ €10 b’risq Id-Dar tal-Providenza mill-ħwienet reliġjużi ewlenin. Saru arranġamenti ma’ TVM biex dan il-kunċert, li ġie rrekordjat fl-istudios ta’ Where’s Everybody, jixxandar fuq TVM2 nhar il-Milied fl-10.00am b’ripetizzjoni lejlet l-ewwel tas-sena fid-8.45pm.
Ghal benefiċċju ta’ dawk li dakinhar se jżuru d-Dar tal-Providenza se jkun hemm servizz ta’ park-and-ride bejn it-3.00pm u 9.00pm mit-triq ta’ San Niklaw (ir-runway l-antik). Għal dawk li ma jistgħux jaslu sas-Siġġiewi jistgħu isegwu l-Kampanja, li taghlaq wara nofsillejl, li se tkun imxandra live fuq l-istazzjonijiet televiżivi ewlenin. Donazzjonijiet jistghu jsiru fl-istess Dar tal-Providenza jew permezz tat-telefon.

Donazzjonijiet jistghu jsiru bit-telefon:
Donazzjoni €10 – 516 02 012
Donazzjoni €15 – 517 02 013
Donazzjoni €25 – 518 02 014
SMS Donazzjoni €7 – 506 18 922

Mons. Philip Calleja jingħata l-Premju Dun Mikiel Azzopardi 2018

/fi /by

Il-Premju Dun Mikiel Azzopardi għas-sena 2018 ingħata lil Mons. Philip Calleja bħala turija ta’ rikonoxximent u apprezzament tad-Dar tal-Providenza għall-ħidma u l-appoġġ tiegħu lejn id-Dar tas-Siġġiewi. Kien Monsinjur Calleja li wara l-mewt ta’ Dun Mikiel f’Mejju ta’ l-1987, ingħata l-inkarigu minn Mons. Arċisqof Ġużeppi Mercieca biex jorganizza l-funeral kif ukoll biex jieħu ħsieb it-tmexxija tad-Dar, sakemm ġie nominat Mons. Lawrence Gatt bħala d-Direttur il-ġdid.
Dan tħabbar minn Fr Martin Micallef, Direttur tad-Dar tal-Providenza, waqt kunċert li sar fil-Katidral tal-Imdina, mill-Banda tal-Forzi Armati ta’ Malta taħt il-patroċinju distint tal-E.T. il-President tar-Repubblika, s-Sinjura Marie Louise Coleiro Preca u l-E.T. l-Arċisqof ta’ Malta, Mons. Charles J. Scicluna.
Mons. Calleja ġie ordnat saċerdot fit-2 ta’ Awwissu, 1953. L-ewwel ħidma pastorali tiegħu kienet l-iżjed mat-tfal tal-Belt. Fl-1956, l-Arċisqof Mikiel Gonzi ħatru Deputat tal-Uffiċċju taż-Żwiġijiet, tal-Kurja tal-Arċisqof. Kienet ħatra litteralment providenzjali għad-Dar tal-Providenza.

Dak iż-żmien, f’Malta, numru sew ta’ tfajliet Maltin kienu jiżżewġu ma’ rġiel tas-Servizzi Ingliżi. Dun Philip kien jaf il-Kappillani tas-Servizzi kollha u meta s-Servizzi ġew biex iħallu l-Barracks tagħhom fis-Siġġiewi, wieħed mill-kappillani tagħhom għarrfu b’dan. Qallu li r-rest camp tal-Ammiraljat ta’ mat-triq li tieħu għal Għar Lapsi kien se jiġi trasferit fil-Mellieħa. Qallu wkoll li jekk il-Knisja f’Malta kellha bżonn dik l-art, kellha tapplika għaliha malajr. Bl-inizjattiva ta’ Dun Philip, bdiet minnufih ħidma biex il-post jinkiseb mill-AKM u għall-ewwel sentejn, il-lokal intuża bħala kampijiet tas-sajf għat-tfal. Fil-frattemp, bdiet iddur ir-rota biex Dun Mikiel Azzopardi jibda, fil-post, id-Dar tal-Providenza.

Illum, ta’ 90 sena, Mons Philip Calleja huwa Arċidjaknu tal-Kapitlu Metropolitan u għadu jattendi regolarment f’Dar l-Emigrant biex jaqdi, b’kull mod li jista’, lil dawk kollha li jfittxu l-għajnuna tiegħu.

Aktar kmieni, Fr Martin feraħ lill-President ta’ Malta, Marie Louise Coleiro Preca f’għeluq sninha. Huwa kompla jgħid li hija xi ħaġa sabiħa li f’dawn il-festi tal-Milied u l-ewwel tas-Sena barra li nixtru ħafna rigali għal xulxin indaħħlu idejna fil-but u naħsbu f’dawk li fis-soċjetà tagħna għandhom bżonn xi tip ta’ appoġġ biex jgħixu bħala ċittadini sħaħ u tal-ewwel klassi. Fr Martin żied hgħid: “Il-ġenerożità tal-poplu Malti u Għawdxi hija karatteristika sabiħa li tiddistingwina, iżda nappella li ma ngħinux għax nitħassru lil dawn il-persuni imma għax verament nixtiequhom igawdu minn kwalità ta’ ħajja li tirrispetta d-dinjità tagħhom kif jixraq lil kull persuna. Għalhekk nappella lill-poplu Malti u Għawdxi biex ngħinu kif nisgħtu lid-Dar tal-Providenza, lill-Malta Community Chest Fund u organizazzjonijiet oħra li jaħdmu fil-qasam soċjali biex verament ikollna soċjetà ġusta.”
Id-diskors ewlieni sar minn Alishia Xuereb Jones, ġenitur ta’ persuna bl-awtiżmu, li qasmet mal-udjenza preżenti ftit ħsibijiet biex f’pajjiżna ikun hawn aktar għarfien dwar il-kundizzjoni tal-awtiżmu u kif nistgħu nagħtu lil dawn il-persuni l-appoġġ li għandhom bżonn biex id-drittijiet tagħhom ikunu salvagwardjati. Aktar għarfien tad-drittijiet tal-persuni b’diżabilita jgħin biex in-nies iwarrbu l-preġudizzji u l-ostakli li ma jiggarantux l-integrazzjoni vera u l-ugwaljanza ta’ dawn il-persuni.
F’diskors qasir, L-Isqof Awżiljarju, Mons. Joseph Galea Curmi feraħ lill-Mons. Philip Calleja li ingħata l-Premju Mons. Mikiel Azzopardi u fl-istess waqt faħħar il-ħidma sfieqa tiegħu matul snin twal li mhux biss tissombolizza l-karattru tiegħu imma wkoll l-impenn tal-Knisja Maltija biex tgħin il-batut u l-emarġinat fis-soċjetà tagħna. Huwa kellu wkoll kliem ta’ tifħir għad-Dar tal-Providenza għall-ħidma siewja li tagħmel mal-persuni b’diżabilità f’pajjiżna. Żgur li d-Dar baqgħet taqdi d-dmir li għaddielha l-fundatur tagħha Dun Mikiel.
Il-Banda tal-Forzi Armati ta’ Malta kienet taħt id-direzzjoni tas-Surmast Capt. Jonathan Borg. Il-programm mużikali kien jinkludi xogħlijiet ta’ Tobani, Tschaikovsky, Mozart, Arnold & Brown, Bach, Rossi, Hahn, Franck u Jenkins. Il-Banda tal-FAM kienet akkumpanjata mill-Coro Bel Canto.

Il-Premju Dun Mikiel Azopardi jingħata kull sena mid-Dar tal-Providenza biex jirrikonoxxi l-kontribut volontarju ta’ persuni jew organiżżazzjonijiet fil-qasam tal-persuni b’diżabilita’ f’Malta u Għawdex. Dan il-Premju tnieda għall-ewwel darba fl-1995, f’għeluq it-tletin sena mit-twaqqif tad-Dar tal-Providenza.
Il-Kunċert kien organizzat bil-korteżija tal-Kapitlu tal-Katidral tal-Imdina.

Kunċert u tnehdija tas-CD Ħelu Bambin 4

/fi /by

Saret it-tnedija tar-raba’ CD fis-sensiela ta’ CDs li jiġbru kant tal-Milied b’arranġament tal-mużika ta’ Andrew Zammit. Il-produzzjoni u l-lirika huma ta’ Patri George Ocar Buttigieg OFM Conv. Għadd ta’ kantanti stabbiliti Maltin taw sehemhom f’din is-CD li tista’ tiġi akkwistata għal donazzjoni ta’ €10 b’risq Id-Dar tal-Providenza mill-ħwienet reliġjużi ewlenin li għad baqalhom ukoll kwantità limitata ta’ Ħelu Bambin CD2 u 3.

Saru arranġamenti ma’ TVM biex dan il-kunċert, li ġie rrekordjat fl-istudios ta’ Where’s Everybody, jixxandar fuq TVM2 nhar il-Milied fl-10.00am b’ripetizzjoni lejlet l-ewwel tas-sena fid-8.45pm.

B’kollox din il-Ħelu Bambin4, CD compilation fiha għoxrin kanzunetta tal-Milied. L-għan prinċipali hu li jixxandar il-messaġġ ewlieni li għalih aħna niċċelebraw il-Milied. Il-Milied hu kollu hu kemm tal-Bambin Ġesù u għandna nippruvaw negħlbu l-indifferenza li teżisti biex inwasslu l-Milied f’qalb kulħadd.

Impjegati tal-Awtorità tal-Ippjanar jagħmlu xogħol volontarju fid-Dar tal-Providenza

/fi /by

Grupp ta’ 20 impjegat minn taqsimiet differenti fi ħdan l-Awtorità tal-Ippjanar qattgħu jum ta’ ħidma volontarja fid-Dar tal-Providenza fis-Siġġiewi.

Il-ħaddiema għamlu diversi xogħlijiet bħal tindif ġenerali, laundry, ħasil tal-karozzi u għajnuna fil-kċina. L-Awtorità għamlet ukoll donazzjoni ta’ €3,000 b’appoġġ għad-Dar tal-Providenza fil-ħidma tagħha mal-persuni b’diżabilità. Il-flus inġabru waqt attività li saret apposta. Il-Flimkien Fund Committee tal-Awtorità organizza din l-inizjattiva bl-appoġġ tal-Management bħala parti Planning Authoritymill-programm tal-Awtorità tal-Ippjanar għall-Corporate Social Responsibility.

Id-Direttur tad-Dar tal-Providenza, Fr Martin Micallef, f’isem ir-residenti rringrazzja lill-Management u l-impjegati tal-Awtorità tal-Ippjanar għall-ħidma volontarja li għamlu kif ukoll għall-għotja tagħhom.

Concerto Buffo mill-voluntiera ta’ Dr Klown fid-Dar tal-Providenza

/fi /by

It-tobba ta’ Dr Klown, normalment ma jidhrux fuq palk. Madankollu, din is-sena għamlu eċċezzjoni biex jiċċelebraw il-jum annwali tagħhom ta’ Dr Klown bil-CONCERTO BUFFO, maħluq b’mod speċjali għar-residenti tad-Dar tal-Providenza fis-Siġġiewi.

Fis-snin l-imgħoddija, Jum Dr Klown kien attività għall-pubbliku in ġenerali, żgur li ħafna jiftakru il-Parata ta’ Dr Klown fuq ix-xatt ta’ San Ġiljan u Tas-Sliema li fih ħadu sehem aktar minn 700 tifel u tifla. Din id-darba, iddeċidew li jużaw il-ħiliet tagħhom biex iwasslu ftit dawl tax-xemx lir-residenti tad-Dar.

Wara sensiela ta’ provi, irnexxielhom itellgħu programm oriġinali u kkulurit għar-residenti tad-Dar tal-Providenza, taħlita ta’ żfin, ċajt u daqq mużikali u naturalment dak kollu li jafu jagħmlu il-buffi. Kultant kemmxejn storbjużi, imma buffi jibqgħu buffi. Il-voluntiera kollha ta’ Dr Klown ħadu sehem fid-divertiment u kantaw għanjiet folkloristiċi popolari mar-residenti li ingħaqdu magħhom flimkien mat-Tikka Band li ħadu sehem fit-tieni parti tal-programm. Kien hemm żfin bis-siġġijiet tar-roti, figuri mill-bżieżaq u l-buffi jagħmlu li jafu u jħobbu jagħmlu biex ir-residenti kellhom divertiment li ma tantx jinsewh malajr.

Kunċert Annwali b’riżq id-Dar tal-Providenza mill-banda tal-Forzi Armati ta’ Malta

/fi /by

Il-Kunċert annwali mill-banda tal-Forzi Armati ta’ Malta b’riżq Id-Dar tal-Providenza fl-okkażjoni tal-Ġimgħa tal-Persuni b’Diżabilità, se jsir fil-Katidral Metropolitan tal-Imdina nhar il-Ġimgħa, 7 ta’ Diċembru 2018 fit-8.00pm. Il-kunċert vokali u strumentali se jkun taħt il-patroċinju distint tal-E.T. il-President ta’ Malta, Marie Louise Coleiro Preca, u l-E.T. Mons. Arċisqof Charles J Scicluna u se jsir bil-korteżija tal-Kapitlu Metropolitan. Bħala parti mill-kunċert jitħabbar ir-rebbieħ tal-Premju Mons. Mikiel Azzopardi 2018.

Il-Banda tal-Forzi Armati ta’ Malta se tkun taħt id-direzzjoni tas-Surmast Kaptan Jonathan Borg bis-sehem tal-Coro Bel Canto, immexxi mis-Surmast Hermann Farrugia Frantz. Se jindaqqu xogħlijiet ta’ Theodore Moses Tobani, Pyotr IlyichTschaikovsky, Wolfgang Amadeus Mozart, Arnold & Brown, Johann Sebastian Bach, Carlo Giuseppe Rossi, Kurt Hahn, Cesar Frank, Karl Jenkins u George Frideric Handel.

Id-diskors ewlieni li din is-sena se jsir minn Dr Alistair Degaetano se jiffoka fuq l-Awtiżmu.

Id-dħul għaIl-kunċert huwa bla ħlas u kulħadd huwa mistieden. Biljetti tad-dħul jistgħu jinkisbu billi wieħed iċempel fuq 2146 2844 jew jibgħat imejl fuq kuncert@dartalprovidenza.org. Biljetti jistgħu jinkisbu wkoll mill-Media Centre, Blata l-Bajda u mill-uffiċċju tad-Dar tal-Providenza fi Triq San Pawl fil-Belt (wara s-suq) li jkun miftuħ mit-Tnejn sas-Sibt bejn id-9.00am u nofsinhar.

L-Isqof Awżiljarju Mons. Joseph Galea Curmi jagħmel żjara uffiċċjali fid-Dar tal-Providenza

/fi /by

“Fid-Dar tal-Providenza hawn l-għożża tal-ħajja u d-dinjità tal-bniedem. Kull min jiġi hawn jifhem kif il-ħajja ta’ kull bniedem hi prezzjuża u għandna ngħożżuha għax il-bniedem maħluq xbieha ta’ Alla. Hu min hu, hi min hi. Hawnhekk hawn l-għożża tal-ħajja bl-imħabba. Hi din l-imħabba r-ruħ tad-Dar tal-Providenza, imma minn hawn toħroġ ukoll ’il barra biex tmiss il-qalb tal-Maltin kollha.” Dan qalu l-Isqof Awżiljarju u Vigarju Ġenerali, Mons. Joseph Galea meta għamel l-ewwel żjara uffiċċjali tiegħu fid-Dar fis-Siġġiewi. Huwa kien milqugħ mid-Direttur tad-Dar, Fr Martin Micallef u ltaqa’ u tkellem mar-residenti u support workers tagħhom kif ukoll mal-membri tal-Amministrazzjoni. Huwa sab ħin biex jara mill-qrib id-diversi servizzi li toffri d-Dar.

Meta ndirizza lir-residenti, Mons Galea Curmi qal li d-Dar tal-Providenza tgħallmu kif jgħix il-motto li għażel biex ikun ta’ ispirazzjoni għall-ministeru episkopali tiegħu: Ngħożżu l-ħajja bl-imħabba.

Mons. Galea Curmi xtaq juri l-gratitudni u l-apprezzament sħiħ tal-Knisja f’Malta lejn ir-residenti tad-Dar tal-Providenza, lid-Direttur, Fr Martin Micallef, Fr Trevor Fairclough, lis-sorijiet tal-Karità, lill-persuni kollha li jaħdmu jew huma voluntiera fid-Dar. Grazzi mill-qalb, għax dak li qed isir hu espressjoni mill-isbaħ tal-qalba tal-ħajja Nisranija, ta’ dak li hi l-Knisja fil-missjoni tagħha fis-soċjetà Maltija.

L-Isqof Awżiljarju temm billi awgura li fuq il-passi ta’ Mons. Mikiel Azzopardi, li b’mod profetiku u providenzjali beda din id-Dar, lkoll inkomplu nxerrdu l-messaġġ li joħroġ minn hawn: Ngħożżu l-ħajja bl-imħabba.

Id-Djarju tad-Dar tal-Providenza għas-sena 2019 qed jitqassam

/fi /by

Id-Djarju tad-Dar tal-Providenza għas-sena 2019 beda jitqassam f’kull dar ta’ Malta u Għawdex. Permezz ta’ dan id-djarju, li bit-tagħrif li fih jibqa’ jintuża s-sena kollha, is-sostenituri jkollhom l-opportunità li juru s-solidarjetà tagħhom mad-Dar li toffri residenza lil mija u ħmistax-il resident b’diżabilità bl-aħjar ambjent li jgħin fl-iżvilupp tagħhom.

Bħal fis-snin l-imgħoddija, id-djarju fih il-ħinijiet tal-quddies kollu tal-Ħdud u ta’ matul il-ġimgħa fil-knejjes u kappelli kollha ta’ Malta u Għawdex u kalendarju dettaljat. Fih ukoll il-lista tal-festi parrokkjali kollha fiż-żewġ gżejjer għas-sena ddieħla. Ir-ritratt bil-kulur tal-qoxra huwa tpinġija ta’ Debbie Bonello.

Min ma jasallux id-djarju huwa mitlub li jċempel lir-Reception tad-Dar tal-Providenza fuq 21462844 jew b’email fuq info@dartalprovidenza.org.

GasanMamo Insurance u MAPFRE MSV Life sponsorjaw l-istampar tad-djarju waqt li l-Maltapost reġgħet ġentilment aċċettat li tqassam id-djarji mingħajr ħlas fid-djar kollha.

12 ta’ Novembru 2018