Archive for category: Aħbarijiet

Trail Makers qed jorganizzaw mixja ta’ 150 kilometru, lejl u nhar b’risq id-Dar tal-Providenza mis-Sibt 23 sal-Ħadd 24 ta’ Marzu. Il-mixja tibda mill-parkeġġ tad-Dar fis-Siġġiewi fis-seba’ ta’ filgħodu tas-Sibt u tispiċċa għal ħabta tal-ħamsa ta’ filgħaxija tal-għada l-Ħadd.

Dan tħabbar waqt konferenza tal-aħbarijiet. Fr Martin Micallef, Direttur tad-Dar tal-Providenza, qal li matul is-sena jsiru diversi attivitajiet minn għaqdiet u entitajiet differenti bil-għan li jinġabru flus għad-Dar tas-Siġġiewi u din il-mixja ta’ 150 kilometru hija waħda minnhom. Huwa rringrazzja lil Trail Makers, organizzaturi tal-mixja, u appella biex ikun hemm ħafna li jiddeċiedu li jieħdu sehem anke biss f’partijiet minnha u li jagħmlu d-donazzjoni tagħhom b’risq id-Dar. Giovanni Camilleri u Dennis Borg ta’ Trail Makers taw tagħrif siewi dwar ir-rotta, ir-reġistrazzjoni u donazzjonijiet.

Wieħed jista’ jieħu sehem fil-mixja sħiħa ta’ 150km jew jingħaqad mal-grupp f’wieħed mill-postijiet tat-tluq u jimxi kemm jixtieq. Dawk li jimxu 20km jew iżjed jingħataw midalja ta’ tifkira kulur il-bronż u dawk li jtemmu l-mixja ta’ 150km jingħataw midalja ta’ tifkira kulur il-fidda.

Għal aktar tagħrif wieħed jista’ jidħol fuq Facebook u ssir ir-reġistrazzjoni billi timtela din il-formola.

Id-donazzjonni tista’ tingħata minn fuq is-sit tad-Dar tal-Providenza.

Reġistrazzjonijiet jagħlqu nhar il-Ħadd, 17 ta’ Marzu 2019.

Tista’ tingħaqad mal-mixja f’dawn il-postijiet:

Is-Sibt 23 ta’ Marzu 2019
7:00 – 8:30
Dar tal-Providenza – Ħad-Dingli (8km)

8:30 – 12:00
Ħad-Dingli – Għajn Tuffieħa – waqfa għall-ikel (15km)

Fr Martin Micallef, Direttur tad-Dar tal-Providenza, iċċelebra Quddiesa ta’ ringrazzjament f’għeluq it-tmenin sena ta’ Sr Bernarda, tas-Sorijiet tal-Karità ta’ St Joan Antide de Thouret, li ilha tagħti s-servizz dedikat tagħha fid-Dar tas-Siġġiewi għal dawn l-aħħar dsatax-il sena. Għall-quddiesa attendew ukoll għadd ta’ qraba tagħha, residenti u ħaddiema tad-Dar.

Wara l-Quddiesa, Sr Bernarda ingħatat rigali ta’ tifkira u sar riċeviment.

Somma rekord ta’ €1,275,442 inġabret waqt il-Festa ta’ Ġenerożità organizzata id-Dar tal-Providenza. It-temp tajjeb għalkemm kemmxejn kiesaħ għen biex għadd kbir ta’ nies marru s-Siġġiewi biex jagħmlu d-donazzjoni tagħhom taħt it-tinda li ttellgħet fil-parkeġġ. Triq Lapsi li tagħti għad-Dar ftit tkun daqshekk użata. Bħal kull sena, għadd ta’ parroċċi f’Malta w Għawdex organizzaw ġabriet speċjali.

Id-Direttur tad-Dar tal-Providenza, Fr Martin Micallef, qal li din il-Festa ta’ Ġenerożità bħal dejjem uriet il-qalb kbira tal-poplu Malti u Għawdxi li għal darb’oħra wera solidarjetà u ġenerożità mad-Dar. Huwa qal li dawn il-fondi se jgħinu biex id-Dar tkompli tagħti ħajja xierqa u dejjem aħjar lir-residenti tagħha.

L-ewwel żjara saret minn Mons Arċisqof Charles J. Scicluna li wkoll iċċelebra quddiesa fil-kappella tad-Dar tal-Providenza. Huwa appella lill-Maltin u l-Għawdxin kollha biex ikomplu jirrispettaw u jiddefendu d-drittijiet tal-persuni b’diżabilità waqt li jkomplu jkunu ġenerużi mar-residenti li jgħixu fid-Dar. Huwa żied ifakkar li bħalma kien iħobb jgħid San Ġorġ Preca għandna bżonn il-Mulej u m’hemm xejn aħjar kif nagħrfuh milli niskopru iżjed it-talba tal-Missierna.

Matul il-jum kien hemm żjarat mill-President ta’ Malta, s-Sinjura Marie Louise Coleiro Preca u r-raġel tagħha Edgar; Dr Chris Cardona, il-Ministru għall-Ekonomija, Investiment u Intrapriżi Żgħar li rrappreżenta lill-Prim Ministru, Il-Kap tal-Oppożizzjoni Dr Adrian Delia, is-Segretarju Parlamentari għad-Drittijiet tal-Persuni b’Diżabilità u Anzjanità Attiva, Anthony Agius Decelis; l-Arċisqof Emeritus Mons Pawl Cremona O.P. u l-Isqof Awżiljarju Mons Joseph Galea Curmi. Attendew ukoll għadd ta’ ministri u membri parlamentari miż-żewġ naħat tal-Kamra tad-Deputati u rappreżentanti ta’ korpi kostitwiti li qattgħu ħin iwieġbu t-telefonati tal-pubbliku.

€29,487 inġabru mill-irkant ta’ xogħlijiet tal-arti mogħtija minn tmienja u disgħin artisti Maltin u barranin li għall-ewwel darba sar fl-intrata tal-Parlament fil-Belt Valletta. L-irkant sar il-Ħamis 20 tax-xahar fi tmiem ta’ wirja li kienet infetħet uffiċċjalment mill-Ispeaker tal-Kamra tad-Deputati, Dr Anġlu Farrugia sebat ijiem qabel fl-istess bini tal-Parlament. Biċċiet mix-xogħlijiet tal-arti li baqgħu ma ġewx irkantati inbiegħu bil-prezz oriġinali tagħhom fil-Festa ta’ Ġenerożità matul il-jum tal-ewwel tas-Sena l-Ġdida.

Ix-xandira televiżiva bdiet fid-9.00am b’quddiesa mill-kappella tad-Dar u baqgħet  sejra sa wara nofsillejl meta tħabbret is-somma totali fost is-soltu ferħ u briju ta’ l-għadd kbir ta’ voluntiera li taw ħinhom għal din il-Festa ta’ Ġenerożità. TVM1, TVM2, ONE TV u NET TV ingħaqdu f’ħinijiet twal fix-xandira diretta ta’ ftit aktar minn ħmistax-il siegħa.  Matul ix-xandira kien hemm programm sħieħ ta’ divertiment taħt it-tinda bis-sehem ta’ kantanti u mużiċisti ewlenin Maltin.

Bil-għajnuna tal-Ħbieb tad-Dar tal-Providenza, nhar il-Ħadd, 22 ta’ Diċembru 2018, id-Dar organizzat ‘Dawra bil-Ferrovija’ għat-tfal fil-pjazza San Nikola, fis-Siġġiewi li minnha nġabret is-somma ta’ €2,426.76 . Bħal fis-snin l-imgħoddija, mill-attendenza u l-entużjamu tat-tfal, din l-attività kienet success. Fil-fatt, il-ferrovija kellha tagħmel tnax-il dawra madwar xi toroq tar-raħal.

Id-Direttur tad-Dar tal-Providenza, Fr Martin Micallef, irringrazzja lit-tim kollu tal-Grupp Ħbieb tad-Dar u l-helpers kollha. Biex jgħinu fl-atmosfera ma naqasx li jkun hemm Father Christmas, anzi kien hemm tnejn, il-Bouncing Castle u t-tpinġija tal-wiċċ. Fr Martin spiċċa biex irringrazzja lil dawk li għal sena oħra reġgħu marru dawra bil-ferrovijia b’risq Id-Dar tal-Providenza u għamel stedina għal sena oħra …. għax “il-ferrovija diġà ibbukkjata.”