Jitfakkar it-32 Anniversarju tal-mewt ta’ Dun Mikiel Azzopardi, Fundatur tad-Dar tal-Providenza

/fi /by

Fil-kappella tad-Dar tal-Providenza saret ċelebrazzjoni ewkaristika biex jitfakkar it-tnejn u tletin anniversarju mill-mewt ta’ Mons Mikiel Azzopardi, li waqqaf id-Dar fl-1965. Għal din il-Quddiesa attendew għadd ta’ membri tal-Azzjoni Kattolika Maltija (AKM), residenti u ħbieb tad-Dar tal-Providenza. Dun Mikiel, kif kien magħruf l-aktar, twieled fil-Belt Valletta fl-10 ta’ Frar 1910 u miet fit-13 ta’ Mejju 1987.

Iċ-ċelebrazzjoni tmexxiet minn Fr Martin Micallef, Direttur tad-Dar tal-Providenza flimkien ma’ Fr Reuben Gauci, Assistent Ekkleżjastiku taż-ŻAK (Żgħażagħ Azzjoni Kattolika). Fl-omelija tiegħu, Fr Martin iddeskriva lil Dun Mikiel Azzopardi bħal ragħaj tajjeb li għadu jispira lis-soċjetà Maltija bil-viżjoni u l-ħidma tiegħu biex il-persuni b’diżabilità jingħataw rispett, dinjità u drittijiet li fi żmienu ma kellhomx. Hu għen ukoll il-mod kif is-soċjetà ta’ żmienu kienet tħares lejn il-persuni b’diżabilità. Il-persuni b’diżabilità mhumiex nies tat-tieni klassi imma persuni bi drittjiet ugwali. Bħalissa fid-Dar jgħixu madwar mija u ħmistax-il persuna b’etajiet ta’ bejn l-erbatax u ‘l fuq minn tmenin sena. Id-Dar tiġbor fiha tliet residenzi: Villa Monsinjur Gonzi, Villa Papa Giovanni u Villa Papa Luciani kif ukoll djar fil-komunitajiet tas-Siġġiewi, l-Qawra, Birkirkara, iż-Żurrieq u oħra f’Balluta li mistennija tinfetaħ aktar tard din is-sena. Fr Martin fakkar ukoll fil-viżjoni ta’ Jean Vanier li miet ftit ġranet ilu, propju fis-7 ta’ Mejju fl-età ta’ 90 sena. Vanier, li kien żar id-Dar tal-Providenza f’Settembru 1985, bħal Dun Mikiel waqqaf il-komunitajiet magħrufa bħala L’Arche fejn persuni b’diżabilità intellettwali jgħixu fi djar żgħar fil-komunità flimkien ma’ dawk li jagħtuhom sapport. Illum L’Arche hija mifruxa f’seba’ u tletin pajjiż mad-dinja kollha. Jean Vanier jgħid li tgħix mal-persuni b’diżabilità jgħinek tapprezza s-sabiħ li hemm f’qalbhom u l-valur uniku ta’ kull persuna. Ġesu qatt ma warrab lil ħadd u jurina li jixtieq jinkludi lil kulħadd tant li għażel li jiċċekken u jsir wieħed bħalna. Huwa jisħaq li d-dinja teżalta lil min kapaċi jitla’ l-iskaluna tas-suċċess, tal-ambizzjoni, tal-kompetizzjoni, tal-ġid materjali u tal-poter. Minkejja l-liġjiet u l-konvenzjonijiet favur id-drittijiet tal-persuni b’diżabilità għad hawn min iħares lejn il-persuni b’diżabilità bħala “problema” u għalhekk nippromovu l-abort ta’ persuni b’dizabiltà fil-ġuf u niddeskriminaw ma’ persuni b’diżabilità.

Fi tmiem iċ-ċelebrazzjoni, sar diskors qasir mis-Sur Josef DeBono, President tal-AKM, fejn ikkritika kliem ta’ mibgħeda lejn il-persuni b’diżabilità li smajna dan l-aħħar f’pajjiżna u ħeġġeġ biex, bħal Dun Mikiel, nippromovu l-kultura tal-ħajja li tirrispetta lil kull persuna sa mill-konċepiment tagħha. Wara, dawk preżenti inġabru u talbu madwar il-qabar ta’ Mons Azzopardi.

Tislima lil Jean Vanier, fundatur tal-Arche International

/fi /by

Id-Dar tal-Providenza tixtieq turi s-sogħba tagħha għall-mewt ta’ Jean Vanier il-fundatur tal-komunitajiet internazzjonali l’Arche u Faith and Light fl-età ta’ 90 sena.
Jean kien żar id-Dar tal-Providenza fid-9 ta’ Settembru 1985, waqt li kien Malta fuq stedina tal-Kummissjoni Djoċesana Żgħażagħ iex bie ikun il-kelliem ewlieni waqt l-ewwel edizzjoni ta’ Festażgħażagħ li nżammet fit-Tradefair Grounds in-Naxxar. Waqt li kien malta kien ta ukoll sensiela ta’ taħdidiet fl-Uffiċini tal-Caritas, il-Floriana.
Jean Vanier kien filosfu Kandiż ta’ origini Franċiza li fl-1964, għażel li jitlaq il-karriera akkademika tiegħu u jibda jgħix ma’ żewġt irġiel b’diżabilità intellettwali fi Troli fi Franza fejn waqqaf il-Komunitajiet tal-Arche. F’dawn il-komunitajiet persuni b’diżabilita intelletwali flimkien ma’ dawk li jassistuhom jaqsmu ħajjithom flimkien fi djar żgħar fil-komunità. Bil-mod il-mod bil-kuraġġ u l-viżjoni ta’ Jean Vanier il-komunitajiet tal-Arche minn Franza kibru għal 152 komunita mxerda f’37 pajjiz fil-ħames kontinenti. Illum 5,000 raġel u mara b’diżabilita qed jgħixu fil-qalba tal-soċjeta, jistgħu isemmgħu leħinhom u jgħixu f’ambjent li jgħinhom jiżviluppaw it-kapaċitajiet tagħhom fil-milja kollha tagħhom.

Dawn il-komunitajiet huma magħquda minn viżjoni kumuni imnaqxa f’sett ta’ principji li jispiraw din il-ħidma.

Jean Vanier kien ta’ ispirazzjoni għal Dun Anġ Seychell biex jiftaħ id-dar tiegħu għal persuni b’diżabilità intellettwali li semmieħa Dar Nazaret. Dar oħra li fetaħ Dun Anġ biswit din id-dar semmieha propjau għal Jean Vanier.

Il-messaġġ ta’ Jean Vanier dejjem iħeġġeġ biex nibnu komunitajiet ta’ kompassjoni b’enfasi fuq id-dinjità u valur tal-ħajja uman. Huwa jisħaq li l-persuni b’diżabilita mhux biex ittasformawh bħala persuna u jara fihom sejħa biex napprezzaw li d-differenza hija rigal u mhux theddida.

Jean Vanier huwa wkoll awtur ta’ bosta kotba.

“La Via Del Calvario”, Kunċert ta’ Mużika Sagra b’risq Id-Dar tal-Providenza

/fi /by

Il-Katidral Metropolitan ta’ San Pawl fl-Imdina kien mimli nhar is-Sibt, 13 ta’ April għal “La Via Del Calvario”, kunċert ta’ Mużika Sagra għall-Ġimgħa Mqaddsa mill-Banda tal-Pulizija ta’ Malta taħt it-tmexxijja tas-Surmast Direttur, l-Assistent Kummissarju Anthony Cassar. Għall-kunċert, li sar b’risq Id-Dar tal-Providenza, kienu preżenti fost oħrajn l-E.T. Il-President ta’ Malta, Dott. George Vella, il-Ministru għall-Intern u s-Sigurtà Nazzjonali, Dr Michael Farrugia, l-E.T. Mons Arċisqof Charles J. Scicluna, il-Kummissarju tal-Pulizija, s-Sur Lawrence Cutajar u Fr Martin Micallef, Direttur tad-Dar fis-Siġġiewi.

 

Il-Banda tal-Pulizija kienet akkumpanjata mill-Amadeus Chamber Choir, il-Guest Musicians Ensemble, is-sopran Ruth Sammut Casingena, it-tenuri Brian Cefai u Charles Vincenti, l-organista tal-Katidral tal-Imdina Dr Chris Rolè, l-arpista Esmeralda Galea Camilleri, il-vjolinista u sassofonista Mro. David Joseph Sammut flimkien mal-Pipe Band tal-Korp ral-Pulizija. B’kollox, fil-kunċert ta’ sagħtejn u nofs ħadu sehem mhux inqas minn mija u għoxrin parteċipant.

 

“La Via Del Calvario” kien wieħed minn tlitt kunċerti li huma ppjanti għal matul din is-sena biex jitfakkru il-25 Anniversarju mir-riattivazzjoni tal-Banda tal-Korp tal-Pulizija fl-1994 u l-205 Anniversarju mit-twaqqif tal-Korp tal-Pulizija fl-1814.

Gvernatur tad-Distrett 2100 tar-Rotary f’Calabria u Campania iżur Id-dar tal-Providenza

/fi /by

Is-Sur Salvatore Iovieno, Gvernatur tad-Distrett 2100 tar-Rotary f’Calabria u Campania fl-Italja żar Id-Dar tal-Providenza bħala parti mill-Mixja Simbolika għall-Paċi li ssir bil-għan li tgħaqqad il-popli. Il-Mixja hija organizzata mir-Rotary tad-distrett tiegħu. Huwa kien akkumpanjat mill-mara tiegħu, uffiċċjali tad-Distrett 2100 Rodolfo Inderset u Lucia Cristofero kif ukoll mill-uffiċċjali tar-Rotary Club La Vallette Malta, Brian Gibbs, Bryan Sullivan u Patricia Salamone.

Il-Gvernatur Iovieno kellu l-opportunità jara l-Music Room speċjalizzata li kienet iffinanzjata mir-Rotary International u inawgurata s-sena l-oħra ma’ faċilitajiet oħra. Fi tmiem iż-żjara tiegħu huwa għamel ukoll donazzjoni lid-Dar tal-Providenza.

Id-Dar tal-Providenza tibki żewġ ex-impjegati tagħha

/fi /by

Din il-ġimgħa, Id-Dar tal-Providenza qed tikbi żewġ ex-impjegati tagħha li ingħaqdu mal-Mulej din il-ġimgħa: Valerie Piscopo minn Ħaż-Żabbar u Joseph Fenech Castaldi mill-Ħamrun.

Valerie ingħaqdet mad-Dar tal-Providenza fl-1997 u wara ftit ta’ żmien li ħadmet fil-flat Jasmine hija saret parti mill-istaff ta’ ‘Żerniq’ l-ewwel dar tagħna fil-komunità tas-Siġġiewi. Valerie ma kinetx tonqos bid-daqq tal-kitarra fiċ-ċelebrazzjonijiet liturġiċi tal-Milied u tal-Għid.

Joseph beda jaħdem fid-Dar tal-Providenza fis-Siġġiewi fl-1981. Huwa kellu diversi karigi, imma l-aħħar snin qattagħhom bħala Store Keeper.

Id-Dar tal-Providenza tixtieq twassal il-kondoljanzi tal-familjari ta’ Valerie u Joseph.

Mulej, agħtihom il-mistrieħ ta’ dejjem

Omelija waqt il-quddiesa tal-funeral ta’ Debbie Schembri

/fi /by

Omelija li għamel Fr Martin Micallef, Direttur tad-Dar tal-Providenza, waqt il-quddiesa tal-funeral ta’ Debbie Schembri fil-kappella taċ-Ċimiterju tal-Addolorata

Naħseb li l-ewwel darba li rajt lil Debbie kien meta fit-tieni sena tiegħi mort nagħmel ġurnata volontarjat id-Dar tal-Providenza u ltqajt magħha fis-segreterija fejn dak iż-żmien kienet taħdem. It-tieni darba li rajtha kienet waqt il-quddiesa fuq il-fosos tal-Floriana meta kien ġie għall-ewwel darba l-Papa Ġwanni Pawlu II. Dakinhar flimkien mal-ġenituri tagħha tellgħet il-pissidi tal-ostji waqt l-offertorju. Xi ftit tas-snin ilu rnexxieli nakkwista kopja tar-ritratti ta’ din l-okkażjoni unika mill-arkivji tar-ritratti tal-Vatikan u għamilt kopja lil Debbie li tant ħadet ġost bihom. Mur igħidli li snin wara kien se jkolli x-xorti nsir nafha mill-qrib daqshekk.

Illum, binha, missierha, oħtha, familjari, kollegi u ħbieb ninsabu lkoll ixxukkjati bil-mewt ta’ Debbie li ġiet bla nistennija għalkemm dan l-aħħar saħħitha ma tantx kienet tajba. Il-ħajja kollha misteri, kollha sorpriżi kuntant sbieħ u kultant koroħ, diffiċli bħal din ta’ llum. Imma fil-ħemda ta’ dan il-mument diffiċli, il-Mulej jiġi f’nofsna bħalma deher f’nofs l-Appostli mbeżżgħa mill-Lhud fiċ-ċenaklu, imbikkma bil-mewt ta’ dan Ġesu u jgħidilhom; “il-Paċi magħkom.” Kuraġġ ħbieb qed tarawni jien qomt mill-mewt. Ma tiftakrux x’igħidtilkom meta għamilt l-aħħar ikla magħkom?: “Ftit ieħor u ma tarawnix aktar; mbagħad ftit ieħor u terġgħu tarawni.” (Ġw 16.16) “Hawn jien ninsab fostkom imqajjem mill-mewt. Issa sejjer inħejjilkom fejn toqogħdu. U meta mmur u nħejjilkom post, nerġa’ niġi biex noħodkom miegħi biex, fejn inkun jien, tkunu intom ukoll” (Gw 14:2-3). Ejjew f’dan il-mument diffiċli nsaħħu l-fidi tagħna fil-qawmien mill-imwiet. Lil Martha, oħt Lazzru, Ġesù qalilha: “Jien hu l-qawmien u l-ħajja. Kull min jemmen fija, ukoll jekk imut, jgħix; u kull min jgħix u jemmen fija, dan ma jmut qatt. Temmnu inti dan?” “Iva, Mulej,” weġbitu, “Jiena nemmen.” [Ġw11,25-27] Ejja llum inwieġbuħ aħna wkoll bl-istess kliem ‘Iva, Mulej’. Nemmnu li Debbie li f’għajnejna hija mejta, nemmnu li llum waslet fid-destinazjoni aħħarija tagħha miegħek fis-sema għal dejjem. Hi din il-fidi fil-qawmien mill-imwiet li f’mument daqshekk diffiċli nistgħu inħossu l-Mulej jixxotta d-dmugħ tagħna u jibdlu fi dmugħ ta’ ferħ u tama.

Dan il-mument diffiċli barra li huwa mument fejn il-Mulej jgħinna nġeddu l-fidi tagħna fil-qawmien mill-imwiet huwa fl-istess ħin mument sabiħ biex nirringrazzjaw lil-Mulej li jagħtina persuni li jispirawna bħal Debbie.

Debbie kienet tispirak bid-determinazzjoni kbira tagħha, id-determinazzjoni li tgħix, li tistudja, li taħdem, li tgawdi l-ħajja, li tiġġieled għad-drittijiet tagħha u ta’ ħaddieħor, id-determinazzjoni li ssir omm, Ostakli biex tiddetermina ħajjitha hija stess sabet ħafna imma Debbie kienet fighter. Qatt ma qatgħet qalbha toħodha kontra d-diżabilita li s-soċjetà taf toħloq lil persuni bħalha. Kemm jgħodd għaliha l-versett mil-ktieb tal-Proverbji “Mara ta’ ħila min isibha? Tiswa aktar mill-ġawhar.” (Prov. 31:10)

Kienet mara li tapprezza l-impenn ta’ dawk li f’ħajjitha kienu ta’ appoġġ biex timxi l-quddiem. Insemmu biss, biex żgur ma ninsew lil ħadd, lil Dun Mikiel Azzopardi li dejjem kienet tgħid li kien jemmen fiha. F’wieħed mid-diskorsi tagħha kienet qalet: ”Kien jemmen li aħna l-persuni b’diżabilità jixirqilna dak li jixraq lil kull persuna umana; jixirqilna kull rispett u dinjità, jixirqilna opportunitajiet indaqs biex ikollna kwalità ta’ ħajja xierqa, nistgħu insemmgħu leħinna u nagħtu l-kontribut tagħna wkoll għall-ġid tas-soċjetà li ngħixu fiha.” Illum, Debbie tirringrazzja lil dawk kollha li f’ħajjitha stmawha b’dan il-mod, lil dawk kollha li kienu jfissru ħafna għaliha. Il-lista hija twila. Hawn ippermettuli nsemmi lil Sr Victoria li kienet ħadet ħsiebha meta kienet żgħira.

Illum, is-settur tal-persuni b’diżabilità tilef vuċi. Inħeġġeġ lill-persuni b’diżabilità biex fuq l-eżempju ta’ Debbie ma jibżgħux isemmu leħenhom, ma jibżgħux jiġġieldu d-diskriminazzjonjiet, ħafna drabi sottili, li jiltaqgħu magħhom kuljum. Il-bidliet fl-attitudnijiet neġattivi tan-nies jinbidlu biss jekk ma nibqgħux siekta, jekk noħolqu aktar kuxjenza favur id-drittijiet tal-persuni b’diżabilità u dak li jostakolhom milli jistgħu japparteċipaw b’mod sħiħ fil-ħajja tas-soċjetà bħal ħaddieħor.

Fl-iskrittura Alla jurina li aħna llkoll prezzjużi f’għajnejh, illkoll maħluqa xhiebha tiegħu. (Gen 1,27) llkoll indaqs f’għajnejħ. Debbie kienet prezzjuża f’għajnejh bħal kull persuna li titnissel fil-ġuf. U kif naqraw fl-Ewwel Ktieb ta’ Samwel, kapitlu 16 vers 7, “Alla ma jħarisx lejn is-sura tal-bniedem, jew it-tul ta’ persuntu. Alla ma jarax bħalma jara l-bniedem, dak biss li jidher fl-għajn, imma l-qalb.”

Grazzi, Mulej ta’ Debbie, ta’ dak li għallimtna permezz tagħha, ilqagħha fi ħdanek fis-sema.

Debbie, il-Mulej jagħtik il-mistrieħ ta’ dejjem.

Quddiesa fl-okkażjoni tal-Jum Dinji tad-Down Syndrome

/fi /by

Nhar il-Ħamis 21 ta’ Marzu, fl-okkażjoni tal-Jum Dinji tal-Persuni bid-Down Syndrome, l-Assoċjazzjoni Maltija tad-Down Syndrome organizzat quddiesa għall-membri tagħha u ħbieb fil-kappella tad-Dar tal-Providenza s-Siġġiewi. Għal din l-okkażjoni attendew ukoll is-Segretarju Parlamentari għad-Drittijiet tal-Persuni b’Diżabilità u Anzjanità Attiva, is-Sur Anthony Agius Decelis kif ukoll il-President tal-Assoċjazzjoni, is-Sinjura Joeanna Xerri.

 

Il-Quddiesa kienet iċċelebrata minn Fr Martin Micallef.  Fl-omelija tiegħu hu saħaq li lkoll iridu ngħixu f’soċjetà li tħares lejn id-differenza mhux bħala theddida imma bħala teżor, soċjetà li ma tħarisx lejn il-persuna b’diżabilità bil-mudell mediku, jiġifieri tara lill-persuna b’diżabilità bħal problema, imma bil-mudell soċjali jiġifieri soċjetà li tagħraf li d-diżabilità toħloqha hi meta ma’ taddattax għall-bżonnijiet, l-aspettativi u l-aspirazzjonijiet ta’ dawn il-persuni.

 

L-Assoċjazzjoni Maltija tad-Down Syndrome toffri sapport lil ġenituri ta’ trabi li jkunu twieldu b’din il-kundizzjoni u taħdem sabiex jiżdied l-għarfien ħalli persuni b’din il-kundizzjoni ntellettwali jilħqu l-potenzjal tagħhom.

Mixja ta’ 150 kilometru madwar Malta b’risq Id-Dar tal-Providenza

/fi /by

€1,725 inġabru fi tmiem-il ġimgħa matul mixja ta’ 150 kilometru madwar Malta organizzagta minn Trail Makers b’risq Id-Dar tal-Providenza. Il-mixja bdiet is-Sibt fis-seba’ ta’ filgħodu mill-parkeġġ tad-Dar fis-Siġġiewi u ntemmet fl-istess post il-Ħadd għal ħabta tal-ħamsa ta’ filgħaxija. Fl-aħħar parti, għadd ta’ residenti ingħaqdu ma’ dawk li kienu qed jieħdu sehem fil-mixja f’dak li l-organizzaturi ddeskrivew bħala l-isbaħ mument tal-attività.

 

Il-parteċipanti mxew madwar il-kosta u mis-Siġġiewi rhewlha lejn it-Tramuntana ta’ Malta u baqgħu iduru f’mixjiethom lejn in-Nofsinhar sakemm waslu lura erbgħa w tletin siegħa wara fil-parkeġġ tad-Dar tal-Providenza.

Aktar minn €3,000 miġbura waqt Bike Ride b’risq id-Dar tal-Providenza

/fi /by

€3,501.57 inġabru waqt Bike Ride b’risq id-Dar tal-Providenza li saret nhar it-Tlieta 19 ta’ Marzu 2019, fuq inizjattiva tal-Onor. Rosianne Cutajar u t-tim tagħha bl-appoġġ tal-Onor. Ryan Callus.

Iż-żewg Membri Parlamentari, kif ukoll madwar tlett mitt biker inġabru kmieni filgħodu f’Wied is-Sewda f’Ħal Qormi biex f’temp mill-isbaħ jerħulha għal dawra madwar Malta. Id-dawra ntemmet fil-parkeġġ tad-Dar tal-Providenza fis-Siġġiewi fejn il-bikers ingħataw merħba sabiħa mir-residenti u l-ħaddiema tad-Dar.  L-attività kompliet bi stunt show bil-muturi fejn intrebħu wkoll għadd ta’ rigali.

 

L-Onor. Rosianne Cutajar qalet li din l-attività hi xhieda ta’ kif meta jkun hemm l-għaqda s-suċċess ikun ferm ikbar.  Hija qalet li sodisfatta bl-attendenza numeruża tal-ewwel edizzjoni tal- Providenza Bike Ride u saħqet li tixtieq li din l-attività tkun appuntament annwali fil-kalendarju Malti.

L-Onor. Ryan Callus qal li aċċetta li jkun parti minn din l-attività biex kif qal hu “inwarrbu d-differenzi ta’ bejnietna bil-għan li naħdmu għall-ġid tal-komunità”.

L-istess sentiment ġie espress minn Fr Martin Micallef, Direttur tad-Dar tal-Providenza, li apprezza l-isforz u l-impenn biex setgħat tittella’ din l-attività.

Grupp ta’ studenti minn Virginia fl-Istati Uniti fid-Dar tal-Providenza

/fi /by

Grupp ta’ studenti minn Virginia fl-Istati Uniti fid-Dar tal-Providenza

 

Medseas Catholic Journeys ġabu Malta grupp ta’ studenti minn Virginia fl-Istati Uniti, immexxijja minn Prof. Mike Brown, Kap tal-Proġetti Missjunarji ta’ Christendon College, kulleġġ kattoliku fi Front Royal,VA.  Waqt li kienu hawn qattgħu ħin fid-Dar tal-Providenza fejn taw daqqa t’id fit-tindif wara l-maltempata qawwija li ħakmet lil Malta bejn it-22 u l-24 ta’ Frar li għadda.

 

Prof. Brown  wera l-gratitudni tiegħu u tal-grupp li kellu miegħu li ngħataw iċ-ċans li jagħtu l-għajnuna tagħhom f’post bħalma hija d-Dar tal-Providenza u se jmorru lura Virginia b’esperjenzi u memorji sbieħ ta’ Malta u tad-Dar tal-Providenza. Fr Joseph Mary Brown tal-Kongregazzjoni ta’ San Ġwann kien id-Direttur Spiritwali tal-grupp.

 

Medseas jorganizzaw mawriet Kattoliċi ta’ Fidi, Kultura u Storja bħal dan f’Malta kif ukoll f’Santiago de Compostela fil-Portugall.