Archive for category: Aħbarijiet

Is-St. Paul Metropolitan Orchestra, taħt it-direzzjoni tax-Chev. Mro. Mark Agius, tat żewġ kunċerti b’risq Id-Dar tal-Providenza. L-ewwel wieħed kien ‘Fewġa Klassika’ fil-knisja parrokkjali ta’ Santa Luċija fl-10 ta’ Settembru li għadda. It-tieni wieħed, ‘Requiem e Resurrectio et Vita’ sar fit-8 ta’ Novembru 2019 fil-Katidral Metropolitan ta’ San Pawl fl-Imdina.

Id-Direttur tad-Dar tal-Providenza, Fr Martin Micallef ingħata donazzjoni ġeneruża mill-fondi miġbura fiż-żewġ kunċerti u rringrazzja lis-St. Paul Metropolitan Orchestra u lil dawk kollha involuti għall-appoġġ kontinwu tagħhom.

Tħabbret il-mewt ta’ Albert E. Vella sostenitur tad-Dar tal-Providenza u rebbieħ tal-Premju Mons. Mikiel Azzopardi. Huwa twieled ir-Rabat u fl-1959 beda l-karriera tiegħu  ta’ bankier man-National Bank qabel ma mar mal-Bank Ċentrali ta’ Malta. Fl-1977 mar il-Kanada u fl-1993 inħatar ir-rappreżentat ewlieni tal-Bank of Valletta fil-Kanada u l-Amerika ta’ Fuq fejn dam għal tnax-il sena sħaħ.

Allbert Vella organizza l-kunċert annwali tal-Bank of Valletta li permezz tiegħu u l-ġenerożità tal-komunità Maltija nġabru fondi kbar li minnhon gawdiet id-Dar tal-Providenza.

Fl-2006, ingħata l-Premju Mons. Mikiel Azzopardi li jingħata b’rikonoxximent għall-ħidma li ssir b’risq id-Dar tal-Providenza.

Id-Dar tal-Providenza tixtieq tesprimi l-kondoljanzi tagħha lill-Familja Vella.

Nhar il-Ġimgħa, 27 ta’ Settembru, il-Forzi Armati ta’ Malta bil-koperazzjoni tal-Pulizija ta’ Malta u tal-Malta Bike Marshals organizzaw id-dawra annwali bil-muturi b’risq id-Dar tal-Providenza. Il-muturi nġabru fil-Barracks ta’ Ħal Luqa fis-6.00pm fejn sar it-tberik tal-muturi mill-kappillan tal-Forzi Armati ta’ Malta, Fr Joe Meli. Wara d-dawra bil-muturi waslu d-Dar tal-Providenza fis-Siġġiewi fejn l-Armata organizzat pasta night għal dawk kollha li ħadu sehem.

Il-Kurunell Brian Gatt, f’isem it-tim organizzattiv ippreżenta ċekk ta’ €1,270 li nġabru waqt l-attività lil Fr Martin Micallef, Direttur tad-Dar tal-Providenza.

Waqt l-Udjenzja Ġenerali tal-Erbgħa filgħodu, l-Papa Franġisku ltaqa’ ma’ grupp ta’ persuni b’diżabilità intellettwali membri tal-Grupp Flimkien Naslu f’Malta.

Il-Grupp Flimkien Naslu, li twaqqaf fl-2004, huwa grupp immexxi minn persuni b’diżabilità intellettwali bis-sapport meħtieġ li jorganizza attivitajiet soċjali għall-membri u l-ħbieb tagħhom.

Lourdes Farrugia, President tal-Grupp, qalet li l-laqgħa mal-Papa kienet esperjenza sabiħa. Malcom Camilleri, li kien emozjonat ħafna bħall-kumplament tal-grupp, qal li ħa gost jara lill-Papa u jixtieq jerġa’ jarah darba oħra. John Paul Fenech qal li din il-laqgħa mal-Papa, li kienet l-ewwel darba għalih, emozjonatu ħafna.

Nhar is-Sibt 12 ta’ Ottubru 2019, numru sabiħ ta’ residenti, ħaddiema u voluntiera tad-Dar tal-Providenza għamlu pellegrinaġġ Marjan fis-Santwarju Ta’ Pinu, f’Għawdex fl-okkażjoni tal-400 sena minn meta tpitter il-kwadru mirakoluż tal-Madonna Ta’ Pinu fl-1619 u tħallas minn Pinu Gauci, li minnu ġej l-isem tal-Madonna Ta’ Pinu.

Dawk kollha li attendew ħadu sehem f’quddiesa fl-istess Santwarju li tmexxiet minn Fr Martin Micallef. L-omelija saret minn Fr Gerald Buhagiar, Rettur tas-Santwarju.
Wara, dawk kollha preżenti attendew għal ikla flimkien ix-Xlendi.

Kien fl-1883, nhar it-22 ta’ Ġunju, li x-xebba Karmni Grima semgħet il-leħen tal-Verġni Marija mill-Kwadru tagħha jsejħilha: “Ejja, ejja…”, u meta daħlet fil-kappella mill-ġdid il-leħen mill-kwadru talabha biex “tgħid tliet Ave f’ġieħ it-tlitt ijiem li ġismi dam fil-qabar”. Imma l-ġrajja Ta’ Pinu ma tiqafx hawn. Lil Franġisk Portelli, ġuvni mill-Għarb, ħabib u ġar ta’ Karmni u devot kbir tal-Madonna Ta’ Pinu, li spiss kien jinġabar jitlob fis-skiet tal-kappella, il-Madonna wkoll talbitu: “Ħabrek biex tkun devot lejn il-pjaga tal-ispalla ta’ Ibni li kienet magħmula mis-salib, waqt li kien tiela’ għall-Kalvarju, u ħabrek ħalli anki l-oħrajn ikollhom l-istess devozzjoni”.