Archive for category: Aħbarijiet

Il-Futur u l-Aċċessibilità

“Fl-okkażjoni tal-Jum Dinji tal-Persuni b’Diżabilità, nġeddu l-ħarsa tagħna tal-fidi li tara l-preżenza ta’ Kristu stess f’ħutna li jqis kull ġest ta’ mħabba mal-iżgħar fost ħutna magħmul miegħu (Ara Mattew 25,4). F’din l-okkażjoni nixtieq infakkar kif illum il-promozzjoni għad-drittijiet tal-parteċipazzjoni tilgħab irwol ċentrali biex tingħeleb id-diskriminazzjoni u tiġi promossa kultura li tilqa’ u kwalità ta’ ħajja.”

“Sar progress kbir favur il-persuna b’diżabilità fil-qasam mediku u soċjali, iżda madankollu għadna naraw il-preżenza tal-kultura tal-iskart u ħafna minnhom iħossu li jeżistu mingħajr ma jappartjenu u mingħajr parteċipazzjoni. Dan kollu jitlob mhux biss li d-drittijiet tal-persuni b’diżabilità u l-familjari tagħhom ikunu protetti imma jitlob minna li nagħmlu dinja aktar umana billi nwarrbu dak kollu li jtellifhom li jkunu ċittadini sħaħ, l-ostakli tal-preġudizzju u billi nippromovu l-aċċessibbilità fiżika u l-kwalità ta’ ħajja, filwaqt li nżommu quddiem għajnejna d-dimensjonijiet kollha tal-persuna umana.”

“Hu neċessarju li nappoġġjaw u nakkumpanjaw lill-persuni b’diżabilità f’kull stadju tal-ħajja, anke bl-użu tat-teknoloġija tal-lum, imma mingħajr ma nqisuhom bħala xi ħaġa assoluta. Bil-qawwa u d-delikatezza nindirizzaw sitwazzjonijiet ta’ emarginizazzjoni u nimxu t-triq magħhom u ”nidilkuhom” bid-dinjità għall-parteċipazzjoni attiva fil-komunità ċivili u ekklesjali. Hu vjagg impenjattiv u anke diffiċli li jgħin ħafna biex jiġu ffurmati kuxjenzi li kapaċi jirrikonoxxu li kull wieħed minna hu persuna unika u irrepetuta.”

“U ejjew ma ninsewx il-ħafna “eżiljati moħbija,” li jgħixu fi djarna, fil-familji tagħna u fis-soċjetà tagħna. (Ara Anġelus, Id-29 ta’ Diċembru 2013; Diskors lill-Korp Diplomatiku, It-12 ta’ Jannar 2015). Naħseb f’nies ta’ kull età, b’mod speċjali l-anzjani, li anke minħabba d-diżabilità, kultant huma meqjusa bħala piż, “preżenza skomda” b’riskju li jkunu mwarrba u jsibu lilu infushom imċaħħda minn xogħol prospettiv għall-bini tal-futur tagħna.”

“Aħna msejjħa biex nirrikonoxxu f’kull persuna b’diżabilità, anke dawk b’diżabilità severa, kontribuzzjoni unika għall-ġid komuni permezz tal-istorja partikulari tiegħu jew taghha.”

“Nirrikonoxxu d-dinjità ta’ kull persuna konxji li din ma tiddependix fuq il-funzjonalità tal-ħames sensi. (Ara Diskussjoni mal-parteċipanti waqt il-Konvenzjoni taċ-CEI fuq id-diżabilità. Il-11 ta’ Ġunju 2016). L-Evanġelju jgħallimna nagħmlu din il-konverżjoni. Hu neċessarju li niżviluppaw reżistenza kontra l-kultura li tqis ċertu ħajjiet li huma Serje A u oħrajn li huma Serje B. Dan hu dnub soċjali.  Ħa jkollkom il-kuraġġ li tagħtu vuċi lil dawk li huma diskriminati minħabba d-diżabilità tagħhom għax sfortunatament f’ċerti pajjizi sa llum m’humiex rikonoxxuti bħala persuni b’dinjità ndaqs, bħala aħwa fl-umanità.”

“Infatti li tagħmel liġijiet tajbin u li twaqqa’ barrieri fiżiċi huwa mportanti imma dan mhux biżżejjed jekk ma tiġġilidx il-mentalità, jekk ma tirbaħx il-kutura mifruxa li toħloq disugwaljanza li timpedixxi l-persuni b’diżabilità minn parteċipazzjoni attiva fil-ħajja ta’ kuljum.”

“F’dawn l-aħħar snin saru u tmexxew il-quddiem inizzjattivi ta’ inklussività, imma dan mhux biżżejjed għax il-preġudizzji, barra l-barrieri fiżiċi, joħolqu anke limiti ta’ aċċess għall-edukazzjoni għal kulħadd, għax-xogħol u parteċipazzjoni. Biex persuna b’diżabilità tilħaq l-aspirazzjonijiet tagħha għandha bżonn mhux biss teżisti imma li tħoss appartenenza għal komunità.”

“Inħeġġeġ lil dawk kollha li jaħdmu mal-persuni b’diżabilità biex ikomplu b’dan is-servizz u mpenn importanti li juri l-kejl taċ-ċiviltà ta’ nazzjon. U jien nitlob li kull persuna tħoss il-ħarsa paterna ta’ Alla li jafferma d-dinjità sħiħa u l-valur inkundizzjonzat tal-ħajja tiegħu.”

Mill-Belt tal-Vatikan.  Illum, it-3 ta’ Diċembru 2019

Franġisku

Is-St. Paul Metropolitan Orchestra, taħt it-direzzjoni tax-Chev. Mro. Mark Agius, tat żewġ kunċerti b’risq Id-Dar tal-Providenza. L-ewwel wieħed kien ‘Fewġa Klassika’ fil-knisja parrokkjali ta’ Santa Luċija fl-10 ta’ Settembru li għadda. It-tieni wieħed, ‘Requiem e Resurrectio et Vita’ sar fit-8 ta’ Novembru 2019 fil-Katidral Metropolitan ta’ San Pawl fl-Imdina.

Id-Direttur tad-Dar tal-Providenza, Fr Martin Micallef ingħata donazzjoni ġeneruża mill-fondi miġbura fiż-żewġ kunċerti u rringrazzja lis-St. Paul Metropolitan Orchestra u lil dawk kollha involuti għall-appoġġ kontinwu tagħhom.

Tħabbret il-mewt ta’ Albert E. Vella sostenitur tad-Dar tal-Providenza u rebbieħ tal-Premju Mons. Mikiel Azzopardi. Huwa twieled ir-Rabat u fl-1959 beda l-karriera tiegħu  ta’ bankier man-National Bank qabel ma mar mal-Bank Ċentrali ta’ Malta. Fl-1977 mar il-Kanada u fl-1993 inħatar ir-rappreżentat ewlieni tal-Bank of Valletta fil-Kanada u l-Amerika ta’ Fuq fejn dam għal tnax-il sena sħaħ.

Allbert Vella organizza l-kunċert annwali tal-Bank of Valletta li permezz tiegħu u l-ġenerożità tal-komunità Maltija nġabru fondi kbar li minnhon gawdiet id-Dar tal-Providenza.

Fl-2006, ingħata l-Premju Mons. Mikiel Azzopardi li jingħata b’rikonoxximent għall-ħidma li ssir b’risq id-Dar tal-Providenza.

Id-Dar tal-Providenza tixtieq tesprimi l-kondoljanzi tagħha lill-Familja Vella.

Nhar il-Ġimgħa, 27 ta’ Settembru, il-Forzi Armati ta’ Malta bil-koperazzjoni tal-Pulizija ta’ Malta u tal-Malta Bike Marshals organizzaw id-dawra annwali bil-muturi b’risq id-Dar tal-Providenza. Il-muturi nġabru fil-Barracks ta’ Ħal Luqa fis-6.00pm fejn sar it-tberik tal-muturi mill-kappillan tal-Forzi Armati ta’ Malta, Fr Joe Meli. Wara d-dawra bil-muturi waslu d-Dar tal-Providenza fis-Siġġiewi fejn l-Armata organizzat pasta night għal dawk kollha li ħadu sehem.

Il-Kurunell Brian Gatt, f’isem it-tim organizzattiv ippreżenta ċekk ta’ €1,270 li nġabru waqt l-attività lil Fr Martin Micallef, Direttur tad-Dar tal-Providenza.