L-Azzjoni Kattolika Maltija tfakkar id-90 sena mit-twaqqif tagħha

/fi /by

Id-Dar tal-Providenza tixtieq tifraħ lill-Azzjoni Kattolika Maltija fl-okkażjoni ta’ għeluq id-90 sena mit-twaqqif tagħha u tawguralha aktar ħidma fis-snin li ġejjin. L-Azzjoni Kattolika Maltija tul dawn is-snin tat kontribut imprezzabbli b’mod speċjali fil-formazzjoni spiritwali u umana tal-membri tagħha minn kull qasam tas-soċjetà, fl-impenn soċjali u fl-evanġelizazzjoni.
L-Azzjoni Kattolika għandha rabta diretta u inseparabbli mad-Dar tal-Providenza għax kien Dun Mikiel Azzopardi, l-Assistent Ekkleżjastiku tagħha li bl-approvazzjoni tagħha waqqaf id-Dar tal-Providenza fil-post li l-Azzjoni Kattolika kienet akkwistat b’ċens minn għand l-Ammiraljat lura fl-1962.
Id-Dar tal-Providenza tawgura li dan l-anniversarju jkun mument sabiħ ta’ apprezzament mis-soċjetà Maltija għall-ħidma kbira li wettqet l-Azzjoni Kattolika Maltija tul is-snin kif ukoll okkażjoni biex l-istess organizzazzjoni tkompli ssaħħaħ l-impenn fost iż-żgħażagħ u l-adulti biex ikunu melħ li jagħti t-togħma u d-dawl li jdawwal lis-soċjetà tal-llum bil-ħajja u l-impenn nisrani tagħhom.
Inħeġġu lil kull min jista’ jingħaqad mal-Azzjoni Kattolika Maltija għal quddiesa ta’ ringrazzjament immexxija mill-E.T. Mons Joseph Galea-Curmi li ser issir fil-Knisja Arċipretali ta’ San Bastjan, Ħal Qormi nhar il-Ħadd, 16 ta’ Frar fl-4.00pm.

Il-Kap Eżekuttiv il-ġdida ta’ Aġenzija Sapport iżżur Dar Shalom fiż-Żurrieq

/fi /by

Is-Sinjura Ruth Sciberras, Kap Eżekuttiv il-ġdida ta’ Aġenzija Sapport għamlet żjara ta’ kotesija lir-residenti li jgħixu f’Shalom fiż-Żurrieq, waħda mid-djar tagħna fil-komunita’. Jilqgħu lis-Sinjura Sciberras kien hemm ir-residenti tad-Dar, id-Direttur Fr Martin Micallef, l-Amministratur, Ms Nadine Camilleri Cassano, il-koordinatur tas-servizzi, Ms Remona Cuschieri u żewġ ħaddiema tad-dar.

Is-Sinjura Sciberras għandha esperjenza twila fil-qasam soċjali, hekk kif, bħala social worker professjonali, ilha taħdem f’dan il-qasam għal dawn l-aħħar 22 sena. Kemm kienet ilha fl-Aġenzija Appoġġ, is-Sinjura Sciberras ħadmet f’diversi oqsma ta’ din l-aġenzija, b’xogħol mat-tfal, żgħażagħ, u l-familji tagħhom. Is-Sinjura Sciberras hija wkoll Chairperson tal-Kumitat għat-Trobbija Pożittiva.

‘Shalom’ ġiet inawgurata fit-8 ta’ April 2016, minn Dr Justyne Caruana, Segretarju Parlamentari għad-Drittijiet tal-Persuni b’Diżabilità u Anżjanità Attiva. F’din id-dar jgħixu ħames persuni b’diżabilita’ intellettwali.

Id-Dar tal-Providenza tfakkar lill-Kardinal Prospero Grech OSA

/fi , /by

Id-Dar tal-Providenza fakkret il-memorja tal-Kardinal Prospero Grech f’għeluq ix-xahar mill-mewt tiegħu permezz ta’ quddiesa li saret fil-kappella tad-Dar u li għaliha attendew ukoll il-qraba tal-Kardinal flimkien mar-residenti. Il-quddiesa kienet konċelebrata minn Fr Martin Micallef, Direttur tad-Dar tal-Providenza u Fr Lino Cardona SJ.

Għall-okkażjoni, Mons Arċisqof Alfred Xuereb, Nunzju Appostoliku għall-Korea u l-Mongolja, li kien jaf mill-qrib lill-Kardinal, intalab jagħmel messaġġ qasir biex jinqara waqt is-sagrifiċċju tal-quddiesa għal ruħu. Mons. Xuereb qal hekk: “Dan jagħtini okkażjoni tajba sabiex, minkejja l-bogħod li jifridna, ningħaqad magħkom spiritwalment ħalli noffri talb ta’ sagrifiċċju għal ruħu u fl-istess waqt nagħti l-aħħar tislima lil persuna speċjali li għamlet ġieħ lill-Knisja ta’ Kristu u lill-Art Twelidna”.

“Nibqa’ ngħożż bħal teżor il-konoxxenza li għamilt tiegħu bħala reliġjuż ferrieħi, li għażel li jħalli kollox warajh biex jimxi wara Ġesù. L-umoriżmu raffinat tiegħu kien xhieda ċara tal-għaqda li żamm ma’ Alla u tal-fedeltà għall-wegħdiet li għamel meta daħal fl-Ordni Agostinjan.”

“Ibbenefikaw eluf ta’ studenti li segwew il-korsijiet tiegħu, u magħhom dawk kollha li studjaw fuq il-kitbiet mimlija għerf li ppublika tul il-kariga akkademika tiegħu. Ibbenefikaw il-patrijiet sħabu li magħhom kien jgħix fil-komunità f’Ruma bil-pariri għaqlin u l-manjieri ħelwa tiegħu. Ibbenefikaw il-parruċċani ta’ Sant’Anna bil-meditazzjonijiet sbieħ li kien joffri fiż-żmien tar-Randan. Ibbenefikaw bil-bosta s-Santa Sede bil-kollaborazzjoni siewja li offra bħal konsultur tal-Kongregazzjoni tal-Fidi. Ibbenefikaw ukoll l-Istitut Patristiku “Agostinianum” u l-Kummissjoni Pontifiċja Bibblika li tagħhom kien membru attiv. Ibbenefikaw l-Kulleġġ tal-Kardinali li sar jagħmel parti minnu meta l-Papa Benedittu XVI ħatru Kardinal fi Frar 2012 u b’mod partikolari meta ġie mitlub joffri l-meditazzjoni fil-ftuħ tal-aħħar konklavi f’Marzu tal-2013. Ibbenefikaw dawk kollha li kellhom ix-xorti jsiru jafuh u se jkomplu jibbenefikaw dawk kollha li jibqghu jiftakruh.”

Mons. Xuereb temm jgħid fil-messaġġ tiegħu: “Meta l-Mulej sejjaħlu biex jagħtiħ il-premju mistħoqq, qalbna mtliet bid-dieqa għax tlifna ħabib li kien għaniena bil-kwalitajiet sbieħ tiegħu. Nistħajlu qed jittawwal mis-Sema lejn il-poplu ta’ Malta u ta’ Għawdex, u jħeġġeġ lilna llkoll biex nagħmlu l-qalb għax issa nistgħu nibbenefikaw mit-talb ta’ interċessjoni tiegħu lil Alla biex inżommu sħaħ fil-fidi u nibgħu poplu magħqud fl-imħabba tal-aħwa.”

Il-Kardinal Prospero Grech miet fit-30 ta’ Diċembru, wara li lejlet il-Milied għalaq 94 sena. Bħal ommu Amelia u missieru Vincent, li kienu benefatturi tad-Dar, huwa kellu ħafna għal qalbu lid-Dar tas-Siġġiewi u għamel żewġ żjarat kemm kien ilu Kardinal.

Ftehim Kollettiv Ġdid għall-ħaddiema tad-Dar tal-Providenza

/fi /by

Ġie ffirmat ftehim kollettiv ġdid bejn id-Dar tal-Providenza u l-General Workers Union (GWU). Il-ftehim, li jkopri l-perjodu bejn l-2020 u l-2023, jipprovdi għal kundizzjonijiet aħjar ta’ xogħol għal ħaddiema kollha, fosthom family friendly measures kif ukoll struttura ġdida tal-gradi u progressions għall-gradi kollha. Qed jitjiebu wkoll is-salarji kif ukoll diversi kundizzjonijiet oħrajn.

Il-ftehim ġie ffirmat mid-Direttur tad-Dar, Fr Martin Micallef u mis-Sinjura Riccarda Darmanin, Segretarju tat-Taqsima Professjonisti, Finanzi u Servizzi tal-GWU. Il-ftehim ġie ffirmat ukoll mis-Sinjura Nadine Camilleri Cassano, Amministratur tad-Dar tal-Providenza, is-Sur Paul Micallef, Assistent Segretarju tal-istess Taqsima tal-GWU u s-Sur Frans Micallef, Shop Steward tal-ħaddiema. Preżenti għall-iffirmar kien hemm is-Sur Michael Pace Ross, Segretarju Amministrattiv tal-Arċidjoċesi ta’ Malta.

Dan il-ftehim ġie spjegat lill-ħaddiema tad-Dar tal-Providenza u approvat f’laqgħa li nżammet ftit ġranet qabel. Il-ftehim kien approvat ukoll mill-Kumitat Finanzjarju Djoċesan, ippresedut mill-Arċisqof Charles J. Scicluna.

Wara l-iffrimar ta’ dan il-Ftehim, Fr Martin irringrazzja lil dawk kollha li taw sehemhom fin-negozjar tat-tielet Ftehim Kollettiv għall-ħaddiema li sar f’atmosfera ta’ rispett reċiproku u b’xewqa li jkomplu jitjiebu l-kundizzjonijiet u s-salarji tal-ħaddiema kollha tad-Dar tal-Providenza. Huwa żied jgħid li r-rieda li nżidu l-pagi għall-ħaddiema ma jirriflettix biss sens ta’ ġustizzja imma wkoll apprezzament għall-impenn u d-dedikazzjoni kbira tal-ħaddiema tad-Dar.

Is-Sinjura Darmanin f’isem it-Taqsima Professjonisti, Finanzi u Servizzi tal-GWU uriet is-sodisfazzjon tagħha għall-mod kif saru n-negozjati fejn kien hemm rieda tajba mill-partijiet konċernati u b’hekk kienu konkluzi għas-sodisfazzjon tal-partijiet kollha.

Vjaġġ lejn Fatima

/fi /by

F’Mejju li ġej se jsir pellegrinaġġ għal Fatima fil-Portugall, li se jitmexxa minn Fr Martin Micallef, Direttur tad-Dar tal-Providenza, fl-okkażjoni tal-ewwel dehra tal-Madonna. Qed nagħtu l-programm dettaljat għal min minnkom jista’ jkun interessat. Id-dħul mill-vjaġġ se jkun kollu b’risq id-Dar.

Dettalji dwar il-Vjaġġ lejn Fatima

GRAZZI mid-Dar tal-Providenza għall-Festa ta’ Ġenerożità

/fi /by

Somma rekord ta’ €1,365,556 inġabret waqt il-Festa ta’ Ġenerożità organizzata mid-Dar tal-Providenza fl-ewwel tas-sena ‘l ġdida. Bosta kienu dawk li marru s-Siġġiewi biex jagħmlu d-donazzjoni tagħhom taħt it-tinda li ttellgħet fil-parkeġġ imma ħafna kienu wkoll dawk li ċemplu biex jagħmlu d-donazzjoni tagħhom. Bħal kull sena, għadd ta’ parroċċi f’Malta w Għawdex organizzaw ġabriet speċjali li mbagħad ingħataw lid-Dar f’isem il-komunità parrokkjali.

Id-Direttur tad-Dar tal-Providenza, Fr Martin Micallef, qal li din il-Festa ta’ Ġenerożità bħal dejjem uriet il-qalb kbira tal-poplu Malti u Għawdxi li għal darb’oħra wera solidarjetà u ġenerożità mad-Dar. Huwa qal li dawn il-fondi se jgħinu biex id-Dar tkompli ttejjeb il-kwalità tal-ħajja tar-residenti tagħha kemm fid-Dar tas-Siġġiewi kif ukoll fid-djar li hemm fil-komunità.

L-ewwel żjara saret minn Mons Arċisqof Charles J. Scicluna li wkoll iċċelebra quddiesa fil-kappella tad-Dar tal-Providenza li għaliha attenda s-Segretarju Parlamentari għad-Drittijiet tal-Persuni b’Diżabilità u Anzjanità Attiva, Anthony Agius Decelis. Fl-omelija tiegħu l-Arċisqof qal: “Għandna nħallu lil Alla jħares lejna ghax b’hekk il-ħarsa tagħna lejn xulxin issir il-ħarsa ta’ Alla ħierġa mill-qalb.” Huwa kompla jgħid, “kemm hija ħaġa sabiħa li l-Maltin u Għawdxin jibdew is-sena ‘l ġdida jgħinu lil xulxin b’atti ta’ solidarjetà anke fiċ-ċrieki qrib tagħna. Hemm ħafna modi oħra ta’ faqar minbarra l-finanzi, waħda minnhom hija s-solitudni fejn bniedem iħossu waħdu u mwarrab mis-soċjetà.” L-Arċisqof Scicluna appella biex il-poplu Malti u Għawdxi jibqa’ jappoġġja in-nisġa ta’ djar li d-Dar tal-Providenza għandha f’diversi lokalitajiet biex persuni bi bżonnijiet speċjali jkunu jistgħu jibqgħu jgħixu fil-qalb tal-komunità.

Matul il-jum kien hemm żjarat mill-President ta’ Malta, Dott. George Vella u s-Sinjura Vella, il-Prim Ministru Joseph Muscat u s-Sinjura Muscat u l-Isqof Awżiljarju Mons Joseph Galea-Curmi. Attendew għadd ta’ ministri u membri parlamentari miż-żewġ naħat tal-Kamra tad-Deputati kif ukoll delegati tal-partit politiċi ewlenin u rappreżentanti ta’ korpi kostitwiti li qattgħu ħin iwieġbu t-telefonati tal-pubbliku.

Fl-okkażjoni tas-sena li fiha l-Knisja se tkun qed tfakkar il-mitt sena mit-twelid ta’ San Ġwanni Pawlu II fit-18 ta’ Mejju 1920, matul il-ġurnata fil-kappella kienet esposta għall-qima u t-talb tal-pubbliku relikwa b’garża bid-demm tiegħu ta’ meta Mehmet Ali Ağca sparalu fi Pjazza San Pietru fit-13 ta’ Mejju 1981. Din ir-relikwa irregalata lid-Dar Sr Marija Bambina Bugeja, soru Maltija li kienet assistiet lill-Papa waqt li kien rikoverat fil-Policlinico Gemelli.

Bosta żaru l-wirja tax-xogħlijiet tal-arti mogħtija minn għadd ta’ artisti Maltin u barranin li ttellgħet fis-Sala San Pawl. L-irkant ta’ dawn ix-xogħlijiet, li b’kollox kien madwar mitt biċċa, din id-darba se jsir f’April li ġej f’data li titħabbar aktar tard. Is-sena l-oħra ġew irkantati b’kemm jiswew €29,487 f’pitturi u skulturi.

Ix-xandira televiżiva bdiet fid-9.00am b’quddiesa mill-kappella tad-Dar u baqgħet sejra sa wara nofsillejl meta tħabbret is-somma totali fost is-soltu ferħ u briju ta’ l-għadd kbir ta’ voluntiera li taw ħinhom għal din il-Festa ta’ Ġenerożità. TVM1, TVM2, ONE TV u NET TV ingħaqdu f’ħinijiet twal fix-xandira diretta ta’ ftit aktar minn ħmistax-il siegħa. Matul ix-xandira kien hemm programm sħieħ ta’ divertiment taħt it-tinda bis-sehem ta’ kantanti u mużiċisti ewlenin Maltin.

Id-Dar tal-Providenza issellem il-memorja tal-Kardinal Prospero Grech

/fi /by

Id-Dar tal-Providenza issellem il-memorja għażiża tal-Kardinal Prospero Grech O.S.A. li l-mewt tiegħu tħabbret il-bieraħ. Bħal ommu Amelia u missieru Vincent li kienu benefatturi tad-Dar, huwa kellu ħafna għal qalbu lid-Dar tas-Siġġiewi u għamel żewġ żjarat kemm kien ilu Kardinal l-ewwel waħda kienet f’Awwissu 2012. Lejlet il-Milied, il-Kardinal Grech għalaq 94 sena.
Il-Patri Agostinjan Prospero Grech kien inħatar Kardinal mill-Papa Emeritu Benedittu XVI fi Frar tal-2012.
L-Arċisqof Charles Scicluna, l-Isqof Mario Grech u l-Isqof Awżiljarju Joseph Galea-Curmi wasslu l-kondoljanzi tagħhom lill-qraba tal-Kardinal Prospero u lill-familja reliġjuża Agostinjana kollha, filwaqt li jħeġġu lill-Insara kollha joffru talb ta’ suffraġju għal ruħu.
Il-Mulej jgħannqu miegħu u jagħtih il-mistrieħ ta’ dejjem.

Il-Malta Philharmonic Orchestra b’kunċert tal-Milied fid-Dar tal-Providenza

/fi /by

Nhar il-Ġimgħa 20 ta’ Diċembru, il-Bank Ċentrali ta’ Malta bil-kollaborazzjoni tal-Malta Philharmonic Orchestra, tella’ kunċert tal-Milied għar-residenti tad-Dar tal-Providenza fis-Siġġiewi.   Fost dawk preżenti kien hemm Dr Mario Vella, Gvernatur tal-Bank Ċentrali u s-Sinjura Victoria Vella,  Mro. Sigmund Mifsud, Chairman Eżekuttiv tal-Malta Philharmonic Orchestra u Fr Martin Micallef, Direttur tad-Dar tal-Providenza.

F’diskors qasir tal-okkażjoni, Fr Martin Micallef f’isem ir-residenti rringrazzja lill-Gvernatur għan-nom tal-Bank Ċentrali li għoġbu jagħżel li jtella’ dan il-kunċert fid-Dar tal-Providenza bħala parti mir-responsabbilità soċjali korporativa tal-Bank.  Il-Bank Ċentrali kien wieħed mill-Corporate Sponsors tal-Orkestra mill-2017 u l-kunċert kien wieħed mill-attivitajiet li jagħmel fil-komunità.

Huwa fakkar li l-Bank Ċentrali sa mit-twaqqif tiegħu dejjem kien ta’ appoġġ lid-Dar tal-Providenza b’diversi inizjattivi li għalihom id-Dar hi ferm grata.  Fi tmiem id-diskors tiegħu Fr Martin ippreżenta tifkira lill-Gvernatur.

Ritratti: Melvin Bugeja

Festa oħra ta’ Ġenerożità mad-Dar tal-Providenza fl-Ewwel ta’ Jannar

/fi /by

Ingħataw dettalji tal-erba’ w għoxrin edizzjoni tal-Festa ta’ Ġenerożità li ssir fl-Ewwel ta’ Jannar ta’ kull sena organizzata mid-Dar tal-Providenza biex jinġabru fondi ħalli d-Dar tas-Siġġiewi tkun tista’ tkompli bil-ħidma tagħha u ssaħħaħa. Dan qalu Fr Martin Micallef, Direttur tad-Dar, waqt konferenza tal-aħbarijiet li saret dalgħodu (It-Tlieta, 17 ta’ Diċembru).

Fr Martin ħabbar li d-Dar tal-Providenza għamlet pass importanti meta akkwistat il-Liċenzji meħtieġa għall-operat ta’ kull dar li għandha kif kien mitlub minnha mill-Awtorità għall-Istandards ta’ Ħarsien Soċjali (SCSA) li twaqqfet  b’att legali s-sena l-oħra. Permezz ta’ din il-liċenzja, id-Dar tal-Providenza qed turi fil-konkret li hi mpenjata li tipproteġi u ttejjeb id-dinjità, is-sigurtà u l-ħarsien soċjali tar-residenti u kull min ikollu bżonn is-servizzi tagħha. Id-Dar tal-Providenza hija wkoll reġistrata mal-Kummissarju għall-Organizzazzjonijiet Volontarji (VO 1066)  biex in-nies ikunu jafu li d-Dar taħdem bi trasparenza u kontabilità sħiħa.

Bħala proġetti għas-sena li ġejja, Fr Martin semma’ l-ftuħ ta’ dar ġdida fil-Komunità tal-Balluta; refurbishment u installazzjoni ta’ lift ġdid f’Dar Żerniq, fis-Siġġiewi; refurbishment tal-erba’ flettijiet f’Villa Papa Giovanni u kors ta’ taħriġ speċjalizzat minn professjonist barrani għall-management u l-ħaddiema dwar “Imġieba Diffiċli”.

Il-Festa ta’ Ġenerożità tibda fid-9.00am b’quddiesa minn Mons Arċisqof Charles J. Scicluna fil-kappella tad-Dar. Matul il-jum kollu fuq il-palk ta’ taħt it-tinda, ikun hemm spettaklu ta’ varjetà u intervisti ma’ għadd ta’ personalitajiet li jżuru d-Dar li jibqa’ sejjer sa nofsillejl. Taħt it-tinda se jkun hemm ukoll il-voluntiera biex jilqgħu d-donazzjonjiet tal-pubbliku. Kull min se jkun qed iżur id-Dar tal-Providenza se jkun qed jingħata rċevuta tad-donazzjoni tiegħu.

Fl-okkażjoni tas-sena li fiha l-Knisja se tkun qed tfakkar il-mitt sena mit-twelid ta’ San Ġwanni Pawlu II, matul il-ġurnata fil-kappella se tkun esposta għall-qima u t-talb tal-pubbliku relikwa b’garża bid-demm tiegħu ta’ meta Mehmet Ali Ağca sparalu fi Pjazza San Pietru fit-13 ta’ Mejju 1981. Din ir-relikwa irregalata lid-Dar soru Maltija li kienet assistiet lill-Papa waqt li kien rikoverat fil-Policlinico Gemelli.

L-irkant ta’ xogħolijiet tal-arti, ġentilment mogħtija minn artist, kemm Maltin kif ukoll barranin li kellu jsir fil-foyer tal-Parlament fil-Belt Valletta nhar il-Ħamis li ġej, 19 ta’ Diċembru ġie pospost għal April tas-sena ddieħla. Madankollu, matul il-Festa ta’ Ġenerożità, il-pubbliku xorta jkun jista’ jżur il-wirja tax-xogħolijiet artistiċi li se tittella’ apposta fis-sala ewlenija tad-Dar.

Ghal benefiċċju ta’ dawk li dakinhar se jżuru d-Dar tal-Providenza se jkun hemm servizz ta’ park-and-ride bejn it-3.00pm u 9.00pm mit-triq ta’ San Niklaw (ir-runway l-antik). Għal dawk li ma jistgħux jaslu sas-Siġġiewi jistgħu isegwu l-Kampanja li se tkun imxandra live fuq l-istazzjonijiet televiżivi ewlenin. Donazzjonijiet jistghu jsiru fl-istess Dar tal-Providenza jew permezz tat-telefon.

Donazzjonijiet jistghu jsiru bit-telefon kif ġej:

Donazzjoni         €10       –     516 02 012

Donazzjoni         €15       –     517 02 013

Donazzjoni         €25       –     518 02 014

SMS Donazzjoni     €7    –     506 18 922

€12,710 miġbura waqt maratona ta’ 30 siegħa mużika fuq 103 Maltasheart

/fi /by

€12,710 inġabru waqt maratona ta’ 30 siegħa mużika fuq 103 Maltasheart organizzat minn Arthur Caruana b’risq Id-Dar tal-Providenza.

Il-maratona bdiet il-Ġimgħa, 6 ta’ Diċembru fis-6.00am u baqgħet sejra sa nofsinhar tal-għada.

Fi tmiem il-maratona, Fr Martin Micallef, Direttur tad-Dar tal-Providenza, irringrazzja lil Arthur u t-tim tiegħu li organizzaw il-maratona: Nescafè, Beacon Media Group, Newsbook, preżentaturi ta’ 103 Maltasheart, kantanti, bands, semmiegħa u dawk kollha li taw l-appoġġ tagħhom permezz ta’ donazzjoni.

L-Arċisqof Charles J. Scicluna u l-Isqof Awżiljarju Joseph Galea Curmi żaru l-istudios ta’ 103 Maltasheart biex jappoġġjaw lil Arthur u t-tim tiegħu kif ukoll biex iħeġġu lill-poplu jagħmel donazzjoni lid-Dar tal-Providenza.