Dar tal-Providenza: Ċelebrazzjoni ta’ mħabba u ta’ għożża.

/fi /by

Ritratt: Ian Noel Pace

L-Isqof Awżiljarju Mons. Joseph Galea-Curmi qal li d-Dar tal-Providenza hija ċelebrazzjoni ta’ mħabba u ta’ għożża b’messaġġ qawwi għal kulħadd. Huwa semma tliet aspetti li joħorġu mill-messaġġ tad-Dar. L-ewwel wieħed huwa l-għożża tal-ħajja mill-bidu tagħha mingħajr ma ħadd ikollu jiddeċiedi liema ħajja tinżamm u liema ħajja tintrema. It-tieni aspett huwa l-inklużjoni fejn kull bniedem ikollu sehem sħieħ fis-soċjetà u fl-aħħarnett hemm il-messaġġ ta’ solidarjetà mal-persuni b’xi diżabilità li jeħtieġilhom kull għamla ta’ appoġġ. Dawn kollha huma sinonomi mad-Dar tal-Providenza li waqqaf Dun Mikiel 57 sena ilu.

L-Isqof Galea-Curmi fakkar li dejjem għandna nkunu strument tal-paċi u mhux tal-firda u nwasslu l-imħabba ta’ Alla lill-oħrajn. L-Isqof talab ukoll biex ikun hemm ħafna ħaddiema fl-għalqa tal-Mulej, “biex ikun hemm ħafna li jwieġbu għas-sejħa tiegħu u biex aħna nkunu kif jixtieqna hu” jiġifieri “nħabbru l-Bxara t-Tajba b’ħafna mħabba, ġenitlezza, kompassjoni u dejjem bi stima kbira lejn il-ħajja u d-dinjità ta’ kull bniedem”.

Għall-quddiesa li fiha ha sehem ukoll Fr Martin Micallef, Direttur tad-Dar, kien hemm għadd ta’ residenti, support workers u ħaddiema.

Qabel il-quddiesa l-Isqof Galea-Curmi iltaqa’ mal-plejers li qed jieħdu sehem fil-Maratona tal-Volleyball b’risq id-Dar tal-Providenza li bdiet il-Ġimgħa filgħaxija u tibqa’ sejra sa nofsillejl tal-lejla.

Il-pubbliku jista’ jgħin billi jċempel fuq dawn in-numri li qed nagħtu aktar l-isfel, juża l-BOV Mobile Banking jew il-PayPal jew jagħti donazzjoni online fil-kontijiet bankarji tad-Dar mal-APS Bank, BOV, HSBC, Lombard Bank u BNF Bank. Għal aktar informazzjoni wieħed jista’ jżur is-sit : www.sabihlitaghti.org

€10 5160 2011

€15 5170 2012

€25 5180 2013

€50 5190 2070

€100 5130 2044

Pledge Line: 2146 3686

BOV Mobile 7932 4834

Maratona ta’ Volleyball, Solidarjetà u Sport

/fi /by

Il-Maratona tal-Volleyball li bdiet il-Ġimgħa filgħaxija tistrieħ fuq żewġ pilastri – is-solidarjetà u l-isport. Dan qalu Fr Martin Micallef, Direttur tad-Dar tal-Providenza, fil-ftuħ tat-12-il edizzjoni tal-Maratona b’risq id-Dar tas-Siġġiewi.  Huwa kompla jgħid li l-ispirtu altruistiku rifless fil-players u numru sabiħ ta’ voluntiera li qed jipparteċipaw f’din il-maratona huwa ritratt mill-isbaħ tal-Maltin u l-Għawdxin li ssibhom dejjem minn ta’ quddiem meta jiġu għas-solidarjetà.

Fr Martin qal li l-appell li għamlilna l-Papa Franġisku meta ġie fostna biex inkunu esperti fl-umanità mhux biss huwa rifless li jsir fid-Dar tal-Providenza, f’tant ħaddiema u voluntiera li jagħtu appoġġ sħiħ lir-residenti b’rispett u b’dinjità fil-bżonnijiet kollha tagħhom, imma huwa rifless ukoll f’attività bħal din meta tara żgħażagħ u adulti impenjati biex jagħti mill-ħin tagħhom lill-ħaddieħor f’dinja li fi kliem il-Papa stess ħafna drabi drat ma tagħtix kas.

Fr Martin irrefera  għas-sentejn li għaddew li matulhom il-Maratona tal-Volleyball ma saritx u ħafna mill-attivitajiet ta’ ġbir ta’ fondi tista’ tgħid waqfu għalkollox. Issa li morna lura għan‑normalità, din il‑maratona qed terġa tiftaħ kalendarju ta’ attivitjiet ta’ ġbir ta’ fondi li huma tant neċessarji għad-Dar biex tkompli toffri servizzi residenzjali tal-ogħla kwalità.

Fr Martin temm billi ħeġġeġ lill‑pubbliku Malti u Għawdxi biex jiġi jissapportja l‑pleyers li b’sagrifiċċju kbir daħlu għal din l‑isfida magħmula aktar diffiċli mit-temperaturi għolja li qed jaħkmu l-gżejjer tagħna, kif ukoll biex jgħinu lid‑Dar tal‑Providenza bid‑donazzjonijiet tiegħu.

Tibda il-Maratona tal-Volleyball b’risq id-Dar tal-Providenza.

/fi /by

Il-President ta’ Malta, l-E.T. Dott. George Vella akkumpanjat mis-Sinjura Vella l-Ġimgħa filgħaxija inawgura t-12-il edizzjoni tal-Maratona tal-Volleyball wara waqfien ta’ sentejn minħabba l-pandemija tal-COVID-19.

F’kelmtejn tal-okkażjoni huwa aċċenna għall-ħidma li twettaq kuljum id-Dar tal-Providenza u li qed tkompli twettaq bl-istess enerġija u determinazzjoni tal-fundatur tagħha Mons. Mikiel Azzopardi. Huwa awgura lill-40 player li għal 53 siegħa sħaħ sal-Ħadd f’nofsilejl se jisfidaw it-temperaturi għoljin li qed jaħkmu din il-maratona.

Il-President qal li din hi okkażjoni biex il-poplu Malti kollu jingħaqad flimkien biex bid-donazzjoni tiegħu jipprovdi lill-persuni b’diżabilità residenti tad-Dar tal-Providenza b’dak kollu li għandhom bżonn għal kwalità ta’ ħajja aħjar li fuq kollox huwa dritt tagħhom.

Preżenti wkoll kien hemm  l-Onor. Clifton Grima, Ministru għall-Edukazzjoni, Sport, Żgħażagħ, Riċerka u Innovazzjoni, l-Onor. Graziella Galea, Kelliema tal-Oppożizzjoni u Ms Nancy Camilleri, Segretarju Permanenti fil-Ministeru għall-Inklużjoni, il-Volontarjat u d-Drittijiet tal-Konsumatur.

Sal-Ħadd li ġej, kull filgħaxija se jkun hemm spettaklu mużikali fuq il‑palk prinċipali, ikel u logħob għat‑tfal.  Il‑Maratona qed tingħata wkoll f’xandiriet diretti fuq l‑istazzjonijiet ewlenin kif ukoll fuq is‑sit elettroniku u l-paġna ta’ Facebook tad‑Dar tal‑Providenza. Minbarra l-40 player protagonisti tal-Maratona hemm ukoll madwar 200 voluntier.

 

Il-pubbliku jista’ jgħin billi jċempel fuq dawn in-numri li qed nagħtu aktar l-isfel, juża l-BOV Mobile Banking jew il-PayPal jew jagħti donazzjoni online fil-kontijiet bankarji tad-Dar mal-APS Bank, BOV, HSBC, Lombard Bank u BNF Bank.  Għal aktar informazzjoni wieħed jista’ jżur is-sit : www.sabihlitaghti.org

€10         5160 2011

€15         5170 2012

€25         5180 2013

€50         5190 2070

€100   5130 2044

Pledge Line: 2146 3686

BOV Mobile  7932 4834

Maratona tal-Volleyball 2022

/fi /by

Wara waqfa ta’ sentejn minħabba l‑pandemija, din is‑sena d‑Dar tal‑Providenza se terġa’ torganizza l‑Maratona tal‑Volleyball b’risq id‑Dar. Dan qalu Fr Martin Micallef, id‑direttur tad‑Dar tal‑Providenza, f’konferenza tal‑aħbarijiet li fiha ngħataw dettalji dwar it‑12‑il edizzjoni ta’ din il‑Maratona.

Il‑Maratona se terġa ssir fil‑carpark tad‑Dar tal‑Providenza fis‑Siġġiewi, bejn il‑Ġimgħa l‑1 ta’ Lulju u l‑Ħadd 3 ta’ Lulju 2022.  Din se tkun inawgurata uffiċċjalment mill‑President ta’ Malta, l‑E.T. Dott. George Vella, il‑Ġimgħa fis‑6:00pm.  40 plejer maqsuma f’ħames timijiet se jkunu qed jilagħbu l‑volleyball għal 53 siegħa sal-Ħadd f’nofsillejl.  Kull filgħaxija se jkun hemm spettaklu mużikali fuq il‑palk prinċipali, ikel u logħob għat‑tfal.  Il‑Maratona se tingħata wkoll f’xandira diretta fuq l‑istazzjonjiet ewlenin kif ukoll fuq is‑sit elettroniku u l-paġna ta’ Facebook tad‑Dar tal‑Providenza.

Fr Martin Micallef fakkar li l‑pandemija tal‑COVID‑19 ma kinitx żmien faċli għad‑Dar tal‑Providenza, imma minkejja dan sar minn kollox biex ir‑residenti jbatu mill‑inqas mill‑iżolament li ġab miegħu dan iż‑żmien diffiċli.   Huwa qal li ħafna mill-attivitajiet ta’ ġbir ta’ fondi tista’ tgħid waqfu għalkollox f’dawn is-sentejn  u allura issa li morna lura għan‑normalità, din il‑maratona qed terġa tiftaħ kalendarju ta’ attivitjiet ta’ ġbir ta’ fondi li huma tant neċessarji għad-Dar biex tkompli toffri servizzi residenzjali tal-ogħla kwalità.

Fr Martin ħabbar ukoll li fix‑xhur li ġejjin id‑Dar se tkun qed tibda proġett ambizzjuż ta’ rinovar ta’ erba’ flettijiet f’Villa Papa Giovanni, fis‑Siġġiewi, liema proġett ma setax jibda minħabba problemi marbuta mal‑pandemija.    Huwa ħeġġeġ lill‑pubbliku Malti u Għawdxi biex waqt il-Maratona jiġi jissapportja l‑pleyers li b’sagrifiċċju kbir se jkun qed jidħlu għal din l‑isfida kif ukoll biex jgħinu lid‑Dar tal‑Providenza bid‑donazzjonijiet tagħhom.

Emmanuel Zammit, Chairperson tal‑kumitat tal‑Maratona tal‑Volleyball. qal li barra l‑40 pleyer li se jkunu l-protagonisti ewlenin ta’ din il-maratona, se jkun hemm ukoll madwar 200 voluntier. Huwa rringrazzja l‑isponsors  kollha, b’mod partikolari l‑Bank of Valletta li hu l‑isponsor ewlieni ta’ din il‑Maratona, l‑istazzjonijet ewlenin tat‑televixin li se jkunu qed ixandru din il‑maratona u lil dawk kollha li b’xi mod jew ieħor qed jgħinu biex din il‑Maratona tkun suċċess.

Il-pubbliku jista’ jgħin billi jċempel fuq dawn in-numri li qed nagħtu aktar l-isfel, juża l-BOV Mobile Banking jew il-PayPal jew jagħti donazzjoni online fil-kontijiet bankarji tad-Dar mal-APS Bank, BOV, HSBC, Lombard Bank u BNF Bank.  Għal aktar informazzjoni wieħed jista’ jżur is-sit : www.sabihlitaghti.org

€10         5160 2011

€15         5170 2012

€25         5180 2013

€50         5190 2070

€100       5130 2044

Pledge Line: 2146 3686

BOV Mobile  7932 4834

Il-Gvern u d-Dar tal-Providenza iġeddu ftehim finanzjarju għal Dar Akkwarell.

/fi /by

Ritratt: DOI Jason Borg

Il-Gvern u d-Dar tal-Providenza iffirmaw ftehim ta’ €350,000 fuq tliet snin biex għall-operat ta’ Dar Akkwarell fil-Qawra. Ftehim li l-Ministru għall-Inklużjoni, il-Volontarjat u d-Drittijiet tal-Konsumatur , Julia Farrugia Portelli iddeskriviet bħala s-siġill tar-relazzjoni eċċellenti li hemm bejn il-Gvern u d-Dar.

Id-Direttur tad-Dar tal-Providenza, Fr Martin Micallef qal li t- tiġdid ta’ dan il-ftehim jassigura li persuni b’diżabilità jkollhom l-opportunità li jgħixu ħajja indipendenti kemm jista’ jkun.

Il-Kap Eżekuttiv tal-Aġenzija Sapport, Oliver Scicluna qal li dan il-ftehim jikkonferma l-ħidma mill-qrib bejn il-Gvern u d-Dar tal-Providenza li tieħu ħsieb ta’ tant persuni b’diżabilità u tara li jkollhom vuċi.

Il-ftehim ġie ffirmat mis-Sinjura Nancy Caruana, Segretarju Permanenti fil-Ministeru, s-Sur Oliver Scicluna għal Aġenzija Sapport u Fr Martin Micallef għad-Dar tal-Providenza.

Dar Akkwarell ġiet inawgurata fit-22 ta’ Novembru  2012 mill-Arċisqof Emeritu, Mons. Pawl Cremona OP. Fiha jgħixu persuni b’diżabilità fiżika bl-appoġġ kollu li għandhom bżonn. Hija waħda minn erbat idjar fil-komunità li d-Dar tal-Providenza għandha fir-raħal tas-Siġġiewi, f’Birkirkara u fiż-Żurrieq. Huwa ttamat li fix-xhur li ġejjin tiġi inawgurata dar oħra f’Balluta.

 

Impjegati tal-Apex Group b’ħidma volontarja fid-Dar tal-Providenza.

/fi /by

Nhar is-Sibt, 21 ta’ Mejju 2022, grupp imdaqqas ta’ impjegati tal-Apex Group qattgħu nofs ta’ nhar  jagħtu daqqa t’id fid-Dar tal-Providenza. Uħud kienu involuti fil-kċina, oħrajn fil-laundry waqt li oħrajn ħaslu l-ħġieġ tat-twieqi tal-kurituri.

Fr Martin Micallef, id-Direttur tad-Dar tal-Providenza irringrazzja wkoll lill-Apex Group u lill-impjegati tiegħu għad-donazzjoni ġeneruża ta’ €1,000 flimkien ma’ oġġetti oħra utli għad-Dar. Huwa faħħar it-turija ta’ solidarjetà li taw ħinhom u middew idejhom għal xogħol li jrid isir kontinwament fid-Dar u li għalih kull għajnuna tiġi apprezzata.

L-Apex Group, huma kumpanija internazzjonali fil-qasam finazjarju. Ilhom joperaw min Malta għal dawn l-aħħar 14-il sena u għandhom 130 impjegat jaħdmu f’Malta.

Prosit Krisstian u Ivan

/fi /by

Id-Dar tal-Providenza tawgura lil Krisstian Gregory u lil Ivan Mangion, residenti tad-Dar għas-suċċess li kisbu fil-għawn waqt l-iSpecial Olympics 2022 li nżammu f’Malta.  Krisstian rebaħ midalja tad-deheb filwaqt li Ivan rebaħ midalja tal-fidda.  Waqt l-iSpecial Olympics, 192 atleta Maltin rebħu midalja li minnhom 65 kienu deheb, 60 fidda u 67 bronż. Krisstian u Ivan kienu fost is-17-il persuna li rebħu midalja fl-għawm.

Awguri lis-Sur Oliver Scicluna u grazzi lis-Sinjura Ruth Sciberras

/fi /by

Id-Dar tal-Providenza tifraħ lis-Sur Oliver Scicluna għall-ħatra tiegħu bħala Kap Eżekuttiv tal-Aġenzija Sapport fi ħdan il Ministeru għall-Inklużjoni, il-Volontarjat u d-Drittijiet tal-Konsumatur.

F’din il-kariga ġdida, is-Sur Scicluna, se jkun qed iġib miegħu għarfien u esperjenza ta’ ħidma kbira fis-settur  tal-persuni b’diżabiltà.  Il-ħidma ġdida tiegħu żgur se tkompli tgħin biex is-servizzi offruti mill-Aġenzija Sapport ikomplu jtejbu l-kwalità tal-ħajja tal-persuni b’diżabilità li jeħtiġuhom.  Għaldaqstant inwegħduh il-koperazzjoni sħiħa tagħna.

Id-Dar tal-Providenza tixtieq tirringrazzja wkoll lis-Sinjura Ruth Sciberras, l-eks Kap Eżekuttiv tal Aġenzija Sapport, tal-ħidma li wettqet fi ħdan l-Aġenzija u tal-koperazzjoni sħiħa li sibna mingħandha fil-ħidma tagħna flimkien.

Jitfakkar it-35 Anniversarju tal-mewt ta’ Dun Mikiel Azzopardi.

/fi /by

“Monsinjur Mikiel Azzopardi li llum, it-13 ta’ Mejju, qed infakkru l-35 anniversarju tal-mewt tiegħu, se jibqa’ mudell għalina bl-imħabba li wera lejn dawk li għandhom diżabilità. Wera wkoll kuraġġ. Kuraġġ ta’ fidi tremenda fil-providenza ta’ Alla u d-Dar tas-Siġġiewi hija xhieda ta’ dan”. Dan qalu Mons. George Frendo O.P. Arċisqof Emeritus ta’ Tirana fl-Albanija,  waqt quddiesa kkonċelebrata biex titfakkar il-mewt tiegħu.

Assistew lill-Arċisqof Frendo Fr Martin Micallef, Direttur, u Fr Trevor Fairclough, Direttur Spiritwali tad-Dar tal-Providenza. Għaliha attendew ir-residenti u l-ħaddiema.  Għal dawn l-aħħar sentejn, minħabba l-pandemija COVID-19 ma setgħetx issir din il-quddiesa kommemorattiva.

Mons. Mikiel Azzopardi, li waqqaf id-Dar fl-1965, twieled fil-Belt Valletta fl-10 ta’ Frar 1910 u miet fit-13 ta’ Mejju 1987, propju 35 sena ilu.

Fl-omelija tiegħu, Monsinjur Frendo indirizza wkoll lill-ħaddiema u qalilhom li l-ħidma tagħhom mhijiex sempliċiment impjieg imma hija verament missjoni u missjoni ta’ mħabba. Inkoraġġihom li fil-wiċċ ta’ kull persuna residenti fid-Dar jaraw il-wiċċ ta’ Kristu u b’hekk il-ħidma mhux biss issir att ta’ karità imma l-ewwel u qabel kollox att ta’ fidi, fidi f’Ġesù li fil-vanġelu qal lill-appostli tiegħu li huwa t-triq li twassalhom għall-verità u l-ħajja.

Din kienet l-ewwel żjara uffiċċjali fid-Dar tal-Providenza għall-Arċisqof Emeritu. Monsinjur George Frendo ttieħed jara l-mużew iddedikat lil Mons. Azzopardi kif ukoll ra b’għajnejh stess uħud mis-servizzi li toffri d-Dar fosthom il-pixxina terapewtika, ċ-ċentru agrikolu San Isidor, iċ-ċentru tal-katekeżi SPRED, kif ukoll il-kmamar multisensorjali.

 

Il-Melita Foundation tisponsorja sistema ta’ drip irrigation tal-mixtla taż-żebbuġ fid-Dar tal-Providenza

/fi /by

Il‑Melita Foundation sponsorjat sistema ta’ drip irrigation għall‑mixtla taż‑żebbuġ li hemm fil‑ġnien tad‑Dar tal‑Providenza. Id‑Dar toffri servizzi residenzjali f’ambjent ta’ familja lil persuni b’diżabilità.

Il‑mixtla, li saret matul is‑snin bil‑għajnuna ta’ diversi benefatturi, hija waħda mill‑postijiet l‑aktar imfittxija mir‑residenti tad‑Dar fis‑Siġġiewi. Barra minn hekk, iż‑żebbuġ li jintgħasar, jinbiegħ mir‑residenti waqt attivitajiet fokloristiċi li jkunu organizzati f’diversi lokalitajiet f’Malta matul is‑sena.

Id‑Direttur tad‑Dar tal‑Providenza, Fr Martin Micallef, qal li “L‑impenn tad-Dar minn dejjem kien li nippromwovu bis‑sħiħ l‑iżvilupp personali ħolistiku tar‑residenti kollha tagħna, li essenzjalment jinkludi wkoll ħin imwaħħad man‑natura. L‑ispazju u t‑trankwilità li tipprovdi l‑mixtla taż‑żebbuġ u x‑xogħol li jistgħu jagħmlu fih, huma ta’ benefiċċju enormi għalihom. Għalhekk huwa ta’ sodisfazzjon għalina li grazzi għall‑Melita Foundation, issa għandna moħħna mistrieħ li ma rridux noqgħodu ninkwetaw li rridu nsaqqu b’mod manwali kuljum aktar minn 300 siġra taż‑żebbuġ li għandna fil‑ġnien.”

Tanya Sammut‑Bonnici, Chairperson tal‑Melita Foundation, qalet li “Għal aktar minn 50 sena, id‑Dar tal‑Providenza ipprovdiet appoġġ mill‑aqwa lill‑persuni b’diżabilità. Dan setgħet tagħmlu wkoll, bis‑saħħa tal‑appoġġ u ġenerożità ta’ eluf ta’ Maltin li bis‑saħħa tagħhom għandha r‑riżorsi umani u finanzjarji meħtieġa għall‑operat tal‑post. Matul is‑snin, kemm Melita kif ukoll il‑Melita Foundation appoġġaw il‑ħidma tad‑Dar u din il‑koperazzjoni se tara li jiġi żgurat li r‑residenti jkomplu jgawdu l‑paċi, is‑sbuħija u l-benefiċċji oħra li toffri l‑mixtla taż‑żebbuġ.”

Aktar informazzjoni dwar il‑Melita Foundation jista’ jinstab fil‑website https://www.melitafoundation.org/