Emmanuel Galea, resident għal diversi snin fid-Dar tal-Providenza il-Ħadd filgħodu kellu x-xorti jiltaqa’ ma’ Papa Franġisku f’laqgħa ma’ persuni vulnerabbli li saret fil Bażilika Kolleġjata ta’ San Pawl fir-Rabat.
Din il-laqgħa saret bħala parti mill-programm imħejji għaż-żjara tal-Qdusija Tiegħu il-Papa bejn it-2 u t-3 ta’ April 2022.
“Ġabu ruħhom magħna bi ħlewwa liema bħalha.” Atti. 28:2
Is-Sibt u l-Ħadd, 2 u 3 ta’ April 2022
Il-Qdusija Tiegħu il-Papa Franġisku temm żjara ta’ jumejn f’pajjiżna wara programm intens ta’ laqgħat u attivitajiet f’Malta u Għawdex. Eluf attendew għal-laqgħa ta’ talb fis-Santwarju Nazzjonali tal-Madonna ta’ Pinu fl-Għarb, Għawdex u għaċ-ċelebrazzjoni ewkaristika fuq il-Fosos tal-Furjana. Kull attività kellha s-sinifikat spiritwali, politika jew soċjali tagħha.
Fil-bidu taż-żjara tiegħu is-Sibt filgħodu il-Papa ġie milqugħ fl-Ajruport Internazzjonali ta’ Malta mill-President ta’ Malta Dr George Vella u s-Sinjura Vella kif ukoll mill-għola awtoritajiet ta’ pajjiżna li awguraw ukoll il-vjaġġ it-tajjeb lura lejn Ruma il-Ħadd filgħaxija.
Fl-omelija tiegħu fuq il-fosos, il-Papa Franġisku qal li m’għandniex noqogħdu ngħoddu lil dawk li jkunu ma’ saqajna imma mmorru nfittxu lil dawk li mhumiex. Ma nibqgħux nippuntaw subgħajna, imma nibdew nisimgħuhom. Ma narmux lil dawk mistkerrha, imma npoġġu fl-ewwel post lil dawk li huma meqjusa tal-aħħar.
Fil-laqgħa ta’ talb fis-Santwarju Nazzjonali Ta’ Pinu, il-Papa Franġisku qal li Malta tinsab f’pożizzjoni ġeografika kruċjali, li hi għall-Mediterran bħal kalamita u port ta’ salvazzjoni għal tant persuni mriegħda mit-tempesti tal-ħajja li, għal diversi raġunijiet, jaslu fuq ix-xtut tagħna. Fil-wiċċ ta’ dawn il-foqra huwa Kristu nnifsu li qed jiġi għandna.
Fost oħrajn, laqgħat sinjifikanti kienu dawk li l-Papa kellu ma’ persuni vulnerabbli fil-Kolleġġjata Bażilika ta’ San Pawl fir-Rabat u mal-immigranti fil-Laboratorju tal-Paċi Ġwanni XXIII f’Ħal Far.
Inizjattiva tal-management u l-istaff tal-Lukanda Dolmen tal-Qawra spiċċat b’donazzjoni ta’ €2,000 lid-Dar tal-Providenza. Iċ-ċiklisti temmew id-dawra bir-roti f’Misraħ San Giovanni XXIII quddiem il-kappella tad-Dar fis-Siġġiewi.
Is-Sur John Muscat, HR Manager tal-Lukanda Dolmen, ippreżenta ċ-ċekk lid-Direttur tad-Dar, Fr Martin Micallef, li f’isem ir-residenti u l-amministrazzjoni irringrazzja lill-management u l-istaff tad-Dolmen għal din l-inizjattiva ta’ solidarjetà mad-Dar tal-Providenza.
Il-112-il Anniversarju mit-Twelid ta’ Mons. Mikiel Azzopardi
Il‑Ħamis, 10 ta’ Frar 2022 jaħbat il‑112‑il Anniversarju mit‑twelid ta’ Mons. Mikiel Azzopardi, il‑fundatur tad‑Dar tal‑Providenza.
Mikiel Azzopardi twieled il‑Belt Valletta, propju f’jum li fih jitfakkar in‑Nawfraġju ta’ San Pawl f’Malta, minn Toninu Azzopardi u Amalja née Galea. Huwa tgħammed tliet ijiem wara fil‑Knisja Parrokkjali tal‑Madonna ta’ Porto Salvo fi Triq Merkanti. Hu rċieva l‑Ewwel Tqarbina fl‑età ta’ sitt snin mill‑Arċisqof Dom Mauro Caruana OSB fil‑Konkatidral ta’ San Ġwann u sena wara rċieva l‑Griżma tal‑Isqof mill‑Isqof Awżiljarju Mons. Angelo Portelli.
Huwa ħa l‑edukazzjoni tiegħu fl‑iskola primarja tal‑Gvern f’Sant Iermu, il‑Belt Valletta, fis‑Seminarju ta’ Għawdex, fil‑Liceo tal‑Belt u fl‑Università Rjali ta’ Malta fejn beda jsegwi l‑kors tal‑Liġi li ma spiċċahx minħabba li ħass is‑sejħa għas‑saċerdozju.
Dun Mikiel kien ordnat saċerdot fit‑22 ta’ Diċembru 1934, fl‑età ta’ 24 sena, mill‑Arċisqof Caruana. Ftit wara l‑ordinazzjoni tiegħu l‑Arċisqof ħatru bħala l‑assistent personali tiegħu. Fl‑1940, sar Assistent Ekkleżjastiku Ġenerali tal‑Azzjoni Kattolika u beda jaħdem biex jorganizza u jxerred dan il‑moviment ekkleżjali tal‑lajċi fil‑parroċċi kollha ta’ Malta u Għawdex. Fi ħdan l‑Arċidjoċesi ta’ Malta huwa waqqaf ukoll, fost oħrajn, il‑Ġunta Djoċesana għall‑Għaqdiet Kattoliċi u l‑Kunsilli Parrokkjali.
Fil‑ħidma pastorali tiegħu skopra li diversi persuni b’diżabilità f’Malta kienu qed jgħixu fi stat deplorevoli tant li kienu jinħbew fil‑kantini, f’ambjenti inumani għall‑aħħar, fejn kultant lanqas l‑aħwa tagħhom stess ma kienu jkunu jafu bihom. Persuni oħra b’diżabilità kienu spiss jiġu rredikolati fil‑pubbliku jew mibgħuta f’xi sptar li mhux adattat għalihom. Dun Mikiel kien iħoss ukoll li diversi familji ta’ persuni b’diżabilità kellhom bżonn urġenti li jsibu min joffrilhom solliev. Kien hawn li nibtet fih l‑idea li jsib post li fih dawn il‑persuni jsibu ambjent fejn jgħixu – ambjent li jixirqilhom u jirrispetta d‑dinjità tagħhom.
Għaldaqstant, fit‑12 ta’ Settembru 1965, b’donazzjoni ġeneruża ta’ Lm100 mogħtija lilu minn mara li kienet faddlithom biex tmur fuq btala. Dan kien il‑ġenesi tad‑Dar tal‑Providenza, l‑ewwel dar f’Malta li bdiet toffri servizzi residenzjali lill‑persuni b’diżabilità. Sal-lum id‑Dar tal‑Providenza għadha miraklu ħaj tal‑Providenza Divina.
Mons. Mikiel Azzopardi miet fit‑13 ta’ Mejju 1987 fl‑età ta’ 77 sena u ndifen fejn dejjem xtaq, fil‑bitħa tad‑Dar tal‑Providenza stess qalb il‑persuni b’dizabiltà li tant kien iħobb.
Ritratt: Residenti jpoġġu fjuri mal-monument ta’ Mons Mikiel Azzopardi fi Triq Mons. Mikiel Azzopardi fis-Siġġiewi.
L-Isqof ta’ Għawdex, l-E.T. Mons. Anton Teuma iddeskriva d-Dar tal-Providenza bħala s-sinjal tal-imħabba ta’ Alla. Huwa kien qed jagħmel l-ewwel żjara tieghu fid-Dar tas-Siġġiewi minn mindu laħaq Isqof tad-Djoċesi ta’ Għawdex f’Awwissu 2020. Huwa ikkonċelebra qudddiesa fil-kappella tad-Dar flimkien mad-Direttur, Fr Martin Micallef.
Fl-omelija tiegħu, l-Isqof Teuma qal li d-Dar tal-Providenza ma kinetx biss turija ta’ dedikazzjoni u mħabba lejn ir-residenti tagħha imma wkoll eżempju għall-Maltin u Għawdxin li ma waqfux isostnuha finanzjarjament u bil-volontarjat li ħafna jagħtu. Huwa faħħar u irringrazzja lil Fr Martin u t-tmexxija tad-Dar, il-carers u l-ħaddiema l-oħra kollha għall-għożża li għandhom għar-residenti li jieħdu ħsieb erba’ u għoxrin siegħa kuljum.
L-Isqof Teuma iltaqa’ ma’ rappreżentanza tar-residenti u l-carers tagħhom, żar il-mużew iddedikat lill-fundatur Mons. Mikiel Azzopardi kif ukoll il-qabar tiegħu. Huwa ra wkoll il-pixxina terapewtika li tintuża kuljum mir-residenti. Waħda mir-residenti ippreżentat hamper ta’ prodotti li jinħadmu mir-residenti stess fiċ-Ċentru Agrikolu San Isidor.
Id-Dar tal-providenza ssellem il-memorja għażiża tas-Sinjura Blanche Mifsud, li kienet voluntiera tad-Dar għal bosta snin u li mietet nhar l-Erbgħa 19 ta’ Jannar 2022 fl-età venerabbli ta’ 92 sena. Fis-sena 2011, hija kienet ingħatat il-Premju Dun Mikiel Azzopardi bħala rikonoxximent għall-ħidma tagħha flimkien mal-mibki Fr Lino Cardona SJ u Mary Versin.
Is-Sinjura Blanche Mifsud twieldet Ħaż-Żabbar fl-1925. Hi żżewġet lil Kostantino Mifsud u kellhom żewġt itfal – Stephen u Elena. Meta romlot fl-1981, is-Sinjura Mifsud talbet lil Monsinjur Azzopardi, li kien ħu r-raġel t’oħtha, biex tibda tgħin fid-Dar tal-Providenza. Minn dak iż-żmien u għal bosta snin baqgħet tagħti jumejn fil-ġimgħa f’ħidma volontarja fid-Dar, l-aktar fil-Bazaar, sakemm irtirat.
Il-Mulej jagħtiha l-mistrieħ ta’ dejjem.
“Għal darba oħra l-poplu Malti u Għawdxi reġa’ wera s-solidarjetà tiegħu mad-Dar tal-Providenza bis-somma ta’ €1,409,085. Fondi li se jgħini lid-Dar tkompli tipprovdi l-aħjar servizzi residenzjali lil 115-il persuna b’diżabilità li jgħixu fid-djar tagħha fis-Siġġiewi u fil-komunità..” Dan qalu Fr Martin Micallef, Direttur tad-Dar, fl-għeluq ta’ maratona televiżiva ta’ tnax-il siegħa. Huwa żied jgħid li jalla li s-solidarjetà li ntweriet fl-ewwel tas-sena mad-Dar tal-Providenza tibqa’ tintwera matul is-sena kollha ma’ dawk fis-soċjetà Maltija li jeħtieġu l-appoġġ.
Minħabba s-sitwazzjoni tal-pandemija Covid-19 li ninsabu fiha, ma sar xejn fil-parkeġġ li hemm fis-Siġġiewi ħlief drive-thru fejn dak li jkun seta’ jwassal id-donazzjoni tiegħu mingħajr ma jkollu għalfejn joħroġ mill-karozza.
Il-parti mportanti tal-ġbir tal-flus għad-Dar inklużi l-appelli, telefonati eċċetra saret fl-istudios ta’ WE Media f’Ħal Qormi bejn nofsinhar u nofsillejl. Matul il-maratona kien hemm fl-istudios il-President ta’ Malta, Dott. George Vella u s-Sinjura Vella, Mons. Arċisqof Charles Scicluna, l-Isqof Awżiljarju Mons. Joseph Galea-Curmi, l-President Emeritus Marie-Louise Coleiro Preca, il-Kap tal-Oppożizzjoni u s-Sinjura Grech u permezz ta’ Skype I-Isqof t’Għawdex Anton Teuma. Attendew ukoll għadd ta’ ministri u membri parlamentari miż-żewġ naħat tal-Kamra tad-Deputati kif ukoll delegati tal-partit politiċi ewlenin, personalitajiet distinti u rappreżentanti ta’ korpi kostitwiti li qattgħu ħin iwieġbu t-telefonati tal-pubbliku.
Wara waqfa ta’ sentejn, reġa’ sar l-irkant ta’ xogħlijiet tal-arti. Dan sar kollu kemm hu online u d-dħul mill-bejgħ ta’ ix-xogħlijiet laħaq is-somma ta’ €28,605.
Bħal kull sena, għadd ta’ parroċċi f’Malta w Għawdex organizzaw ġabriet speċjali li mbagħad ingħataw lid-Dar f’isem il-komunità parrokkjali uħud minnhom permezz ta’ Skype.
L-ewwel żjara saret filgħodu minn Mons Arċisqof Charles J. Scicluna li wkoll iċċelebra quddiesa fil-jum tal-ewwel tas-sena iddedikat lill-Imqaddsa Verġni Marija, Omm Alla u Jum il-Paċi fil-kappella tad-Dar tal-Providenza. Huwa kien assistit minn Mons.Charles Cordina, Vigarju Episkopali għad-Djakonija, Dun Martin Micallef, Direttur tad-Dar, Dun Trevor Fairclough, Direttur Spiritwali u Dun Josef Mifsud, Arċipriet tas-Siġġiewi.
Fl-omelija tiegħu l-Arċisqof qal li fil-bidu ta’ sena ġdida, huwa xtaq joffri lil kulħadd ix-xewqat sbieħ li jinsabu fil-kliem sabih tal-Mulej lil Mosè. “Iħares lejk il-Mulej bi mħabba u jagħtik is-sliem”. Huwa qal li l-ħarsa tal-Mulej fuqna hija ħarsa ta’ mħabba għax l-imħabba u l-ħniena jimxu flimkien.
Huwa awgura li l-għażliet li nagħmlu din is-sena jkunu għażliet tajba għax x’hemm tajjeb fir-rikreazzjoni li naħsbu li se tagħtina dak li tixtieq qalbna: droga f’kull għamla, xorb żejjed u għażliet oħra li jaljenawna għal ftit taż-żmien imma li ma jagħmlux ħlief ħsara.
Fil-bidu ta’ sena ġdida, Monsinjur Arċisqof Charles J. Scicluna xtaq joffri lil kulħadd ix-xewqat sbieħ li jinsabu fil-kliem sabih tal-Mulej lil Mosè. “Iħares lejk il-Mulej bi mħabba u jagħtik is-sliem”. Mons. Arċisqof kien qed jikkonċelebra quddiesa fil-jum tal-ewwel tas-sena iddedikat lill-Imqaddsa Verġni Marija, Omm Alla u Jum il-Paċi fil-kappella tad-Dar tal-Providenza. Huwa kien assistit minn Mons.Charles Cordina, Vigarju Episkopali għad-Djakonija, Dun Martin Micallef, Direttur tad-Dar, Dun Trevor Fairclough, Direttur Spiritwali u Dun Josef Mifsud, Arċipriet tas-Siġġiewi.
Mons. Arċisqof qal li l-ħarsa tal-Mulej fuqna hija ħarsa ta’ mħabba għax l-imħabba u l-ħniena jimxu flimkien. Kemm tkun ħaġa sabiħa li ngħallmu lilna nfusna biex nitolbu lill-Mulej ikompli jħarisna. Nitolbuh ukoll jagħtina l-għerf biex insibu l-paċi vera.
Huwa awgura li l-għażliet li nagħmlu din is-sena jkunu għażliet tajba għax x’hemm tajjeb fir-rikreazzjoni li naħsbu li se tagħtina dak li tixtieq qalbna: droga f’kull għamla, xorb żejjed u għażliet oħra li jaljenawna għal ftit taż-żmien imma li ma jagħmlux ħlief ħsara.
Huwa appella biex il-Maltin jerġgħu ikunu ġenerużi mad-Dar tal-Providenza li tant tieħu ħsieb b’għożża u b’imħabba lill-persuni b’diżabilità li huma residenti tagħha.
Il-Festa ta’ Ġenerożita qed tixxandar fuq l-istazzjonijiet kollha tat-televixin bejn nofsinhar u nofsilejl mill-istudios tal-WE Media f’Ħal Qormi. Għall-konvenjenza tal-pubbliku, fil-parkeġġ tad-Dar fis-Siġġiewi hemm drive-through fejn dak li jkun jista’ jagħmel id-donazzjoni tiegħu mingħajr ma joħroġ mill-karozza.
Ritratt: Arċidjoċesi ta’ Malta
Somma sabiħa ta’ €22,630 nġabret b’risq id-Dar tal-Providenza matul maratona ta’ 30 siegħa mużika fuq 103 Malta’s Heart.
Il-maratona bdiet fis-6.00am tal-Ħamis, 30 ta’ Diċembru u tmexxiet minn Arthur Caruana akkumpanjat minn żewġ preżentaturi magħrufin Ron Briffa u Ian Busuttil Naudi. Arthur wera s-sodisfazzjon tiegħu għat-turija ta’ solidarjetà bl-ammont li nġabar u rringrazzja lis-semmiegħa kollha għad-donazzjonijiet tagħhom.
F’diversi waqtiet tal-maratona mużikali saru messaġġi ta’ appoġġ u appelli għall-ġbir ta’ fondi tant meħtieġa. Fosthom kien hemm Mons Arċisqof Charles J. Scicluna, L-Isqof t’Għawdex Anton Teuma, l-Isqof Awżiljarju Joseph Galea-Curmi, Is-Supretendent tas-Saħħa Pubblika, Prof. Charmaine Gauci u Fr Martin Micallef, Direttur tad-Dar.
Arthur u sħabu esprimew is-sodisfazzjon tagħhom għal din il-wirja ta’ solidarjetà speċjalment f’sena ddominata mill-pandemijia.
Għada, l-ewwel tas-sena l-ġdida, huwa jum kbir ieħor għas-solidarjetà tal-Maltin u l-Għawdxin mad-Dar tal-Providenza. Bħas-sena l-oħra, minħabba l-pandemija COVID-19, il-Festa ta’ Ġenerożità se terġa’ ssir mill-istudios tal-WE Media f’Ħal Qormi fejn id-dħul se jkun ristrett għall-mistednin li se jwieġbu t-telefonati tad-donazzjonijiet. Fil-parkeġġ tas-Siġġiewi se jkun hemm biss drive-through għal min irid jagħmel donazzjoni mingħajr il-ħtieġa li joħroġ mill-karozza.
Barra minn hekk jistgħu isiru donazzjonijiet b’wieħed minn dawn il-mezzi.
€10 5160 2012
€15 5170 2013
€25 5180 2014
€50 5190 2085
€100 5130 2022
SMS €7 5061 8922
BOV Mobile 7932 4834
Paypal u kontijiet tad-Dar tal-Providenza mal-Banek ewlenin: APS Bank, BOV, HSBC, Lombark Bank, BNF Bank.
Wieħed jista’ wkoll jibgħat id-donazzjoni tiegħu permezz ta’ ċekk lid-Dar tal-Providenza, Triq Lapsi, is-Siġġiewi SGW2822. Imma nfakkru li b’direttiva tal-Bank Ċentrali ta’ Malta ma jistgħux jinħarġu ċekkijiet ta’ €20 jew inqas u mhux se jissarfu mill-banek.
Donazzjonijiet oħra jintlaqgħu fl-uffiċċju tad-Dar tal-Providenza, fi Triq San Pawl il-Belt wara s-Suq, mit-Tlieta sas-Sibt filgħodu bejn id-9:00 am u l-12:00 pm, mill-Paola Catholic Bookshop, Raħal Ġdid, kif ukoll mill-Pjazza tar-Rabat Malta.
Il-ħaddiema ta’ Dar Pirotta u flett San Ġużepp fis-Siġġiewi kienu nominati mid-Dar tal-Providenza għall-għoti tal-Premju Tim tas-Sena f’ċerimonja li fiha ġew onorati sitt individwi, tliet organizzazzjonijiet, u tim.
Iċ-ċerimonja tal-għoti tal-Premju Nazzjonali Ħaddiem tas-sena 2021 saret fl-20 ta’ Diċembru taħt il-patroċinju tal-E.T. Dr George Vella, President ta’ Malta. F’diskors tal-okkażjoni, Dr Vella qal li din l-attività hija waħda ferm speċjali mhux biss għax matulha jingħataw diversi premjijiet iżda għax fuq kollox tiċċelebra l-bżulija u l-irwol importanti tax-xogħol fil-ħajja tal-bniedem. Huwa fakkar fid-diversi sfidi u riperkussjonijiet li l-pandemija tal-COVID-19 ġabet magħha fuq il-postijiet tax-xogħol u mil-lat imprenditorjali.
Il-Premju Ħaddiem tas-Sena 2021 ingħata lil Roseanne Camilleri, Kap Eżekuttiv tal-Kura tas-Saħħa Primarja.