Archive for year: 2026

Id-Dar tal-Providenza ħabbret pjani ambizzjużi għall-edizzjoni li jmiss  għall-maratona annwali tagħha tal-volleyball bil-għan li tiġbor il-fondi biex tkun tista’ ssostni l-ħidma tagħha.

Issa li waslet fis-16-il edizzjoni tagħha, il-BOV Volleyball Marathon, din is-sena ser issir bejn il-Ħamis 16 u s-Sibt 18 ta’ Lulju 2026, u għall-ewwel darba se tittella’ fl-MFCC f’Ta’ Qali. L-avveniment se jixxandar ukoll fuq l-istazzjonijiet kollha tat-televiżjoni lokali.

L-organizzaturi spjegaw li l-post il-ġdid se jiftaħ opportunitajiet ġodda u eċitanti għall-avveniment, filwaqt li jagħmilha wkoll aktar aċċessibbli u ċentrali għall-viżitaturi.

“Il-bżonnijiet u l-fondi meħtieġa biex Id-Dar tal-Providenza tkompli topera qegħdin dejjem jiżdiedu, u li nsibu modi kif intejbu l-isforzi tagħna ta’ ġbir ta’ fondi huwa essenzjali. Id-Dar tal-Providenza teħtieġ madwar €7.5 miljun fis-sena biex tiżgura l-aħjar kwalità ta’ ħajja possibbli għar-residenti tagħha.”

Sa mit-twaqqif tagħha fl-1965, Id-Dar tal-Providenza offriet servizzi residenzjali personalizzati għal persuni b’diżabilità, f’ambjent ta’ sapport. Illum id-Dar tilqa’ fiha 115-il resident. Id-Dar toffri wkoll servizzi ta’ respite lill-familji ta’ persuni b’diżabilità.

Is-sena li għaddiet, waqt il-BOV Volleyball Marathon inġabret is-somma rekord ta’ €632,153. Dan ir-riżultat ħeġġeġ lill-organizzaturi biex joħolmu akbar u jaħdmu għal suċċess akbar ta’ din l-edizzjoni.

“Id-Dar temmen li tista’ tistrieħ fuq l-appoġġ kontinwu tal-Maltin u l-Għawdxin, li l-imħabba tagħhom lejn Id-Dar tal-Providenza se tkompli tgħin biex dan l-avveniment ikun suċċess sena wara sena.”

L-applikazzjonijet għall-plejers issa huma miftuħin. Min jixtieq japplika bħala plejer biex jilgħab fil-BOV Volleyball Marathon jista’ japplika fuq https://tinyurl.com/volley4dtp-players2026

 

Is-somma sabiħa ta’ €4,300 inġabret waqt il-wirja annwali ta’ karozzi klassiċi u vintage organizzata mill-Old Motors Club b’risq id-Dar Tal-Providenza. L-avveniment, li sar fil-festa pubblika ta’ San Ġużepp, sar fil-parkeġġ tad-Dar fis-Siġġiewi u għalih attendew għadd kbir ta’ viżitaturi u dilettanti tal-karozzi.

Madwar 140 vettura klassika u vintage, li jkopru aktar minn seklu ta’ storja tal-karozzi, ġew esebiti mill-membri tal-klabb f’atmosfera sabiħa.

Id-Direttur tad-Dar tal-Providenza, Mons. Martin Micallef, esprima l-apprezzament sinċier tiegħu, u rringrazzja lill-organizzaturi, il-parteċipanti u lill-pubbliku ġenerali għall-ġenerożità u l-appoġġ kontinwu tagħhom.

Il-Membru Parlamentari tal-Parlament Ewropew, Dott. Peter Agius żar l-attività, ltaqa’ mad-dilettanti u għamel id-donazzjoni tiegħu għall-istess kawża.

Il-klabb reġa’ kkonferma l-impenn tiegħu li jkompli jappoġġja lid-Dar Tal-Providenza u inizjattivi oħra ta’ karità, filwaqt li jkompli jippromwovi l-wirt rikk tal-motoring f’Malta.

Is-somma ta’ €2,125 inġabret waqt il-Kunċert Vokali u Strumentali mill-banda tal-Forzi Armati ta’ Malta f’għeluq is-60 anniversarju tad-Dar tal-Providenza li sar fil-Katidral Metropolitan ta’ San Pawl fl-Imdina nhar il-Ġimgħa, 28 ta’ Novembru 2025.

Il-preżentazzjoni saret mill-Kmandant tal-Forzi Armati ta’ Malta, l-Brigadier Clinton J. O’Neill lid-Direttur tad-Dar tal-Providenza, Mons. Martin Micallef li rringrazzja lill-Brigadier għax sena wara l-oħra l-banda tal-Forzi Armati baqgħet tagħmel dan il-kunċert b’risq id-Dar marbut mal-Jum Internazzjonali tal-Persuni b’Diżabilità.

Għall-okkażjoni tas-60 anniversarju inkitbu żewġ siltiet mużikali li ndaqqu għall-ewwel darba: 60 Sena ta’ Storja: Id-Dar tal-Providenza tas-Surmast Nicholas Vella u Tama tas-Surmast Antoine Mercieca. Il-programm kien jinkludi wkoll xogħlijiet ta’ Johann Sebastian Bach, Richard Wagner, Frank Erickson, Lowell Mason, Morten Lauridsen, Peter A. Yon, Stephen Adams, Carl Coberg u tal-kompożitur Malti Tano Monseigneur.

Minkejja l-kesħa u ħalbiet tax-xita li laqtu lil-gżejjer tagħna, għall-poplu Malti u Għawdxi l-ewwel jum tas-sena kien għal darb’oħra wirja ta’ ġenerożità lejn id-Dar tal-Providenza, espressjoni ta’ solidarjetà, bil-ġabra ta’ €1,556,453 matul il-Festa ta’ Ġenerożità.

Fit-tmiem ta’ maratona televiżiva, Mons. Martin Micallef, Direttur tad-Dar, awgura li s-solidarjetà murija lejn id-Dar tal-Providenza fl-ewwel jum tas-sena l-ġdida tibqa’ sejra matul din is-sena ma’ dawk kollha fis-soċjetà Maltija li għandhom ħtieġa ta’ appoġġ.

Reġà kien hemm l-irkant ta’ xogħlijiet tal-arti, pitturi, skulturi u ċeramika, mogħtija minn għadd ta’ artisti Maltin u barranin. Għal darb’oħra kollox, inkluż ix-xiri bl-irkant, sar online u l-bejgħ tax-xogħlijiet tal-arti laħaq is-somma ta’ €49,229.

L-Onor. Michael Falzon, Ministru għall-Politika Soċjali u d-Drittijiet tat-Tfal, li rrappreżenta lill-Prim Ministru Dr Robert Abela, għamel għotja ta’ €25,000 f’isem il-Gvern Malti mill-Fond tal-Kawżi Ġusti.

Bħalma ilu jsir għal dawn l-aħħar snin, numru mdaqqas ta’ parroċċi f’Malta u Għawdex għamlu ġabriet speċjali f’lejlet u fl-ewwel tas-sena li ngħataw lid-Dar tal-Providenza f’isem il-komunitajiet parrokkjali. Il-parroċċi f’Għawdex ġabru kollettivament €41,560.

Bħas-soltu, il-Festa ta’ Ġenerożità xxandret minn taħt it-tinda li ttellgħet apposta fil-parkeġġ tas-Siġġiewi. Ix-xandir tal-maratona beda b’quddiesa  ċċelebrata mill-E.T. l-Arċisqof Charles J. Scicluna fil-kappella tad-Dar megħjun minn Monsinjur Martin Micallef, Vigarju Episkopali għad-Djakonija u d-Direttur tad-Dar tal-Providenza flimkien mal-Arċipriet tal-parroċċa tas-Siġġiewi, Dun Josef Mifsud. Fil-bidu taċ-ċelebrazzjoni, Alexia Vella u Max Prasel Caruana għamlu s-solita prietka tradizzjonali tal-Milied bit-tħabbira tassew sabiħa tat-twelid ta’ Ġesù.

Fl-omelija tiegħu, l-Arċisqof Scicluna appella biex fl-ewwel jum tas-sena l-ġdida nuru barka lejn xulxin u nħarsu lejn xulxin b’kompassjoni u mħabba li huma tant neqsin fid-dinja tagħna tal-lum.