“Kun providenza għal ħaddieħor” – Fr Martin f’għeluq sninu

/fi /by

Dan huwa messaġġ mill-qalb mingħand Fr Martin Micallef, Direttur tad-Dar tal-Providenza, f’għeluq sninu nhar l-10 ta’ Novembru 2020.

“F’għeluq snini nixtieq nirringrazzja ‘l Alla għad-don tal-ħajja u għall-grazzji kbar li tani f’ħajti. Trabbejt f’familja b’valuri tajba, sejjaħli biex naqdieh bħala saċerdot, iltqajt ma’ ħafna nies li kienu ta’ ispirazzjoni għalija u rċevejt minn għandhom ħafna mħabba. Din is-sena nirringrazzjaħ b’mod speċjali għall-grazzja tal-fejqan mill-kanċer.

L-isbaħ rigal li tistgħu tagħtuni fil-birthday ta’ din is-sena hu li min jista’ jmur jagħti d-demm fiċ-Ċentru tal-Għoti tad-Demm ta’ Gwardamanġa. Meta kont qed nagħmel it-trattament kelli bżonn tliet boroż demm. Fil-fatt, aktar minn 30% tat-trasfużjonijiet tad-demm isiru lil pazjenti fit-taqsimiet tal-onkoloġija u l-ħematoloġija. Il-pazjenti morda bil-kanċer ikun jinħtiġilhom trattamenti li kapaċi jieħdu s-snin u dan jinkludi fost oħrajn trasfużjonijiet ta’ prodotti varji ta’ demm. Illum naf mill-esperjenza x’differenza tista’ tagħmel borza demm fit-triq għall-fejqan mill-kanċer. Naf ukoll li bħalissa hemm bżonn urġenti ta’ ħafna demm. Taħsibiex darbtejn u mur agħti demm.

L-għoti tad-demm lil xi ħadd li ma tafx min hu jew min hi, hu ġest nobbli ħafna. Nirringrazzja li dawk il-persuni li b’mod anonimu taw id-demm lili. Il-Mulej iroddilkom għal mitt darba l-karità tagħkom. L-ogħti tad-demm hu wkoll sinjal tal-providenza ta’ Alla. Kun providenza għal ħaddieħor.”

Id-Dar tal-Providenza ssellem il-memorja ta’ Fr Lino Cardona SJ

/fi /by

Id-Dar tal-Providenza ssellem il-memorja għażiża ta’ Fr Lino Cardona SJ li llum ingħaqad mal-Mulej fis-sema fl-età ta’ 76 sena.

Fr Lino ilu jagħti servizz lid-Dar tal-Providenza sa mis-sajf tal-1975 meta darba Dun Mikiel Azzopardi, l-fundatur tad-Dar, talbu joqgħod ftit minfloku biex jieħu btala barra minn Malta fix-xahar ta’ Awwissu. Minn dak iż-żmien sa llum baqa’ jiġi d-Dar tal-Providenza jqaddes kull nhar ta’ Erbgħa u kull nhar ta’ Ħadd u jgħin fejn ikun hemm bżonn. Fis-2011, kien irċieva l-Premju Dun Mikiel mid-Dar tal-Providenza bħala rikonoxximent għall-ħidma volontarja tiegħu fid-Dar. Huwa kien qrib ħafna Dun Mikiel Azzopardi fl-aħħar żmien ta’ ħajtu u kellu sehem attiv fil-preparamenti għall-funeral u d-difna tiegħu.

F’Settembru li għadda, Fr Lino kien intervistat fuq 103 FM fl-okkażjoni ta’ għeluq il-55 sena mit-twaqqif tad-Dar. Huwa rrakkonta mill-ġdid l-istorja ta’ kif Dun Mikiel Azzopardi, il-fundatur tad-Dar, irċieva l-ewwel donazzjoni ġeneruża li wasslet għall-bidu tad-Dar tal-Providenza. Huwa qal li Dun Mikiel kien jiddeskrivi din l-ewwel donazzjoni lejn id-Dar tal-Providenza bħala miraklu li baqa’ jirrepeti ruħu. Fr Lino qal li jiftakar lil Dun Mikiel jiddeskrivi l-ewwel donazzjoni bħala “l-ewwel miraklu’”. Huwa temm l-intervista billi qal li ħafna bbenefikaw minn mindu fetħet id-Dar tal-Providenza, u għaliħ din id-Dar hija t-teżor tal-Knisja ta’ Malta.
Inwasslu l-kondoljanzi tagħna lil ħutu fil-komunità tal-Ġiżwiti f’Malta kif ukoll lill-familjari tiegħu.

Agħtiħ O Mulej il-mistieħ ta’ dejjem.

“Id-Dar tal-Providenza goes Disney”

/fi /by

Id-Dar tal-Providenza ħasbet li ttella’ attività bl-isem “Id-Dar tal-Providenza Goes Disney”, għar-residenti tagħha. Il-produzzjoni marbuta mal-karattri ta’ Disney saret bejn id-19 u t-22 ta’ Ottubru 2020. Minkejja s-sitwazzjoni li ninsabu fiha bħalissa, id-Dar mxiet mal-protokolli kollha maħruġa mill-Awtoritajiet tas-Saħħa u taħt il-gwida tagħhom l-attività saret fuq erbat ijiem biex b’hekk ir-residenti tal-fletts setgħu jibqgħu fi gruppi għalihom mingħajr ma jitħalltu ma’ xulxin.

Żgur li r-residenti apprezzaw din l-attività u ħadu gost b’din il-produzzjoni li uħud mill-ħaddiema tad-Dar tal-Providenza ppreparaw għalihom f’dan iż-żmien xi ftit jew wisq diffiċli tal-pandemija COVID-19.

“Id-Dar tal-Providenza Goes Disney”, kienet attività sabiħa fejn l-Ability Promoters taħt id-direzzjoni ta’ David Muscat bl-għajnuna ta’ Loralie Scerri taħt is-superviżjoni ta’ Margaret Vella, flimkien mad-dipartiment tal-Fiżjoterapija, qasmu bejniethom it-talent tal-kant u l-animazzjoni biex iferrħu lir-residenti ta’ din id-Dar.

Minn qalbna nixtiequ nirringrazzjaw lil dawk kollha li kienu ta’ appoġġ kbir għalina biex din l-attività setgħet tittella’ fosthom il-kumpaniji Louie Noir Academy u Cheeramigos Animation Group li pprovdew il-kostumi, flimkien mal-kumpanija Audio System li pprovdiet LED Screens.

Maratona tal-Volleyball

/fi /by

Kull sena, Id-Dar tal-Providenza torganizza l-BOV Volleyball Marathon. L-ewwel edizzjoni kienet fl-2009. Din hi maratona ta’ 53 siegħa ta’ logħob kontinwu li ssir fl-ewwel tmiem il-ġimgħa ta’ Lulju.

L-għan tal-maratona hu li jinġabru fondi għad-Dar tal-Providenza fil-ħidma tagħha biex tkompli ttejjeb il-kwalità tal-ħajja u tkompli tgħin fl-iżvilupp sħiħ u l-inklużjoni soċjali tal-persuni b’diżabilità li jużaw is-servizzi tagħha.

Għanijiet oħra huma li tinkoraġġixxi l-ħidma volontarja, l-isports u r-rispett lejn il-persuni b’diżabilità li għandhom jingħataw l-għażliet u l-opportunitajiet kollha li kull ċittadin għandu dritt igawdi.

Il-maratona ssir fil-parkeġġ tad-Dar tal-Providenza fis-Siġġiewi u tixxandar għal partijiet twal fuq l-istazzjonijiet ewlenin tat-televiżjoni.

Dawk li jixtiequ jieħdu sehem bħala players jew volontiera fil-maratona għandhom iniżżlu minn fuq l-internet l-applikazzjoni relevanti jew jidħlu fuq www.facebook.com/Volley4DTP . Normalment, l-applikazzjonijiet joħorġu bejn April u Mejju ta’ kull sena.

SPRED

/fi /by

Fid-dinja tal-lum kulħadd sar konxju li persuni b’diżabiltajiet intellettwali, bħala membri mgħammda tal-Knisja tagħna, għandhom drittijiet spiritwali kif ukoll ħtiġijiet spiritwali. Matul is-snin fid-Dar tal-Providenza ppruvajna nindirizzaw l-importanza li nwieġbu għal dawn il-ħtiġijiet tagħhom.

Fl-2004, Id-Dar tal-Providenza bdiet tuża l-metodu msejjaħ SPRED – Żvilupp Speċjali Reliġjuż – li għal bosta snin intuża b’suċċess f’bosta partijiet tad-dinja. Fi SPRED kull persuna b’diżabilità ntellettwali għandha sponsor u tagħmel parti minn komunità żgħira ta’ (normalment) 14-il ruħ. Biex jieħdu benefiċċju akbar fis-sens ta’ dak li huwa spiritwali, l-ambjent fejn jiltaqgħu huwa ppreparat b’reqqa kbira. Din hija kamra li toffri merħba ta’ mħabba b’distrazzjonijiet mill-inqas u li tgħin lil dawk li jattendu biex ilestu ruħhom għal esperjenza tassew spiritwali. Wara madwar 45 minuta, il-grupp jinġabar madwar il-Kelma t’Alla f’kamra oħra li hija qisha oratorju u jitmexxew, minn Katekist Mexxej, f’katekeżi sinifikattiva. Dak li huwa reali għar-residenti tagħna huma l-affarijiet ordinarji fil-ħajja tagħhom ta’ kuljum – li jieklu, li jixorbu, li jidħku mal-ħbieb, li jistennew lil xi ħadd ġej jew li jmorru x’imkien. Huma propju dawn il-ġrajjiet ordinarji li jiġu mfakkra f’sessjoni ta’ SPRED. Mill-uman, imbagħad ngħaddu għad-Divin għax Alla juri ruħu fl-affarijiet ordinarji. Kull sessjoni tintemm bil-qsim tal-ikel madwar mejda li kulħadd jagħti daqqa t’id għall-preparazzjoni tagħha. L-esperjenza kollha hija ta’ madwar sagħtejn.

Il-grupp ta’ katekisti jiltaqgħu il-ġimgha ta’ wara biex jagħmlu analiżi tal-aħħar laqgħa u biex jippreparaw, permezz tat-talb, għal-laqgħa li tmiss.

Ladarba l-Katekeżi u l-Liturġija huma intrinsikament konnessi, iċ-ċelebrazzjonijiet tal-Quddiesa fil-Kappella tad-Dar tal-Providenza jieħdu sinifikat aktar profond. Il-kwiet u s-sens ta’ talb esperjenzati fil-laqgħat ta’ SPRED jagħtu sens akbar lill-Liturġija. Permezz ta’ dan il-bilanċ bejn katekeżi u liturġija, kulħadd huwa mrawwem biex jifhem aħjar il-misteru ta’ Alla li “jwettaq xi ħaġa sabiħa għalina u fostna.”

Fi SPRED, il-volontiera jikbru fil-fidi. Il-ħbieb jikbru fil-fidi. Flimkien, bħala kompanji, jagħmlu mixja fil-fidi u jaqsmu bejniethom din il-fidi.

Min hu nteressat jaqsam din il-fidi u l-ħbiberija ma’ persuni b’diżabilità intellettwali jista’ jikkuntattja lil SPRED permezz ta’ Imejl fuq spred@dartalprovidenza.org

Karus ta’ Mħabba

/fi /by

Id-Dar tal-Providenza għandha karusijiet speċjali għat-tfal li jitqassmu fi skejjel u parroċċi għal żmien ir-Randan li fihom huma jistgħu jfaddlu xi flus biex jgħinu lid-Dar.

Ma’ kull karus jingħata fuljett li jispjega li l-flus miġbura jintużaw għall-inklużjoni ta’ persuni b’diżabilità biex huma jkollhom opportunitajiet indaqs u jgħixu f’ambjent fejn jistgħu jħobbu u jinħabbu, jitgħallmu u jaqsmu l-esperjenzi tagħhom mal-oħrajn, jikbru fil-fidi, jaħdmu u jgawdu l-ħajja bħal kull persuna umana oħra.

Il-fuljett juri li din l-inizjattiva hi biss qatra f’oċean ta’ x’nistgħu nagħmlu favur il-persuni b’diżabilità.

Skejjel u parroċċi li jridu jipparteċipaw f’din il-katina ta’ imħabba jistgħu jċemplu fuq 21462844 jew 21464915 jew jikkuntattjawna b’imejl fuq info@dartalprovidenza.org

Il-Grupp tal-Ħbieb tad-Dar tal-Providenza, NSW Australia

/fi , /by

Il-Grupp twaqqaf f’Ottubru 2011 bil-għan li jiġbor fondi għad-Dar tal-Providenza, Malta. Fil-preżent dan il-grupp hu mmexxi mis-sinjuri:

· Jim Borg, Fundatur/Ko-ordinatur

· Marisa Previtera, Segretarja

· Miriam Friggieri, Teżoriera

Il-Grupp tal-Ħbieb tad-Dar tal-Providenza hu l-ambaxxatur uffiċċjali tad-Dar f’New South Wales, l-Awstralja.

Kull min jixtieq aktar dettalji jew jixtieq jagħmel donazzjoni għandu/għandha jikkuntattja:

lill-Ko-ordinatur, Jim Borg fuq Tel: +61 296367767 • Mob: +61 418825591 Wieħed jista’ jikkuntattjah ukoll bl-imejl: foph@bigpond.com.

Dettalji tal-kont bankarju:

Commonwealth Bank of Australia
Account Name: Friends of Providence House (NSW)
BSB: 062 416
Account Number: 1019 9448.

Dan hu l-uniku kont bankarju uffiċċjali fl-Awstralja

Festa ta’ Ġenerożità

/fi /by

Fl-1 ta’ Jannar ta’ kull sena d-Dar tal-Providenza torganizza Festa ta’ Ġenerożità fid-Dar tas-Siġġiewi biex tiġbor fondi tant meħtieġa għad-Dar. Kull sena aktar minn ħames miljun euro huma meħtieġa għat-tmexxija tad-djar tagħha inklużi dawk fil-komunitajiet tas-Siġġiewi, l-Qawra, Birkirkara, ż-Żurrieq w aktar tard il-Balluta. Din l-attività ta’ ġbir ta’ flus hija waħda mill-ewlenin li jsiru matul is-sena.

Il-Festa ta’ Ġenerożità tibda b’Quddiesa fil-kappella tad-Dar w aktar tard uħud mill-aqwa talent Malti jieħdu sehem f’maratona ta’ 15-il siegħa li ssir taħt it-tinda li tiġi armata apposta fil-parkeġġ tad-Dar tal-Providenza. Dan l-avveniment jixxandar dirett fuq l-istazzjonijiet ewlenin tat-televiżjoni. Bosta huma dawk il-Maltin li matul il-jum tal-ewwel tas-sena ‘l ġdida jerħulha lejn is-Siġġiewi biex jagħmlu d-donazzjoni tagħhom u jgawdu l-atmosfera.

Marbut mal-Festa ta’ Ġenerożità, fil-ġimgħat bikrin ta’ Diċembru jsir irkant ta’ xogħlijiet tal-arti ġentilment mogħtija minn artisti Malti u barranin. Dawn l-aħħar snin, bil-permess ġentili u bil-patrunaġġ tal-Ispeaker tal-Kamra tar-Rappreżentanti, Dr Anġlu Farrugia, ssir wirja tax-xogħlijiet tal-arti fl-intrata tal-bini tal-Parlament fil-Belt Valletta. Dan l-aħħar ukoll, l-irkant kien qed isir fl-istess post tal-wirja. Ix-xogħlijiet kollha tal-arti jkunu wkoll esibiti on line fuq www.dtpauction.com

Il-Bażar

/fi /by

Id-Dar għandha bażar li bħalissa jinsab magħluq.

Iċ-Ċentru Agrikolu San Isidoru

/fi , /by

Iċ-Ċentru Agrikolu San Isidoru fid-Dar tal-Providenza kien inawgurat uffiċjalment f’ Mejju 2009. Il-Fondazzjoni Alfred Mizzi kienet l-isponsor ewlieni ta’ dan il-proġett u pprovdiet il-finanzi biex ikun jista’ jibda.

Residenti tad-Dar ikabbru varjetà ta’ ħwawar fis-serra spazjuża, imbagħad huma jippakkjawhom biex jintużaw għall-kċina tad-Dar jew biex jinbiegħu lill-pubbliku. Iċ-Ċentru Agrikolu ssemma’ għal San Isidoru, il-patrun tal-bdiewa.

Għall-aktar informazzjoni jekk jogħġbok ikkuttattjana fuq: info@dartalprovidenza.org jew ċemplilna fuq: (00356) 21 462 844.